மதுரை
மதுரை மாவட்டம் சோழவந்தான் அடுத்த சங்கக்கோட்டை கிராமத்தில் ஆகஸ்ட் 29 மற்றும் 30 ஆகிய தேதிகளில் கபடி போட்டி நடத்த அனுமதி கோரிய வழக்கில், உயர் நீதிமன்ற மதுரை கிளை பல்வேறு கடுமையான கட்டுப்பாடுகளுடன் அனுமதியளித்து அதிரடி உத்தரவுகளைப் பிறப்பித்துள்ளது.
கபடி போட்டிக்கு அனுமதி கோரிய வழக்கு:
சங்கக்கோட்டை கிராம மந்தைக்களத்தில் கபடி போட்டி நடத்தக் காவல் துறையினர் அனுமதி மறுத்ததை அடுத்து, சோழவந்தானைச் சேர்ந்த முகேஷ் என்பவர் உயர் நீதிமன்ற மதுரை கிளையில் வழக்கு தொடர்ந்தார். இந்த மனுவை விசாரித்த நீதிபதி எல். விக்டோரியா கெளரி, காலை 6 மணி முதல் இரவு 10 மணி வரை போட்டியை நடத்திக் கொள்ள நிபந்தனைகளுடன் அனுமதி வழங்கி உத்தரவிட்டார்.
நீதிமன்றம் விதித்த அதிரடி நிபந்தனைகள்:
-
குற்ற வழக்கு நிலுவையில் உள்ள நபர்கள் எக்காரணத்தைக் கொண்டும் இந்தக் கபடி போட்டியில் பங்கேற்கத் தகுதியற்றவர்கள்.
-
போட்டியில் பங்கேற்பவர்கள் மது அல்லது வேறு எந்தவொரு போதைப் பொருட்களையும் கண்டிப்பாக உட்கொள்ளக் கூடாது.
-
அரசியல் கட்சி, கட்சித் தலைவர், சாதி, சமூகம் அல்லது மதப்பிரிவுக்கு ஆதரவாகவோ எதிராகவோ எவ்வித முழக்கங்களும் கூச்சல்களும் எழுப்பக் கூடாது.
-
மதம் மற்றும் அரசியல் தலைவர்களின் படங்கள், சர்ச்சையை ஏற்படுத்தும் ஆட்சேபனைக்குரிய வாசகங்கள் அச்சிடப்பட்ட ஆடைகளைப் போட்டியின் போது அணியக் கூடாது.
-
குறிப்பிட்ட சமூகத்தையோ அல்லது தலைவரையோ முன்னிலைப்படுத்தும் வகையிலான பிளக்ஸ் போர்டுகள் மற்றும் விளம்பரப் பலகைகளை வைக்கக் கூடாது.
-
மத உணர்வுகளைத் தூண்டும் வகையிலான அல்லது மதத் தலைவர்களைப் புகழ்ந்து பாடும் பாடல்களைப் போட்டி நடைபெறும் இடத்தில் ஒலிக்கவிடக் கூடாது.
-
பொது அமைதிக்கும், மக்களின் நிம்மதிக்கும் குந்தகம் விளைவிக்கும் எந்தவொரு விரும்பத்தகாத சம்பவமும் நடைபெறாமல் இருப்பதைப் போட்டியை நடத்துபவர்கள் உறுதி செய்ய வேண்டும்.
காவல்துறைக்கு முழு அதிகாரம்:
நீதிமன்றம் விதித்துள்ள இந்த நிபந்தனைகள் மீறப்பட்டால், உடனடியாகச் சட்டப்படி தகுந்த நடவடிக்கை எடுக்கவும், தேவைப்பட்டால் கபடி போட்டியை நிறுத்தவும் காவல்துறைக்கு முழு அதிகாரம் வழங்கப்படுவதாக நீதிபதி தனது உத்தரவில் திட்டவட்டமாகத் தெரிவித்துள்ளார்.
#Kabaddi #MaduraiHighCourt #CourtOrder #MaduraiNews #Sholavandan #SportsNewsTN #TamilNaduNews #ChennaiNews #TNPolitics #ViralNewsTN #TrendingTN #LatestNewsTN #TNNewsUpdates
