சென்னை

அரசுத் துறை மற்றும் கல்வி நிறுவன நிகழ்ச்சிகளில் முதலில் தமிழ்த்தாய் வாழ்த்து பாடுவதைக் கட்டாயமாக்கும் வகையில், சட்டசபையில் முதலமைச்சர் ஜோசப் விஜய் கொண்டு வந்த தனித்தீர்மானம் இன்று ஒருமனதாக நிறைவேற்றப்பட்டது. இதற்கு ஆதரவளித்த அனைத்துக் கட்சியினருக்கும் அவர் நெகிழ்ச்சியுடன் நன்றி தெரிவித்துள்ளார்.

சட்டப்பேரவையில் தனித்தீர்மானத்தைக் கொண்டு வந்து முதலமைச்சர் விஜய் பேசுகையில், “இந்தியாவின் நெற்றியில் வைக்கக்கூடிய வெற்றிப் பொட்டுதான் நம் தமிழ்நாடு. தமிழ் என்றால் கெத்து; தமிழ் என்றால் அது தனி பவர். ஒரு பெயரே, ஒரு சொல்லே மிகப்பெரிய வரலாறு என்றால் அது தமிழ்தான். தமிழ் மொழி என்றால் ஒட்டுமொத்த தமிழ்நாடும் ஒன்றாக வந்து நிற்கும். தமிழ் வெறும் மொழி மட்டும் அல்ல; அது நம் உயிர். பேசினால் ஓசை மட்டும் இல்லை, உணர்வும் வரும். நம் தாய்மொழி குறித்த உணர்வைப் புரியவைக்க ‘தாய் மொழி, தமிழ் மொழி’ என்று சொல்வதே போதுமானது,” என்று உணர்ச்சிகரமாகப் பேசினார்.

தொடர்ந்து அவர், “தமிழ்த்தாய் வாழ்த்துக்கு முதலிடம் அளிப்பதுதான் மாநில உரிமை. தமிழ்த்தாய் வாழ்த்தின் மரியாதையைப் பாதுகாப்பதில் தவெக அரசு எவ்விதச் சமரசமும் செய்யாது. உணர்வோடு கலந்திருக்கக்கூடிய தமிழைப் பின்னுக்குத் தள்ளினால் அதனை எப்படிப் பொறுத்துக்கொள்வது? தமிழ்நாட்டில் தமிழ்த்தாய் வாழ்த்துதான் எப்போதுமே முதலிடத்தில் இருக்க வேண்டும்; அது நம் அடிப்படை உரிமை. தமிழ்த்தாய் வாழ்த்து முதலில் பாடப்பட வேண்டும் என்று கூறுவது அரசியல் சார்ந்த விவாதமாக மாற வேண்டிய அவசியமே இல்லை. கட்சி வேறுபாடுகளைக் கடந்து ஒன்றிணைந்து அனைத்து உறுப்பினர்களும் இந்தத் தீர்மானத்திற்கு ஆதரவு அளிக்க வேண்டும்,” என்று அழைப்பு விடுத்தார்.

இதனையடுத்து, முதலமைச்சர் விஜய் கொண்டு வந்த தனித்தீர்மானத்துக்கு திமுக, அதிமுக, காங்கிரஸ் உள்ளிட்ட அனைத்துக் கட்சிகளும் தங்களது முழு ஆதரவைத் தெரிவித்தன. திமுக சார்பில் எம்.எல்.ஏ. கோவி.செழியன் பேசுகையில், “அனைத்து நிகழ்ச்சிகளிலும் தமிழ்த்தாய் வாழ்த்து முதலில் பாடப்பட வேண்டும் என்ற தீர்மானத்துக்கு திமுக முழுமையான ஆதரவு தெரிவிக்கிறது. தமிழ்த்தாய் வாழ்த்து பாடவேண்டும் என முதலில் அரசாணை வெளியிட்டவர் முன்னாள் முதலமைச்சர் கலைஞர். அதனைக் கட்டாயம் பாட வேண்டும் என 2021 டிசம்பர் 17-இல் அரசாணை வெளியிட்டார் மு.க.ஸ்டாலின். ஆனால், தமிழ்த்தாய் வாழ்த்துப் பாடலை இயற்றியவரின் பெயரில் உள்ள பல்கலைக்கழகத்திலேயே அது 3-ஆம் இடத்திற்குத் தள்ளப்பட்டது. அடிக்கடி மாறுபடும் இந்தச் சூழலை நிரந்தரமாக மாற்றிட இதனை உடனடியாகச் சட்டமாக மாற்ற வேண்டும்,” என்று அவர் வலியுறுத்தினார்.

