நாசாவின் வரலாற்றுச் சிறப்புமிக்க ‘அர்ட்டெமிஸ்’ (Artemis) திட்டத்தின் கீழ் நிலவுக்குச் செல்லவுள்ள விண்வெளி வீரர்கள், தங்களது பயணத்திற்கான இறுதிக்கட்டப் பயிற்சிகளில் ஈடுபட்டு வருவதாக ரொய்ட்டர்ஸ் செய்தி வெளியிட்டுள்ளது.
பல தசாப்தங்களுக்குப் பிறகு மனிதர்களை மீண்டும் நிலவின் மேற்பரப்பிற்கு அழைத்துச் செல்லும் இந்தத் திட்டம், விண்வெளி ஆராய்ச்சியில் ஒரு புதிய மைல்கல்லாகக் கருதப்படுகிறது.
தற்போது தேர்ந்தெடுக்கப்பட்டுள்ள விண்வெளி வீரர்கள், நிலவின் தென் துருவத்தில் தரையிறங்குவதற்கும், அங்குள்ள கடினமான சூழலைச் சமாளிப்பதற்கும் தேவையான நவீன தொழில்நுட்பப் பயிற்சிகளை மேற்கொண்டு வருகின்றனர்.
ஒரியன் (Orion) விண்கலம் மற்றும் விண்வெளி உடைகளின் செயல்பாடுகளைச் சரிபார்க்கும் சோதனைகளும் வெற்றிகரமாக முன்னெடுக்கப்பட்டுள்ளன.
உலகெங்கும் போர் மற்றும் பொருளாதார நெருக்கடிகள் நிலவி வரும் சூழலிலும், மனிதகுலத்தின் அறிவியல் வளர்ச்சியைப் பறைசாற்றும் வகையில் இந்த நிலவுப் பயணம் திட்டமிடப்பட்டுள்ளது.
நிலவில் நிரந்தரமான தளம் ஒன்றை அமைப்பதற்கும், அங்கிருந்து செவ்வாய் கிரகத்திற்கு மனிதர்களை அனுப்பும் எதிர்காலத் திட்டங்களுக்கும் அர்ட்டெமிஸ்’ ஒரு அடித்தளமாக அமையும் என நாசா தெரிவித்துள்ளது.
எதிர்வரும் மாதங்களில் ஏவப்படவுள்ள இந்த விண்கலத்திற்கான தொழில்நுட்பச் சரிபார்ப்புகள் அனைத்தும் புளோரிடாவில் உள்ள கென்னடி விண்வெளி மையத்தில் முழு வீச்சில் நடைபெற்று வருகின்றன.
சர்வதேச விண்வெளி ஆர்வலர்கள் மத்தியில் இந்தத் திட்டம் பெரும் எதிர்பார்ப்பை ஏற்படுத்தியுள்ளது.
