யாழ்ப்பாணம், கோவில் வீதியில் உள்ள வீடொன்றினுள் அத்துமீறி நுழைந்த இளைஞரொருவர், ஒரு பிள்ளையின் தாயான இளம் பெண்ணைக் கூரிய ஆயுதத்தால் தாக்கிப் படு*கொலை செய்துள்ளதுடன், அவரது தாயாரையும் படுகாயப்படுத்திவிட்டு, புகையிரதம் முன் பாய்ந்து தனது உயிரை மாய்த்துக் கொண்டுள்ளார்.
திங்கட்கிழமை இரவு கோவில் வீதியிலுள்ள குறித்த வீட்டிற்குள் நுழைந்த இளைஞன், அங்கு இருந்த பெண் மீது சரமாரியாகக் கத்தி*வெட்டுத் தாக்குதலை நடத்தியதுடன், அவரது தலைமுடியையும் அறுத்துத் தாக்குதல் மேற்கொண்டுள்ளார். இதில் பலத்த காயமடைந்த அப்பெண் சம்பவ இடத்திலேயே உயிரிழந்தார்.
அத்தோடு, தாக்குதலைத் தடுக்க முற்பட்ட பெண்ணின் தாயார் மீதும் குறித்த இளைஞன் கத்தியால் *வெட்டியுள்ளார். இதில் படுகாயமடைந்த தாயார் ஆபத்தான நிலையில் யாழ்ப்பாணம் போதனா வைத்தியசாலையில் அனுமதிக்கப்பட்டுச் சிகிச்சை பெற்று வருகின்றார்.
தாக்குதலை மேற்கொண்ட பின்னர் அங்கிருந்து தப்பிச் சென்ற அந்த இளைஞன், அரியாலை பகுதியில் யாழ்ப்பாணத்திலிருந்து கொழும்பு நோக்கிப் பயணித்த இரவு தபால் புகையிரதம் (Night Mail Train) முன் பாய்ந்து உயிரிழந்துள்ளார்.
அடையாளம் காணப்பட்ட விவரங்கள்:
கொல்லப்பட்ட பெண்: யாழ்ப்பாணத்தைச் சேர்ந்த சமையல் கலைஞரான ஆன் லக்ஷா இக்னேஷியஸ் (வயது 32).
தாக்குதல் நடத்திய இளைஞன்: கிளிநொச்சி, பரந்தன் சிவபுரம் பகுதியைச் சேர்ந்த தேவதாஸ் புகழரசன் (வயது 23).
கொலையுண்ட பெண்ணும் குறித்த இளைஞனும் யாழ்ப்பாணத்திலுள்ள பிரபல நட்சத்திர விடுதியொன்றில் சமையல் பிரிவில் இணைந்து பணியாற்றி வந்துள்ளனர். இளைஞன் தனது சமையற்கலை பயிற்சியை நிறைவு செய்து அங்குப் பயிற்சி சமையல் கலைஞராகக் கடமையாற்றி வந்துள்ளார்.
இச்சம்பவம் தொடர்பில் தடயவியல் காவற்துறையினர் சம்பவ இடத்திற்கு வருகை தந்து தீவிர சோதனைகளை மேற்கொண்டதுடன், பெண்ணின் சடலத்தை உடற்கூற்றுப் பரிசோதனைக்காக யாழ்ப்பாணம் போதனா வைத்தியசாலைக்கு அனுப்பி வைத்துள்ளனர்.
காவற்துறையினரின் ஆரம்பக்கட்ட சந்தேகம்:
இருவருக்கும் இடையில் காதல் விவகாரம் ஏதும் இருந்திருக்கலாமா, அதன் பின்னணியில் இக்*கொலை இடம்பெற்றதா என்ற கோணத்தில் காவற்துறையினர் முதற்கட்ட விசாரணைகளை முன்னெடுத்து வருகின்றனர்.
உயிரிழந்த பெண்ணின் கணவர் கடந்த 2021ஆம் ஆண்டு உயிரிழந்த நிலையில், அவர் மறுமணம் செய்துகொள்ளாமல் தனது பெண் குழந்தையுடனும் தாயாருடனும் வசித்து வந்துள்ளார்.
