சென்னை:

பெரம்பூர் தொகுதியில் வெற்றி பெற்ற முதலமைச்சர் விஜய்யின் தேர்தல் வெற்றியை ரத்து செய்யக் கோரித் தொடரப்பட்ட வழக்கில் சென்னை உயர்நீதிமன்றம் இன்று சரமாரியான கேள்விகளை எழுப்பியுள்ளது.

தேர்தல் வழக்கு:

தமிழக முதலமைச்சர் விஜய், பெரம்பூர் தொகுதியில் 53,715 வாக்குகள் வித்தியாசத்தில் வெற்றி பெற்றார். அவரது தேர்தல் வெற்றியை எதிர்த்து திமுக வேட்பாளர் ஆர்.டி.சேகர் மற்றும் சில வாக்காளர்கள் தரப்பில் சென்னை உயர்நீதிமன்றத்தில் தனித்தனியாகத் தேர்தல் வழக்குகள் தாக்கல் செய்யப்பட்டுள்ளன. முதலமைச்சர் விஜய்க்குப் பண்ருட்டியில் உள்ள ரூ.30 கோடிக்கான சொத்தை அவர் தனது வேட்புமனுவில் மறைத்துள்ளதாக அவர்கள் தரப்பில் வாதிடப்பட்டது.

நீதிபதி சரமாரி கேள்வி:

இந்த மனு மீதான விசாரணை நீதிபதி வி.லட்சுமி நாராயணன் முன்பு இன்று நடைபெற்றது. இருதரப்பு வாதங்களையும் கேட்ட நீதிபதி, கோடிக்கணக்கில் சொத்துக்களை வைத்திருக்கும் ஒரு பெரிய நடிகர் அனைத்துச் சொத்துக்களையும் ஞாபகம் வைத்திருக்க முடியுமா? சுமார் ரூ.600 கோடி சொத்துக்கள் இருப்பதாகத் தெரிவித்த முதலமைச்சர் விஜய், ரூ.30 கோடியை மட்டும் ஏன் மறைக்க வேண்டும்? என வினவினார்.

எந்த பங்களாவில் தங்குவார்?:

தணிக்கையாளர் தவறுதலாக ஒரு சொத்தை சேர்க்க மறந்திருந்தால், அதற்காகத் தேர்தல் வெற்றியை ரத்து செய்ய முடியுமா எனக் கேட்ட நீதிபதி, “இனி வரும் காலங்களில் எந்த பங்களாவில் முதலமைச்சர் விஜய் வசிப்பார் என்பதையும் வேட்புமனுவில் குறிப்பிட வேண்டும் என கேட்பீர்களா?” என அதிரடியாகக் கேள்வி எழுப்பினார்.

நாளைக்கு ஒத்திவைப்பு:

கடந்த காலங்கள் முதல் தற்போது வரை மக்கள் சின்னங்கள் மற்றும் கட்சிகளின் அடிப்படையில்தான் வாக்களிக்கிறார்களே தவிர, எந்த வேட்பாளரின் பின்புலத்தையும் ஆய்வு செய்து வாக்காளர்கள் முடிவெடுப்பதில்லை என்று தெரிவித்த நீதிபதி, இவ்வழக்கின் அடுத்தக்கட்ட விசாரணையை நாளைக்கு (அக்.8) ஒத்திவைத்துள்ளார்.

#CMVijay #MadrasHighCourt #TNPolitics #Perambur #ElectionCase #BmNews #TamilNews #BreakingNewsTN #TamilNaduNews #LatestNews #TamilNewsLive