ஏர் கனடா நிறுவனத்தின் தலைவரும் தலைமைச் செயல் அதிகாரியுமான (CEO) மைக்கேல் ரூசோ, சுமார் இரண்டு தசாப்த கால பணிக்குப் பிறகு இந்த இலையுதிர்காலத்தில் பணி ஓய்வு பெறவுள்ளதாக அந்த நிறுவனம் திங்களன்று அறிவித்துள்ளது. நியூயார்க்கில் நடந்த 8646 விமான விபத்தில் உயிரிழந்தவர்களுக்கு ஆங்கிலத்தில் மட்டும் இரங்கல் செய்தி வெளியிட்டு சர்ச்சையில் சிக்கிய ஒரு வாரத்திற்குப் பிறகு இந்த அறிவிப்பு வந்துள்ளது.

” ரூசோ தனது இயற்கையான பணி ஓய்வு வயதை எட்டியுள்ளார். இது CEO அடுத்தடுத்த நிர்வாகத் திட்டமிடல் குறித்த வாரியத்தின் நீண்டகால நோக்கத்திற்கு இணங்க உள்ளது,” என்று ஏர் கனடா செய்தித் தொடர்பாளர் தெரிவித்தார்.

ரூசோ தனது ஊழியர்களுக்கு அனுப்பிய குறிப்பில், தான் இந்த நிறுவனத்தின் அடையாளத்தை இதயத்தில் சுமந்திருப்பதில் பெருமிதம் கொள்வதாகவும், ஆனால் இப்போது ஓய்வு பெற வேண்டிய நேரம் வந்துவிட்டது என்றும் குறிப்பிட்டுள்ளார். அவர் மூன்றாவது காலாண்டின் இறுதி வரை நிறுவனத்தை வழிநடத்தி, அதன் இயக்குனர் குழுவில் பணியாற்றுவார்.

மார்ச் 22 அன்று மாண்ட்ரியலில் இருந்து புறப்பட்ட ஏர் கனடா 8646 விமானம், நியூயார்க் லாகுவார்டியா (LaGuardia) விமான நிலையத்தில் தரையிறங்கும் போது ஒரு தீயணைப்பு வாகனத்துடன் மோதியது. இதில் விமானிகள் மெக்கென்சி குந்தர் மற்றும் கேப்டன் அன்டோயின் ஃபாரஸ்ட் ஆகிய இருவர் உயிரிழந்தனர், மேலும் பலர் காயமடைந்தனர்.

அடுத்த நாள் வெளியிட்ட வீடியோவில் ரூசோ இரங்கல் தெரிவித்தார். ஆனால், “Bonjour” மற்றும் “Merci” ஆகிய சொற்களைத் தவிர, மற்ற செய்திகள் முழுவதும் ஆங்கிலத்திலேயே இருந்தன. உயிரிழந்த விமானிகளில் ஒருவரான ஃபாரஸ்ட், கியூபெக்கின் கோட்டோ-டு-லாக் பகுதியைச் சேர்ந்த பிரெஞ்சு மொழி பேசுபவர் (Francophone). ஏர் கனடாவின் தலைமையகம் மாண்ட்ரியலில் உள்ளது மற்றும் கனடாவின் இரண்டு அதிகாரப்பூர்வ மொழிகளிலும் (ஆங்கிலம் மற்றும் பிரெஞ்சு) தொடர்புகொள்வது அந்நிறுவன கொள்கையின்படி அவசியமாகும்.

இந்த விவகாரம் கனடிய அரசியலில் பெரும் புயலைக் கிளப்பியது. பிரதமர் மார்க் கார்னி (Mark Carney), ரூசோவின் செயல் “நிதானமின்மை” மற்றும் “இரக்கமற்ற தன்மையை” காட்டுவதாகக் கூறினார். கியூபெக் மாகாண முதல்வர் பிரான்சுவா லெகால்ட் (François Legault), ரூசோ உடனடியாகப் பதவி விலக வேண்டும் என்று கோரினார்.

ரூசோ கடந்த வியாழக்கிழமை மன்னிப்பு கேட்டார். பல ஆண்டுகளாகப் பாடம் கற்றும், தன்னால் பிரெஞ்சு மொழியில் போதுமான அளவு கருத்துக்களைத் தெரிவிக்க முடியவில்லை என்று அவர் கூறியது, பலரிடையே மேலும் அதிருப்தியையே ஏற்படுத்தியது.

பிரதமர் கார்னி செய்தியாளர்களிடம் கூறுகையில், ரூசோவின் பணி ஓய்வு “பொருத்தமானது” என்று குறிப்பிட்டார். “ஏர் கனடாவின் அடுத்த தலைமைச் செயல் அதிகாரி கட்டாயம் இருமொழி தெரிந்தவராக (Bilingual) இருக்க வேண்டும் என்பது அவசியமானது” என்று அவர் வலியுறுத்தினார்.

கியூபெக் முதல்வர் லெகால்ட் தனது ‘X’ தளத்தில், ஊழியர்கள் மற்றும் வாடிக்கையாளர்களுக்கு மரியாதை அளிக்கும் வகையில் அடுத்த CEO பிரெஞ்சு மொழி பேசுபவராக இருக்க வேண்டும் எனத் தெரிவித்தார்.

ஏற்கனவே 2021-ஆம் ஆண்டிலும், மொன்ட்ரியலில் 14 ஆண்டுகள் வாழ்ந்தும் தமக்கு பிரெஞ்சு பேசத் தெரியாது என்று ரூசோ கூறியபோது கடும் விமர்சனங்கள் எழுந்தன. தற்போது ஏற்பட்டுள்ள அரசியல் அழுத்தம், அவரை இந்த முடிவை விரைவாக எடுக்கத் தூண்டியுள்ளதாக விமான போக்குவரத்து நிபுணர்கள் கருதுகின்றனர்.