தமிழ்த்தாய் வாழ்த்து முதலில் பாடப்பட வேண்டும் என்ற தீர்மானத்துக்கு அதிமுகவும் தனது ஆதரவைத் தெரிவித்துள்ளது. இது தொடர்பாக எதிர்க்கட்சித் தலைவர் எடப்பாடி பழனிசாமி பேசுகையில், “தமிழ்த்தாய் வாழ்த்து என்பது வெறும் பாடல் அல்ல..! அது நம் தமிழ்ப் பண்பாட்டின் அடையாளம். தமிழ்த்தாய் வாழ்த்து பாடப்படுவது யாருக்கும் எதிரானது அல்ல; தேசப்பற்றும் மொழிப்பற்றும் எப்போதுமே வேறு வேறானது அல்ல. அரசியலில் நமக்குள் எத்தனையோ கருத்து வேறுபாடுகள் இருக்கலாம்… ஆனால் தமிழ் என்று வரும்போது நாம் அனைவரும் ஒரே குரலில்தான் ஒலிக்க வேண்டும்,” என்று அவர் உறுதியாகக் கூறினார்.

தொடர்ந்து முதலமைச்சர் விஜய் முன்மொழிந்த இந்தத் தனித்தீர்மானத்திற்கு காங்கிரஸ், பாமக, விசிக, இந்திய கம்யூனிஸ்ட், பாஜக, இந்திய யூனியன் முஸ்லிம் லீக் உள்ளிட்ட அனைத்துக் கட்சிகளும் ஒருசேர ஆதரவு தெரிவித்தன. இதையடுத்து, இந்தத் தனித்தீர்மானம் அனைத்துக் கட்சி உறுப்பினர்களின் முழுமையான ஆதரவுடன் குரல் வாக்கெடுப்பு மூலம் ஒருமனதாக நிறைவேற்றப்பட்டதாகப் பேரவைத் தலைவர் ஜே.சி.டி.பிரபாகர் அதிகாரபூர்வமாக அறிவித்தார்.

தமிழ்த்தாய் வாழ்த்துப் பாடல் தமிழ்நாட்டின் அனைத்து நிகழ்ச்சிகளிலும் நிகழ்வு தொடங்குவதற்கு முன் கட்டாயம் முதலில் பாடப்படவேண்டும் என்ற அரசினர் தனித்தீர்மானத்தை தமிழ்நாடு சட்டமன்றப் பேரவையில் அனைத்துக் கட்சிகளும் ஒருமனதாக நிறைவேற்றித் தந்தமைக்காக நன்றி தெரிவித்துத் தமிழ்நாடு முதலமைச்சர் விஜய் நெகிழ்ச்சியான பதிவு ஒன்றினை வெளியிட்டுள்ளார்.

அதில், “தமிழ் ஒரு மொழி மட்டுமன்று, அது ஒரு சிந்தனை, பண்பாடு, நாகரிகம். அதோடு தமிழ் நம் உயிர்; தமிழ் நம் உணர்வு என்பதை முழுமையாக உணர்ந்ததே நமது தமிழ்நாடு அரசு. மேலும், தமிழ் மொழியின் தொன்மை, தனித்தன்மை, பெருமை, சிறப்பு மற்றும் தமிழர்களின் உணர்வைப் போற்றிப் பாதுகாக்கும் வகையிலான இந்த வரலாற்றுச் சிறப்புமிக்க தீர்மானம், தமிழ்த்தாய்க்குச் செலுத்தப்படும் உயரிய மரியாதையாகும். இத்தீர்மானம் நிறைவேற்றிய இந்நன்னாள் தமிழ்நாட்டின் வரலாற்றில் என்றும் நீங்காது நிலைத்திருக்கும். இந்தத் தீர்மானத்தை அனைத்துக் கட்சிகளும் ஒருமனதாக ஆதரித்து நிறைவேற்றித் தந்தமைக்காக என்னுடைய மனமார்ந்த நன்றியைத் தெரிவித்துக்கொள்கிறேன். உலகெங்கும் தமிழ்த்தாயின் புகழ் ஓங்கட்டும்! தமிழ்நாட்டின் வெற்றிப் பயணம் தொடரட்டும்!” என்று தெரிவித்துள்ளார்.

#TamilThaiVaazhthu #ChiefMinisterVijay #ThalapathyVijay #TNAssembly #TVKGovernment #TamilLanguage #TamilNaduNews #EdappadiPalaniswami #DMK #AIADMK #ViralNewsTN #TrendingTN #LatestNewsTN #TNNewsUpdates #Chennai