ஏப்ரல் 30, 2026 | இரவு 10:17 மணி
சுமார் 2.5 மில்லியன் அமெரிக்க டொலர் சைபர் கொள்ளை சம்பவம் தொடர்பாக பணி இடைநிறுத்தம் செய்யப்பட்டிருந்த நிதி அமைச்சின் வெளிநாட்டு வளங்கள் திணைக்களத்தின் உதவிப் பணிப்பாளர் ரங்க ராஜபக்ஷ, இன்று (30) மாலை குளியாப்பிட்டியவில் உள்ள அவரது இல்லத்தில் சந்தேகத்திற்கிடமான முறையில் உயிரிழந்த நிலையில் மீட்கப்பட்டுள்ளார்.
ராஜபக்ஷ உயிரிழந்து கிடப்பதாக இன்று மதியம் தகவல் கிடைத்ததாக குளியாப்பிட்டிய பொலிஸார் தெரிவித்தனர். பொலிஸாரின் கூற்றுப்படி, ராஜபக்ஷ தோட்டத்தில் விழுந்து கிடப்பதைக் கண்ட அவரது மகள், தாய்க்குத் தெரியப்படுத்தியுள்ளார். அதன் பின்னரே அதிகாரிகளுக்குத் தகவல் வழங்கப்பட்டுள்ளது.
சம்பவ இடத்திற்குச் சென்ற அதிகாரிகள், அவரது தோட்டத்திலிருந்த வாழை மரத்திற்கு அருகில் பெரிய அளவிலான இரத்தக் கறைகளைக் கண்டறிந்துள்ளனர். ராஜபக்ஷவின் ஒரு காலில் மூன்று வெட்டுக் காயங்களும், கையில் ஒரு காயமும் காணப்பட்டதோடு, உடலுக்கு அருகில் இருந்து சிறிய கத்தி ஒன்றும் மீட்கப்பட்டதாக பொலிஸார் குறிப்பிட்டனர்.
இது ஒரு கொலையா, தற்கொலையா அல்லது விபத்தா என்பதைக் கண்டறியும் நோக்கில், இதனை ஒரு சந்தேகத்திற்கிடமான மரணமாகக் கருதி பொலிஸார் விசாரணைகளை ஆரம்பித்துள்ளனர். குளியாப்பிட்டிய நீதவான் சம்பவ இடத்திற்கு வருகை தந்து முதற்கட்ட விசாரணைகளை முன்னெடுத்தார்.
நிதி அமைச்சுக்குச் சொந்தமான 2.5 மில்லியன் அமெரிக்க டொலர் சைபர் மோசடி தொடர்பான விசாரணைக்காக ரங்க ராஜபக்ஷ மூன்று சந்தர்ப்பங்களில் குற்றப் புலனாய்வுத் திணைக்களத்திற்கு (CID) அழைக்கப்பட்டிருந்தார். சேவையில் இருந்தபோது ஒரு முறையும், பணி இடைநீக்கம் செய்யப்பட்ட பின்னர் இரண்டு முறையும் அவர் அழைக்கப்பட்டுள்ளார்.
விசாரணைகளுக்கு அவர் முழுமையான ஒத்துழைப்பு வழங்கியதோடு, அவரது கணினியும் குற்றப் புலனாய்வுத் திணைக்களத்தால் பொறுப்பேற்கப்பட்டிருந்தது. மோசடி மின்னஞ்சல் மூலம் ஹேக்கர்களால் வழங்கப்பட்ட வங்கிக் கணக்கிற்கு நிதி மாற்றப்பட்டமைக்கு, அவரது கவனக்குறைவே ஆரம்பக்கட்டக் காரணம் என ஆரம்ப புலனாய்வுகளில் தெரியவந்துள்ளது. ஹேக்கர்கள் அனுப்பிய அந்த மின்னஞ்சலுக்கு இவரே பதிலளித்த அதிகாரியாவார்.
அவருக்கு எதிராக வெளிநாட்டுப் பயணத்தடையும் விதிக்கப்பட்டிருந்தது. முன்னதாக அவர் மீது ஊழல் குற்றச்சாட்டுகள் எதுவும் இல்லை என்பதும், அவரை கைது செய்வதற்குப் போதுமான ஆதாரங்கள் இல்லை என்பதும் ஆரம்பக்கட்ட விசாரணைகளில் தெரியவந்துள்ளது. எவ்வாறாயினும், பணி இடைநீக்கம் செய்யப்பட்ட பின்னர் அவர் கடும் மன உளைச்சலில் இருந்ததாகக் கூறப்படுகிறது.
இந்த அதிகாரியின் மரணமானது, சைபர் கொள்ளை தொடர்பான தற்போதைய விசாரணைகளுக்குப் பின்னடைவை ஏற்படுத்தியுள்ளதாக சிரேஷ்ட பொலிஸ் அதிகாரி ஒருவர் தெரிவித்தார்.
