சென்னை

சென்னை எண்ணூர் முகத்துவாரப் பகுதியில் உள்ள கொசஸ்தலை ஆற்றில் ரசாயனக் கழிவுகள் கலந்ததால் டன் கணக்கிலான மீன்கள் செத்து மிதக்கும் கொடூர சம்பவம் அப்பகுதியில் பெரும் அதிர்ச்சியையும் கொந்தளிப்பையும் ஏற்படுத்தியுள்ளது.

வடசென்னையில் செயல்பட்டு வரும் 30-க்கும் மேற்பட்ட தொழில் நிறுவனங்கள் மற்றும் அனல்மின் நிலையங்களில் இருந்து வெளியேறும் நச்சு ரசாயனக் கழிவுகள் ஆற்றில் தொடர்ந்து கலக்கப்படுவதே மீன்கள் உயிரிழக்கக் காரணம் எனக் குற்றம் சாட்டி, தாழங்குப்பம் பகுதி மீனவர்கள் நள்ளிரவு முதல் விடிய விடிய சாலை மறியல் போராட்டத்தில் ஈடுபட்டனர். நண்டு, சிறு மீன் குஞ்சுகள் எனப் பல்வேறு நீர்வாழ் உயிரினங்களும் பெருமளவில் அழிந்து வருவதால் தங்கள் ஒட்டுமொத்த வாழ்வாதாரமும் பாதிக்கப்பட்டுள்ளதாக மீனவர்கள் வேதனை தெரிவித்தனர்.

பூவுலகின் நண்பர்கள் அமைப்பின் சுற்றுச்சூழல் பொறியாளர் பிரபாகரன் வீர அரசு இது குறித்துக் கூறுகையில், “முன்பை விட தற்போது லட்சக்கணக்கான மீன்கள் உயிரிழந்திருப்பது மிகப்பெரிய பேரவலம். மாசுக் கட்டுப்பாட்டு வாரியத்தின் தொடர் அலட்சியமே இதற்கு முக்கியக் காரணம். கடல் அருகில் ஆலைகளை அமைக்க வேண்டும் என்றால், வடசென்னையை விட மக்கள் தொகை குறைவான பெசன்ட் நகரில் ஆலைகளை அமைக்கலாமே?” எனக் கடுமையாக விமர்சித்தார்.

பா.ம.க. தலைவர் அன்புமணி ராமதாஸ் தனது ‘எக்ஸ்’ (X) தளத்தில் வெளியிட்டுள்ள கண்டனப் பதிவில், “அனல் மின் நிலையங்கள் மற்றும் எண்ணெய் சுத்திகரிப்பு நிலையங்களின் வேதிக்கழிவுகளே இந்த மாபெரும் அழிவிற்குக் காரணம். அதிகாரிகளின் இந்தத் தொடர் அலட்சியம் வன்மையாகக் கண்டிக்கத்தக்கது. இதனால் அப்பகுதியில் கடும் துர்நாற்றம் வீசுவதுடன், தொற்றுநோய்கள் பரவும் பெரும் அபாயமும் ஏற்பட்டுள்ளது,” என்று எச்சரித்துள்ளார்.

மீனவர்களின் போராட்டத்தைத் தொடர்ந்து தாழங்குப்பம் பகுதியில் வட்டாட்சியர், மாசுக்கட்டுப்பாட்டு வாரிய அதிகாரிகள், மீன்வளத்துறை அதிகாரிகள் மற்றும் சட்டமன்ற உறுப்பினர் செந்தில்குமார் ஆகியோர் மீனவர் சங்கப் பிரதிநிதிகளுடன் அவசர ஆலோசனை நடத்தினர். இந்தச் சம்பவம் குறித்து ஆய்வு செய்ய விரைவில் சிறப்புக் குழு அமைக்கப்படும் என்றும், பாதிக்கப்பட்ட மீனவர்களுக்கு உரிய நிவாரணமும், நிரந்தர வேலைவாய்ப்பும் பெற்றுத் தர நடவடிக்கை எடுக்கப்படும் என்றும் அதிகாரிகள் தரப்பில் உறுதியளிக்கப்பட்டுள்ளது.

#Ennore #DeadFish #ChemicalWaste #KosasthalaiyarRiver #NorthChennai #ChennaiNews #AnbumaniRamadoss #TNPCB #TamilNaduNews #TNPolitics #SaveEnnore #ViralNewsTN #TrendingTN #LatestNewsTN #TNNewsUpdates