சென்னை:
பெட்ரோல், டீசல் மற்றும் சிஎன்ஜி விலையை மத்திய அரசு உயர்த்தியிருப்பதற்குத் தமிழக சட்டமன்ற எதிர்க்கட்சித் தலைவர் உதயநிதி ஸ்டாலின் கடும் கண்டனம் தெரிவித்துள்ளார். “மத்திய அரசு தனது தோல்விகளை மறைக்கவே இத்தகைய மக்கள் விரோத நடவடிக்கைகளில் ஈடுபடுகிறது” என்று அவர் குற்றம்சாட்டியுள்ளார்.
மத்திய கிழக்கில் நிலவி வரும் போர் சூழலால் கச்சா எண்ணெய் விலை உயர்ந்த போதும், 5 மாநிலத் தேர்தலைக் கருத்தில் கொண்டு மத்திய அரசு விலையை உயர்த்தாமல் இருந்தது. தற்போது தேர்தல் முடிவுகள் வெளியான நிலையில், நாடு முழுவதும் எரிபொருள் விலை அதிரடியாக உயர்த்தப்பட்டுள்ளது. அதன்படி, சென்னையில் பெட்ரோல் லிட்டருக்கு 3.14 ரூபாயும், டீசல் லிட்டருக்கு 3.11 ரூபாயும் உயர்த்தப்பட்டு, ஒரு லிட்டர் பெட்ரோல் 103.98 ரூபாய்க்கும், டீசல் 95.50 ரூபாய்க்கும் விற்பனை செய்யப்படுகிறது.
இந்த விலை உயர்வு குறித்துத் தனது எக்ஸ் (X) பக்கத்தில் பதிவிட்டுள்ள உதயநிதி ஸ்டாலின், “ஏழை, எளிய, நடுத்தர வர்க்க மக்களைக் கடுமையாகப் பாதிக்கும் வகையில் பெட்ரோல், டீசல், சிஎன்ஜி விலையை ஒன்றிய அரசு உயர்த்தியிருப்பதை வன்மையாகக் கண்டிக்கிறோம். மக்களின் வாழ்வாதாரத்தைக் கேள்விக்குறியாக்கிவிட்டு, ‘பொறுத்துக் கொள்ளுங்கள், அதைச் செய்யாதீர்கள், இதைச் செய்யாதீர்கள்’ என்று ஒன்றிய அரசு அறிவுரை கூறுவது, தனது தோல்வியை மறைக்கும் முயற்சியே ஆகும். மக்கள் மீது சுமத்தப்பட்டுள்ள இந்த பாரத்தைக் குறைக்க உடனடியாக நடவடிக்கை எடுக்க வேண்டும்” என வலியுறுத்தியுள்ளார். உதயநிதியின் இந்த அதிரடிப் பதிவு திமுக மற்றும் எதிர்க்கட்சித் தரப்பினரால் இணையத்தில் வைரலாக்கப்பட்டு வருகிறது.
#UdhayanidhiStalin #OppositionLeader #FuelPriceHike #PetrolPrice #DieselPrice #CNG_PriceRise #BreakingNews #May16 #CentralGovernment #CommonManBurden #Inflation #TamilNaduPolitics #DMK_Official #PeopleVoice #PriceHikeControversy #TNAssembly #TamilNews #StalinVsModi #FuelTax #EconomicCrisis_
