சென்னை:
“தமிழ்நாட்டில் 108 அவசர ஊர்தி சேவை மூலம் கடந்த ஓராண்டில் மட்டும் 3 லட்சத்திற்கும் மேற்பட்ட கர்ப்பிணித் தாய்மார்கள் மற்றும் குழந்தைகளின் உயிர்கள் காப்பாற்றப்பட்டிருப்பது நினைத்து மகிழ்ச்சியும், பெரும் பெருமையும் கொள்கிறேன்” என்று பாமக தலைவர் மருத்துவர் அன்புமணி இராமதாஸ் நெகிழ்ச்சியுடன் தெரிவித்துள்ளார்.
அவர் வெளியிட்டுள்ள அறிக்கையில், “தமிழ்நாட்டில் கடந்த 2025-26ஆம் ஆண்டில் 7.82 லட்சம் மகப்பேறுகள் நிகழ்ந்துள்ளன. அவற்றில் 3 லட்சத்திற்கும் மேற்பட்ட தாய்மார்கள் மிகவும் நெருக்கடியான பிரசவ காலத்தில் 108 அவசர ஊர்தி மூலம் மருத்துவமனைகளுக்கு அழைத்துச் செல்லப்பட்டுள்ளனர் என EMRI Green Health Services நிறுவனம் தெரிவித்துள்ளது. இதில், 1,500-க்கும் மேற்பட்டோருக்கு மருத்துவமனைக்குச் செல்லும் வழியிலேயே, அவசர ஊர்தி ஊழியர்களின் உதவியோடு பிரசவம் நடந்துள்ளது. புள்ளிவிவரங்களின்படி, ஒட்டுமொத்தமாக ஒவ்வோர் ஆண்டும் பிறக்கும் 500 குழந்தைகளில் ஒரு குழந்தை அவசர ஊர்தியிலேயே பிறக்கிறது” எனக் குறிப்பிட்டுள்ளார்.
இந்தத் திட்டத்தின் பின்னணி குறித்துப் பேசிய அவர், “20 ஆண்டுகளுக்கு முன்பு வரை இந்தியாவில் அவசர ஊர்தி என்பது நகர்ப்புற பணக்காரர்களுக்கு மட்டுமான சேவையாக இருந்தது. மத்திய சுகாதார அமைச்சராக நான் பொறுப்பேற்ற பிறகு, 2005-ல் கொண்டு வரப்பட்ட ‘தேசிய ஊரக சுகாதார இயக்கம்’ (NRHM) மூலமே இந்த 108 இலவச அவசர ஊர்தி சேவை ஏழை எளிய மக்களுக்காகத் தொடங்கப்பட்டது. தமிழ்நாட்டில் தாய்மார்கள் மற்றும் குழந்தைகள் இறப்பு விகிதம் பெருமளவு குறைந்திருப்பதற்கு இந்த 108 சேவையின் பங்கு அளப்பரியது. பொது இடங்களில் புகைப்பிடிக்கத் தடை, திரைப்படங்களில் எச்சரிக்கை வாசகம், புகையிலைப் பொருட்களுக்குத் தடை என நான் கொண்டு வந்த திட்டங்கள் வரலாறு உள்ளவரை எனது பணிகளுக்குச் சான்றாக இருக்கும்” என்று கூறியுள்ளார்.
மேலும், “தமிழ்நாட்டில் தற்போது பச்சிளங்குழந்தைகளுக்கான 65 வாகனங்கள் உட்பட மொத்தம் 1,353 அவசரகால ஊர்திகள் மட்டுமே இயக்கப்பட்டு வருகின்றன. இந்த எண்ணிக்கை 2,500 ஆக உயர்த்தப்பட்டால் ஏழை மக்களுக்கு இந்தச் சேவை இன்னும் முழுமையாகக் கிடைக்கும். எனவே, தமிழகத்தை ஆளும் தவெக அரசு 108 அவசர ஊர்திகளின் எண்ணிக்கையை 2,500 ஆக உயர்த்த உடனடியாக நடவடிக்கை எடுக்க வேண்டும்” என அன்புமணி இராமதாஸ் வலியுறுத்தியுள்ளார்.
#AnbumaniRamadoss #PMK_Leader #108Ambulance #SaveLives #BreakingNews #May18 #TamilNaduPolitics #HealthcareIndia #EmergencyMedicalServices #AnbumaniWelfareSchemes #NRHM_Success #InfantMortalityRate #MaternalHealth #ThalapathyVijay #TVK_Government #NewGovernmentTN #AmbulanceCountIncrease #TamilNews #VijayMakkalIyakkam #CM_Vijay_Official_“`
