கடந்த வார இறுதியில் நோர்த் யோர்க்கில் (North York) கடைசியாகக் காணப்பட்ட 63 வயதுடைய பெண்ணைக் கண்டுபிடிக்க பொதுமக்கள் உதவுமாறு டொராண்டோ காவல்துறை கேட்டுக்கொண்டுள்ளது.

ஆன் மேரி (Ann Marie) என அடையாளம் காணப்பட்ட இந்த 63 வயதுப் பெண், ஆகஸ்ட் 8 அன்று மாலை 6:00 மணிக்கு சற்று முன்னதாக, விக்டோரியா பார்க் அவென்யூவிற்கு (Victoria Park Avenue) அருகில் உள்ள எக்லிண்டன் அவென்யூ கிழக்கு (Eglinton Avenue East) மற்றும் பெர்மாண்ட்சி வீதி (Bermondsey Road) சந்திப்புப் பகுதியில் கடைசியாகக் காணப்பட்டதாகக் காவல்துறையினர் தெரிவிக்கின்றனர்.

அவர் ஐந்து அடி ஏழு அங்குல உயரமும், மெலிந்த உடலமைப்பும், தோள் வரை நீண்ட பொன்னிற முடியையும் கொண்டவராக விவரிக்கப்பட்டுள்ளார். அவர் கடைசியாக வெள்ள நிற மேலாடை, கருப்பு நிறக் காற்சட்டை, வாசிப்புக் கண்ணாடி மற்றும் பழுப்பு நிற ஓட்டப் பயிற்சிக்கான காலணிகளை (Running shoes) அணிந்திருந்தார்.

அவரது பாதுகாப்பு குறித்துத் தாங்கள் கவலையடைந்துள்ளதாகக் காவல்துறையினர் தெரிவிக்கின்றனர்.

காணாமல் போன அந்தப் பெண் ஸ்காட்டிஷ் உச்சரிப்பில் (Scottish accent) பேசுவார் என்றும், அணுகக்கூடியவர் என்றபோதிலும் அவர் மனக்குழப்ப நிலையில் இருக்கலாம் என்றும் காவல்துறையினர் கூறுகின்றனர்.

இந்தத் தேடுதல் சம்பவத்தை முதல் நிலைத் தேடுதலாக (Level 1 search) தீவிரப்படுத்தியுள்ளதாகக் காவல் ஆய்வாளர் ஜோனாதன் ரோஸ் (Jonathan Rose) செவ்வாய்க்கிழமை காலை செய்தியாளர்களிடம் தெரிவித்தார்.

‘உங்கள் வாகனக் கொட்டகைகளைச் சோதியுங்கள்’

“காணாமல் போன நபர்களைத் தேடுவதற்கான மிக உயர்ந்த முன்னுரிமைத் தேடுதல் நிலை இதுவாகும். இதில் மோப்ப நாய்ப் படை (K9), குதிரைப்படை போன்ற தேவையான அனைத்து வளங்களும் ஈடுபடுத்தப்பட்டுள்ளன” என்று அவர் கூறினார்.

“உதவுவதற்காக எங்கள் காணாமல் போனோர் பிரிவினர் இங்கு உள்ளனர். மேலும் தரையில் மேற்கொள்ளப்படும் தேடுதல் பணிகளுக்கு உதவுவதற்காக அவசரக்கால மேலாண்மை நிபுணர்களும் எங்களுடன் உள்ளனர்.”

அவர் கடைசியாகக் காணப்பட்ட பகுதியைச் சுற்றியுள்ள பசுமைப் பகுதிகளை அதிகாரிகள் ஏற்கனவே சோதனையிட்டுள்ளதாக அவர் தெரிவித்தார்.

“நாங்கள் அப்பகுதியில் உள்ள வணிக மற்றும் குடியிருப்புப் பகுதிகளின் வீடியோ பதிவுகளையும் சேகரித்து வருகிறோம்” என்று ரோஸ் கூறினார்.

தேடுதல் பணிக்கு உதவக்கூடிய டேஷ்கேம் (Dashcam) மற்றும் பிற பாதுகாப்பு கேமரா பதிவுகளை மறுபரிசீலனை செய்யுமாறு காவல்துறையினர் பொதுமக்களிடம் கேட்டுக்கொள்வதாகவும் அவர் மேலும் தெரிவித்தார்.

“மனக்குழப்பத்தில் காணாமல் போன ஒருவர் மறைந்திருக்கக்கூடும் என்பதால், அப்பகுதிவாசிகள் தங்கள் வாகனக் கொட்டகைகள் (Garages), பொருட்கள் வைக்கும் கொட்டகைகள் (Sheds) அல்லது வீட்டின் வெளிப்புறக் கட்டிடங்களைச் சோதித்துப் பார்க்குமாறு நாங்கள் கேட்டுக்கொள்கிறோம்” என்று ரோஸ் தெரிவித்தார்.