சென்னை
கால்நடை மருத்துவப் படிப்புகளுக்கான மாணவர் சேர்க்கைக்கு ‘நீட்’ (NEET) தேர்வை அறிமுகப்படுத்துவது தமிழக மாணவர்களுக்குப் பெரும் பாதிப்பை ஏற்படுத்தும் என்பதால், இந்த முடிவை உடனடியாகக் கைவிடக் கோரிப் பிரதமர் நரேந்திர மோடிக்குத் தமிழ்நாடு முதலமைச்சர் ஜோசப் விஜய் மிக முக்கியமான கடிதம் ஒன்றை எழுதியுள்ளார்.
இந்தியக் கால்நடை மருத்துவ கவுன்சில் (VCI), 2026-27 ஆம் கல்வியாண்டு முதல் அனைத்து கால்நடை மருத்துவக் கல்லூரிகளிலும் பொது நுழைவுத் தேர்வு அல்லது நீட் தேர்வு தரவரிசை அடிப்படையில் மையப்படுத்தப்பட்ட கலந்தாய்வு நடத்தி மாணவர் சேர்க்கை நடத்த வேண்டும் என மாநிலங்களுக்கு அறிவுறுத்தியுள்ளது. இதற்கு முதலமைச்சர் விஜய் தனது கடிதத்தில் கடும் எதிர்ப்புத் தெரிவித்துள்ளார். “கால்நடை மருத்துவக் கல்வி என்பது வெறும் படிப்பு மட்டுமல்ல; மாநிலத்தின் பால்வள மேம்பாடு, கால்நடைப் பராமரிப்பு மற்றும் லட்சக்கணக்கான கிராமப்புற மக்களின் வாழ்வாதாரத்தைக் காக்கும் அடித்தளமாகும்” என அவர் சுட்டிக்காட்டியுள்ளார்.
“தமிழ்நாட்டில் பல தசாப்தங்களாக 12-ம் வகுப்பு மதிப்பெண் அடிப்படையிலேயே தொழிற்கல்விக்கான மாணவர் சேர்க்கை நடைபெற்று வருகிறது. கடந்த 2007-08 ஆம் ஆண்டிலேயே பொது நுழைவுத் தேர்வுகள் ரத்து செய்யப்பட்டுவிட்டன. நீட் போன்ற நுழைவுத் தேர்வுகள் கிராமப்புற மற்றும் பின்தங்கிய மாணவர்களுக்குப் பெரும் தடையாக உள்ளன. தேசிய தேர்வுகள் முகமை (NTA) ஏற்கனவே நீட் தேர்வை நடத்துவதில் பல்வேறு குளறுபடிகளைச் சந்தித்து வரும் நிலையில், கால்நடைப் படிப்பிற்கும் இதனை விரிவுபடுத்துவது கொஞ்சமும் பொருத்தமற்றது. நுழைவுத் தேர்வுகள் என்பது மாணவர்களின் தகுதியை அளவிடுவதை விட, சிறப்புப் பயிற்சி வகுப்புகளுக்குச் செல்வோர் மற்றும் வசதி படைத்தோருக்கு மட்டுமே சாதகமாக அமையும்” என முதலமைச்சர் திட்டவட்டமாகக் குறிப்பிட்டுள்ளார்.
“கால்நடை மருத்துவர்களுக்கான தேவை ஒவ்வொரு மாநிலத்தின் வேளாண் மற்றும் கிராமப்புறப் பொருளாதாரத்தைப் பொறுத்து மாறுபடும். எனவே, நமது கூட்டாட்சித் தத்துவத்தை மதிக்கும் வகையில், மாணவர் சேர்க்கைக்கான முடிவை அந்தந்த மாநில அரசுகளிடமே விட்டுவிடுவதுதான் மிகவும் சரியான நடவடிக்கையாக இருக்கும். இந்த விவகாரத்தில் பிரதமர் மோடி உடனடியாகத் தலையிட்டு, இந்தியக் கால்நடை மருத்துவ கவுன்சிலின் முடிவை மறுபரிசீலனை செய்ய அறிவுறுத்த வேண்டும்” என முதலமைச்சர் விஜய் தனது கடிதத்தில் ஆணித்தரமாக வலியுறுத்தியுள்ளார்.
#ThalapathyVijay #ChiefMinisterVijay #TVKGovernment #NEET #BanNEET #VeterinaryScience #PMModi #TamilNaduNews #Chennai #TNPolitics #ViralNews #LatestNewsTN #TrendingTN #TamilNews #StudentsWelfare
