சென்னை:

தமிழ்நாட்டின் கனிம வளங்கள் பிற மாநிலங்களுக்குக் கடத்தப்படுவதைத் தடுக்கும் தமிழ்நாடு அரசு, கர்நாடகாவின் தேவைக்காகத் தமிழ்நாட்டின் விவசாய நிலங்கள் அழிக்கப்படுவதை அனுமதிப்பது ஏன் எனத் தமிழக வாழ்வுரிமைக் கட்சித் தலைவர் வேல்முருகன் ஆவேசமாகக் கேள்வி எழுப்பியுள்ளார். இது தொடர்பாக அவர் வெளியிட்டுள்ள அறிக்கையில், தமிழ்நாட்டின் உரிமையான காவிரி நீரைக் கூட திறக்க மறுக்கும் கர்நாடக அரசுக்கு, வளமான விவசாய நிலங்களை அழித்து எண்ணெய் குழாய் அமைத்துக் கொடுக்கும் அநீதியைத் தமிழக வாழ்வுரிமைக் கட்சி வன்மையாகக் கண்டிப்பதாகத் தெரிவித்துள்ளார்.

பாரத் பெட்ரோலியம் நிறுவனம் கோவை மாவட்டம் இருகூரில் இருந்து கர்நாடக மாநிலம் தேவனகுந்தி வரை எண்ணெய் குழாய் பதிக்கும் திட்டத்தைச் செயல்படுத்தி வருகிறது. இதில் முத்தூரில் இருந்து கர்நாடக எல்லை வரை நெடுஞ்சாலை ஓரமாகக் குழாய்கள் பதிக்கப்படுகின்றன. ஆனால், இருகூரில் இருந்து முத்தூர் வரையிலான சுமார் 70 கிலோமீட்டர் தொலைவுக்கு மட்டும் விவசாயிகளின் கடும் எதிர்ப்பையும் மீறி, விளைநிலங்களைத் தோண்டிக் குழாய் பதிக்கும் நடவடிக்கை மேற்கொள்ளப்படுவது ஏற்றுக்கொள்ள முடியாத அநீதி என்று அவர் சாடியுள்ளார். நெடுஞ்சாலை வழியாகக் கொண்டு செல்ல முடியும் என்றால், விவசாய நிலங்களை ஏன் சிதைக்க வேண்டும் என்றும், கர்நாடகாவுக்கு எண்ணெய் கொண்டு செல்ல தமிழனின் வயல்தான் பாதையா? என்றும் அவர் சரமாரியாகக் கேள்வி எழுப்பியுள்ளார்.

நாளை எண்ணெய் குழாயில் கசிவு ஏற்பட்டால், அந்த நிறுவனம் இழப்பீடு கொடுக்கலாம்; ஆனால் நஞ்சான மண்ணையும், மாசடைந்த நிலத்தடி நீரையும் மீண்டும் உயிர்ப்பிக்க முடியுமா? பல தலைமுறைகள் உழைத்து உருவாக்கிய விளைநிலத்தை மீண்டும் உருவாக்க முடியுமா? என்று வேல்முருகன் தமது ஆதங்கத்தை வெளிப்படுத்தியுள்ளார். எனவே, தமிழ்நாடு அரசு கனிம வளங்களைப் பாதுகாக்க எடுத்துள்ள கொள்கையைப் போலவே, பிற மாநிலங்களின் திட்டங்களுக்காகத் தமிழ்நாட்டின் விவசாய நிலங்களைக் கையகப்படுத்தவோ, சேதப்படுத்தவோ கூடாது என்ற தெளிவான கொள்கை முடிவை உடனடியாக அறிவிக்க வேண்டும் என்றும், பாரத் பெட்ரோலியம் நிறுவனம் விவசாய நிலங்கள் வழியாக மேற்கொள்ளும் பணிகளை உடனடியாக நிறுத்திவிட்டு நெடுஞ்சாலை வழியாகவே செயல்படுத்த அரசு உத்தரவிட வேண்டும் என்றும் அவர் ஆணித்தரமாக வலியுறுத்தியுள்ளார்.

#Velmurugan #FarmersIssue #BPCL #TamilagaVazhvurimaiKatchi #Coimbatore #BmNews #TamilNews #BreakingNewsTN #AgricultureLand #TamilNaduPolitics #PoliticalUpdate #TamilNewsLive