அவர் எனது பின்புறத்தில் முத்தமிடட்டும்’: ட்ரம்பின் புதிய வரி அச்சுறுத்தலுக்கு ஃபோர்ட் கடும் கண்டனம்எதிர்வரும் புத்தாண்டு முதல் கனடாவின் அனைத்து கார்கள், டிரக்குகள், வாகன உதிரிபாகங்கள் மற்றும் எஃகு (Steel) மீதான இறக்குமதி வரிகளை 50 சதவீதமாக உயர்த்தப்போவதாக திங்களன்று உறுதியளித்த அமெரிக்க அதிபர் டொனால்ட் ட்ரம்பிற்கு, ஒன்டாரியோ மாகாண முதல்வர் டக் ஃபோர்ட் (Doug Ford) காரசாரமான பதிலடி கொடுத்துள்ளார்.
“என்னைப் பொறுத்தவரையில், அவர் எனது பின்புறத்தில் முத்தமிடட்டும் (kiss my ass),” என்று திங்கள்கிழமை காலையில் ‘நியூஸ்டாக் 580 சி.எஃப்.ஆர்.ஏ’ (Newstalk 580 CFRA) தொகுப்பாளர் பில் கேரளிடம் ஃபோர்ட் கூறினார். “நாங்கள் அவருக்கு எதிராக முழு வீச்சில் களமிறங்கப் போகிறோம்.”
அமெரிக்காவை “வேதனையை உணர வைப்பதற்காக” மின்சார ஏற்றுமதி மீதும் வரி விதிக்க பரிசீலித்து வருவதாக ஃபோர்ட் தெரிவித்துள்ளார்.
மேலும், நாடு முழுவதிலும் உள்ள அனைத்து மாகாண முதல்வர்களும் “இந்தப் போராட்டத்தில் உடனடியாகக் குதிக்க வேண்டும்” என்று அவர் வலியுறுத்தினார்.
“இதில் நான் மட்டும் தனியாக நிற்க முடியாது,” என்று அவர் கூறினார்.
“ஒவ்வொரு மாகாணமும், அல்லது அவற்றில் பெரும்பாலானவை, அமெரிக்காவிற்கு மின்சாரத்தை விநியோகிக்கின்றன. ஆல்பர்ட்டா (Alberta) மாகாணம் அமெரிக்காவிற்கு தினமும் 4.1 மில்லியன் பீப்பாய்கள் கச்சா எண்ணெயை வழங்கி வருகிறது,” என்றும் அவர் சுட்டிக்காட்டினார்.
