முல்லைத்தீவு மாவட்டத்தில் சட்டவிரோத கடற்றொழில் செயற்பாடுகளைக் கட்டுப்படுத்த நடவடிக்கைகள் முன்னெடுக்கப்பட்டுள்ளன.
அந்தவகையில் முல்லைத்தீவிலுள்ள 34கடற்றொழில் இறங்குதுறைகளையும், நாயாறு கடல் நீரேரியினையும் எல்லைப்படுத்துவதற்குத் தீர்மானிக்கப்பட்டுள்ளது.
முல்லைத்தீவு கரைதுறைப்பற்று பிரதேசசெயலகத்தில் 28.09.2026அன்று இடம்பெற்ற விசேட கூட்டத்திலேயே இவ்வாறு தீர்மானிக்கப்பட்டுள்ளது.
இது தொடர்பில் மேலும் தெரியவருகையில்,
முல்லைத்தீவு மாவட்டத்தில் சட்டவிரோத செயற்பாடுகள் அதிகரித்துள்ளநிலையில், அத்தகைய சட்டவிரோத செயற்பாடுகளைக் கட்டுப்படுத்துவதற்கு, முல்லைத்தீவு மாவட்ட கடற்றொழில் நீரியல்வளத் திணைக்களம் நடவடிக்கை மேற்கொண்டுள்ளது.
அந்தவகையில் முல்லைத்தீவு மாவட்டத்திலுள்ள 41கடற்றொழில் இறங்குதுறைகளையும், கொக்கிளாய், நாயாறு, நந்திக்கடல் ஆகிய களப்புக்களையும் எல்லைப்படுத்துவதற்கு கடற்றொழில் நீரியல்வளத் திணைக்களம் கடந்த 20.09.2026ஆம் திகதி இடம்பெற்ற கரைதுறைப்பற்று பிரதேச அபிவிருத்தி ஒருங்கிணைப்புக்குழுக் கூட்டத்தில் அனுமதியைக் கோரியிருந்தது.
இந்நிலையில் இறங்குதுறைகள் மற்றும் களப்புக்களை எல்லைப்படுத்துவதுதொடர்பில், கடற்றொழிலாளர் சங்கங்களின் பிரதிநிதிகளுடன் விசேடகூட்டம் ஒன்று ஒழுங்குசெய்யப்பட்டு, அந்தக்கூட்டத்திலேயே இவ்விடயம் தொடர்பில் முடிவுகளை எடுக்கவேண்டுமென வன்னிமாவட்ட நாடாளுமன்ற உறுப்பினர் துரைராசா ரவிகரன் வலியுறுத்தினார்.
அதற்கமைய கடந்த 28.09.2026அன்று இஞம்பெற்ற குறித்த விசேட கூட்டத்தில் கரைவலைப்பாடுகளுடன், எல்லைப்பிணக்கு காணப்படும் 07 இறங்குதுறைகளைத் தவிர மிகுதி 34இறங்குதுறைகளை எல்லைப்படுத்துவதென முடிவெடுக்கப்பட்டது.
அத்தோடு கரைவலை உரிமையாளர்கள் மற்றும் கடற்றொழில் சங்கங்களுடன் கலந்துரையாடி மிகுதி 07இறங்குதுறைகளையும் அனஎல்லைப்படுத்த நடவடிக்கை மேற்கொள்வதெனவும் இதன்போது முடிவெடுக்கப்பட்டது.
அதேவேளை நாயாறு களப்பினை எல்லைப்படுத்துவதற்கு அனுமதி வழங்கப்பட்டது.
கொக்கிளாய் மற்றும் நந்திக்கடல் களப்புக்களின் அருகோடு தனியார் காணிகளும் இருப்பதால் அதுதொடர்பில் உரியதரப்பினருடன் கலந்துரையாடல்களை மேற்கொண்டு, அதன்பின்னர் கொக்கிளாய் மற்றும் நந்திக்கடல் களப்புக்களை எல்லைப்படுத்துவதெனவும் தீர்மானிக்கப்பட்டது.
மேலும் இந்த விசேட கலந்துரையாடலில் பாராளுமன்ற உறுப்பினர்களான துரைராசா ரவிகரன், செ.திலகநாதன், கரைதுறைப்பற்று பிரதேசசெயலாளர், கடற்றொழில் நீரியல்வளத் திணைக்கள அதிகாரிகள், பிரதேசசெயலக உத்தியோகத்தர்கள் எனப் பலரும் பங்கேற்றிருந்தமை குறிப்பிடத்தக்கது.
