2026 ஆம் ஆண்டின் முதல் ஆறு மாத காலத்தில் வரி மற்றும் வரி அல்லாத வருமானங்களில் வலுவான வளர்ச்சியடைந்து, அரசாங்கத்தின் வருமானத்தில் கணிசமான அதிகரிப்பு பதிவாகியுள்ளதாக பிரதமர் கலாநிதி ஹரிணி அமரசூரிய பாராளுமன்றத்தில் தெரிவித்தார்.
2025 ஆம் ஆண்டின் முதல் ஆறு மாதங்களில் 2,152.1 பில்லியன் ரூபாவாக இருந்த வரி வருமானம், 2026 ஆம் ஆண்டின் இதே காலப்பகுதியில் 2,710.6 பில்லியன் ரூபாவாக அதிகரித்துள்ளதாக பிரதமர் கூறினார்.
உள்நாட்டு இறைவரித் திணைக்களத்தினால் திரட்டப்பட்ட வருமானம் 2025 இன் முதல் பாதியில் 1,037.9 பில்லியன் ரூபாவாக இருந்த நிலையில், 2026 இன் அதே காலப்பகுதியில் 1,247.6 பில்லியன் ரூபாவாக உயர்ந்துள்ளதாகவும், இது 20.2% வளர்ச்சியைக் காட்டுவதாகவும் அவர் மேலும் சுட்டிக்காட்டினார்.
பிரதமரின் கூற்றுப்படி, வரி அல்லாத வருமானமும் குறிப்பிடத்தக்க அதிகரிப்பைப் பதிவு செய்துள்ளது. வரி அல்லாத மூலங்களிலிருந்தான வருமானம் 2025 இன் முதல் ஆறு மாதங்களில் 169.6 பில்லியன் ரூபாவாக இருந்த நிலையில், இந்த ஆண்டின் இதே காலப்பகுதியில் 243.6 பில்லியன் ரூபாவாக உயர்ந்து, 43.6% என்ற கணிசமான வளர்ச்சியைக் குறித்துள்ளது.
இதன் விளைவாக, மொத்த வரி மற்றும் வரி அல்லாத வருமானம் 2025 இன் முதல் பாதியில் 2,321.7 பில்லியன் ரூபாவாக இருந்த நிலையில், 2026 இன் அதே காலப்பகுதியில் 2,954.2 பில்லியன் ரூபாவாக அதிகரித்து, 27.2% என்ற ஒட்டுமொத்த வளர்ச்சியைக் காட்டியுள்ளது.
உள்நாட்டு இறைவரித் திணைக்களம், இலங்கை சுங்கம் மற்றும் சுங்கவரித் திணைக்களம் (Excise Department) ஆகியவற்றால் திரட்டப்பட்ட வருமானத்தின் அதிகரிப்பே ஒட்டுமொத்த அரசாங்க வருமான உயர்வுக்கு முக்கிய காரணியாக அமைந்ததாக கலாநிதி அமரசூரிய விளக்கமளித்தார்.
இக்காலப்பகுதியில் இலங்கை மத்திய வங்கியிடமிருந்து 42 பில்லியன் ரூபா பங்குலாபமாக (dividends) அரசாங்கத்திற்கு மாற்றப்பட்டதன் காரணமாகவே வரி அல்லாத வருமானம் குறிப்பிடத்தக்க அளவில் அதிகரித்ததாகவும், இது அரச வருமானத்திற்கு முக்கிய பங்களிப்பை வழங்கியதாகவும் அவர் மேலும் தெரிவித்தார்.
