டொராண்டோவின் ஈஸ்ட் யார்க் (East York) பகுதியில், 12 வயது சிறுவன் ஒருவன் தான் ஓட்டிச் சென்ற திருடப்பட்ட வாகனத்தால் பொலிஸ் அதிகாரி ஒருவரை மோதியதாகக் கூறப்படும் சம்பவத்தில், அவர் மீது கொலை முயற்சி வழக்கு பதிவு செய்யப்பட்டுள்ளது. இச்சம்பவம் குறித்து சிறப்பு புலனாய்வுப் பிரிவு (SIU) தனது விசாரணையைத் தொடங்கியுள்ளது.

மத்திய இரவு 1 மணியளவில், வாகனம் திருடப்பட்டதாகக் கிடைத்த தகவலின் பேரில் பொலிஸார் டான்லண்ட்ஸ் (Donlands) மற்றும் ஓ’கானர் டிரைவ் (O’Connor Drive) பகுதிக்கு விரைந்தனர்.

சிறப்பு புலனாய்வுப் பிரிவின் (SIU) ஊடகப் பேச்சாளர் செய்தியாளர்களிடம் தெரிவிக்கையில், லீசைட் பாலத்தில் (Leaside Bridge) வைத்து இரண்டு பொலிஸ் ரோந்து வாகனங்கள் அச்சிறுவனின் வாகனத்தை வழிமறிக்க முயன்றதாகக் குறிப்பிட்டார். அப்போது அந்த வாகனத்தை ஓட்டிய சிறுவன் அங்கிருந்து தப்பியோட முயன்றபோது, தனது வாகனத்திற்கு வெளியே நின்றுகொண்டிருந்த பொலிஸ் அதிகாரி ஒருவர் மீது மோதியுள்ளார்.

வாகனத்தை நிறுத்துவதற்காக பொலிஸ் அதிகாரி ஒருவர் “பலமுறை” துப்பாக்கிச் சூடு நடத்தியுள்ளார். அந்த வாகனத்தில் மேலும் ஒரு 12 வயது சிறுவனும், ஒரு 13 வயது சிறுவனும் இருந்துள்ளனர். அதிகாரி மீது வாகனம் மோதுவதற்கு முன்னரா அல்லது பின்னரா துப்பாக்கிச் சூடு நடத்தப்பட்டது என்பதை SIU அதிகாரிகளால் உடனடியாக உறுதிப்படுத்த முடியவில்லை.

இதனையடுத்து, குற்றஞ்சாட்டப்பட்ட 12 வயது சிறுவன் டான்லண்ட்ஸ் மற்றும் ஃபிராய்ட் அவென்யூ (Floyd Avenue) பகுதியில் வாகனத்தைக் கைவிட்டுவிட்டு தப்பியோடியுள்ளார். பின்னர் டான்லண்ட்ஸ் மற்றும் மார்டிமர் அவென்யூ (Mortimer avenues) பகுதியில் வைத்து பொலிஸாரால் அவர் மடக்கிப் பிடிக்கப்பட்டார். அச்சிறுவன் பலத்த காயங்களுடன் மருத்துவமனைக்கு கொண்டு செல்லப்பட்டுள்ளார், எனினும் அவரது உயிருக்கு ஆபத்து இல்லை என SIU தெரிவித்துள்ளது. அவர் மீது துப்பாக்கிச் சூடு பட்டதா என்பது இன்னும் தெளிவாகத் தெரியவில்லை.

“சிறுவனின் காயங்களுக்கான துல்லியமான காரணம் இன்னும் உறுதிப்படுத்தப்படவில்லை. அது துப்பாக்கிக் குண்டினால் ஏற்பட்ட காயமாகவோ, உராய்வாகவோ அல்லது வாகனத்தின் உடைந்த கண்ணாடியால் ஏற்பட்ட காயமாகவோ இருக்கலாம். தற்போதைய நிலையில் உயிருக்கு ஆபத்தில்லாத காயங்கள் மட்டுமே ஏற்பட்டுள்ளன என்பது உறுதியாகத் தெரியும்,” என SIU பேச்சாளர் கிறிஸ்டி டெனெட் (Kristy Denette) தெரிவித்தார்.

வாகனம் மோதியதில் காயமடைந்த பொலிஸ் அதிகாரி பலத்த காயங்களுடன் மருத்துவமனையில் அனுமதிக்கப்பட்டிருந்தாலும், தற்போது அவர் சிகிச்சை முடிந்து வீடு திரும்பியுள்ளார் என்று பொலிஸார் தெரிவித்தனர்.

வாகனத்தில் இருந்த மற்றுமொரு நபர் இன்னும் தலைமறைவாக உள்ளதாக கிறிஸ்டி டெனெட் மேலும் கூறினார். வாகனத்தை நிறுத்தும் முயற்சியில் குண்டுகள் வாகனத்தின் மீது பாய்ந்துள்ளன, எனினும் எத்தனை முறை சுடப்பட்டது என்பது தெளிவாகத் தெரியவில்லை.

இளம்பிராய குற்றவியல் நீதிச் சட்டத்தின் (Youth Criminal Justice Act) கீழ் அச்சிறுவனின் பெயர் விபரங்களை வெளியிட முடியாது. கொலை முயற்சி தவிர, மோட்டார் வாகனத் திருட்டு, $5,000 க்கும் அதிக மதிப்புள்ள சொத்துக்களை கைவசம் வைத்திருந்தமை, அபாயகரமாக வாகனத்தை ஓட்டியமை, பொலிஸாரின் கட்டளைக்கு இணங்கி வாகனத்தை நிறுத்தத் தவறியமை, அமைதிப் பாதுகாப்பு அதிகாரியைத் தாக்கியமை மற்றும் விபத்து நடந்த இடத்திலிருந்து தப்பியோடியமை ஆகிய குற்றச்சாட்டுகளும் அச்சிறுவன் மீது சுமத்தப்பட்டுள்ளன.

பொலிஸாரின் தலையீட்டினால் மரணம், பலத்த காயம், பாலியல் வன்கொடுமை குற்றச்சாட்டுகள் அல்லது நபர் ஒருவர் மீது துப்பாக்கிச் சூடு நடத்தப்படும் சம்பவங்கள் நிகழும்போது, அது குறித்து சுயாதீனமாக விசாரிக்கும் ஒரு அமைப்பே இந்த சிறப்பு புலனாய்வுப் பிரிவு (SIU) ஆகும்.