பொலிஸ் மா அதிபர் (IGP) மற்றும் தலைமை நீதிபதி ஆகியோரின் உத்தியோகபூர்வ இல்லங்களைச் சுற்றியுள்ள வீதிகளைத் தனது கைப்பேசியில் வீடியோ பதிவு செய்த குற்றச்சாட்டின் பேரில் 40 வயதுடைய நபர் ஒருவர் கறுவாத்தோட்டம் பொலிஸாரால் கைது செய்யப்பட்டுள்ளார்.
வியாழக்கிழமை (06) இரவில் இடம்பெற்ற இக்கைது நடவடிக்கையின் போது, சந்தேகநபரின் கைப்பேசியும் பொலிஸாரால் பறிமுதல் செய்யப்பட்டுள்ளது. பொலிஸ் மா அதிபரின் உத்தியோகபூர்வ இல்லத்தின் பிரதான நுழைவாயிலில் கடமையில் ஈடுபட்டிருந்த விசேட அதிரடிப்படை (STF) அதிகாரி ஒருவர், அங்கு அருகில் நிறுத்தப்பட்டிருந்த சொகுசு வாகனம் ஒன்றின் சாரதி தனது கைப்பேசியில் வீதிப் பகுதியைப் படம்பிடித்துக் கொண்டிருப்பதைக் கவனித்துள்ளார்.
இதனையடுத்து அந்த அதிகாரி அப்பகுதியில் கடமையில் இருந்த போக்குவரத்துப் பொலிஸ் உத்தியோகநிலருக்குத் தகவல் அளித்து, கொழும்பு அவசர பதிலளிப்புப் பிரிவையும் உஷார்படுத்தியுள்ளார். உடனடியாக அவ்விடத்திற்கு விரைந்த கறுவாத்தோட்டம் பொலிஸ் நிலையத்தின் நடமாடும் ரோந்துப் பிரிவினர், ஆரம்ப கட்ட விசாரணைகளை அடுத்து சந்தேகநபரைத் தடுத்து வைத்து கைது செய்தனர்.
சந்தேகநபரின் கைப்பேசியைச் பரிசோதித்த போது, பொலிஸ் மா அதிபர் மற்றும் தலைமை நீதிபதி ஆகிய இருவரின் உத்தியோகபூர்வ இல்லங்கள் மற்றும் அதனைச் சுற்றியுள்ள வீதிகள் அடங்கிய வீடியோ காட்சிகள் அதில் பதிவாகியிருப்பது கண்டறியப்பட்டது.
விசாரணையின் போது, தான் பொழுதுபோக்கிற்காகவே இந்த வீடியோக்களைப் பதிவு செய்ததாகச் சந்தேகநபர் தெரிவித்த போதிலும், அவரது வசிப்பிடம் மற்றும் ஏனைய விபரங்கள் தொடர்பில் அவர் முன்னுக்குப் பின் முரணான தகவல்களை வழங்கியதாகப் பொலிஸார் தெரிவித்தனர். இச்சம்பவம் குறித்து மேலதிக விசாரணைகள் தீவிரமாக முன்னெடுக்கப்பட்டு வருகின்றன.
