காட்டுமன்னார்கோவில்
போதிய மழை இல்லாத காரணத்தால் கடலூர் மாவட்டம் வீராணம் ஏரியின் நீர்மட்டம் வேகமாகச் சரிந்து வருவதால், சென்னைக்கான குடிநீர் விநியோகத்தில் பெரும் சிக்கல் ஏற்பட்டுள்ளது.
மேட்டூர் தண்ணீர் திறக்கப்படாததால் சிக்கல்:
சென்னை மக்களின் முக்கியக் குடிநீர் ஆதாரமான வீராணம் ஏரிக்கு, கொள்ளிடம் கீழணையிலிருந்து வடவாறு வழியாகத் தண்ணீர் வந்தடைகிறது. வழக்கமாக ஒவ்வொரு ஆண்டும் ஜூன் 12-ஆம் தேதி திறக்கப்படும் மேட்டூர் அணைத் தண்ணீர் மூலம் வீராணம் ஏரி நிரப்பப்பட்டு சென்னைக்குக் குடிநீர் அனுப்பப்படும். ஆனால், இந்த ஆண்டு மேட்டூர் அணையில் போதிய நீர் இருப்பு இல்லாததால் தண்ணீர் திறக்கப்படவில்லை. இதனால் தொடக்கத்திலேயே சென்னைக்குக் குடிநீர் அனுப்புவதில் சிக்கல் எழுந்தது.
வேகமாகக் குறையும் நீர்மட்டம்:
இதனைத் தொடர்ந்து, அரசின் சிறப்புக் கவனத்தின் பேரில் கடந்த மாதம் 1000 கன அடி தண்ணீர் வீராணம் ஏரிக்குக் கொண்டு வரப்பட்டு, சென்னைக்குத் தடையின்றி குடிநீர் அனுப்பப்பட்டது. ஆனால், தற்போது ஏரியின் நீர்மட்டம் வெறும் 41.25 அடியாகக் குறைந்துவிட்டது. இங்கிருந்து சென்னைக்குத் தினமும் வினாடிக்கு 73 கன அடி தண்ணீர் அனுப்பப்பட்டு வருகிறது.
சென்னைக்குக் குடிநீர் தட்டுப்பாடு அபாயம்?:
மழையின்மையால் தொடர்ந்து நீர்மட்டம் சரிந்து வருவதால், ஏரியில் ஆங்காங்கே மணல் திட்டுகள் வெளியே தெரியத் தொடங்கியுள்ளன. இதனால் ஏரியிலிருந்து தண்ணீரை நீரேற்றும் நிலையத்திற்குக் கொண்டு செல்வதில் கடும் சிரமம் ஏற்பட்டுள்ளது. இருக்கும் தண்ணீரும் விரைவில் தீரும் தருவாயில் உள்ளதால், வரும் நாட்களில் சென்னைக்குக் குடிநீர் அனுப்புவது தடைபடும் அபாயம் உருவாகியுள்ளது.
#VeeranamLake #ChennaiWaterCrisis #ChennaiDrinkingWater #Kattumannarkoil #Cuddalore #MetturDam #WaterScarcity #TamilNaduNews #ChennaiNews #TNWeather #ViralNewsTN #TrendingTN #LatestNewsTN #TNNewsUpdates
