ஆசிய அபிவிருத்தி வங்கியின் (ADB) கணிப்பின்படி, இலங்கையின் பொருளாதார வளர்ச்சி 2025 ஆம் ஆண்டில் காணப்பட்ட 5.0% இலிருந்து, 2026 ஆம் ஆண்டில் 4.0% ஆகக் குறையும். பின்னர் 2027 இல் இது மீண்டும் 4.2% ஆகச் சற்று உயரும் என எதிர்பார்க்கப்படுகிறது.
அதேபோல், இலங்கையின் பணவீக்கம் தற்போது நிலவும் -0.5% மட்டத்திலிருந்து 2026 இல் 5.2% ஆக உயரும் என்றும், பின்னர் 2027 இல் 4.0% ஆகக் குறையும் என்றும் ADB கணித்துள்ளது.
ஆசிய அபிவிருத்தி வங்கியின் முதன்மை வெளியீடான ‘ஆசிய அபிவிருத்தி நோக்கு (ADO) ஏப்ரல் 2026’ அறிக்கையின்படி, இந்த முன்னறிவிப்புகள் மத்திய கிழக்கு மோதல்கள் விரைவில் ஒரு முடிவுக்கு வரும் என்ற எதிர்பார்ப்பின் அடிப்படையில் அமைந்தவை. கடந்த 2025 ஆம் ஆண்டின் இறுதியில் ஏற்பட்ட ‘டிட்வா’ (Ditwah) சூறாவளி பாதிப்புகளுக்கு மத்தியிலும் இலங்கையின் பொருளாதார மீட்சி உறுதியாக இருந்ததாக ADB குறிப்பிட்டுள்ளது.
குறைந்த பணவீக்கம் மற்றும் வட்டி விகிதக் குறைப்பு ஆகியவற்றால் தனியார் நுகர்வு அதிகரித்தது. அத்துடன், வெளிநாட்டுத் தொழிலாளர்களின் பண அனுப்பல் (Remittances) மற்றும் ஆரம்ப வரவு செலவுத் திட்ட உபரி (Primary budget surplus) ஆகியவை சாதனை அளவை எட்டின. நாட்டின் உத்தியோகபூர்வ கையிருப்பு பல ஆண்டுகளில் இல்லாத அளவுக்கு வலுவான நிலைக்கு உயர்ந்தது.
சூறாவளிக்கு பிந்தைய புனரமைப்புச் செலவுகள் வளர்ச்சிக்கு ஆதரவளித்தாலும், 2026 ஆம் ஆண்டிற்கான பொருளாதார நிலைமை மத்திய கிழக்கு மோதல்களால் அதிகம் பாதிக்கப்படும் எனத் தெரிகிறது. தனியார் நுகர்வு தொடர்ந்து வளர்ச்சியைத் தீர்மானிக்கும் காரணியாக இருந்தாலும், உயரும் பணவீக்கம் குடும்பங்களின் செலவு செய்யும் சக்தியைக் குறைக்கும். மேலும், நிலவும் நிச்சயமற்ற தன்மை காரணமாக தனியார் முதலீடுகள் மீட்சியடையக் காலமெடுக்கும்.
அதிகரித்த எரிசக்தி செலவுகள், வெளிநாட்டு வருமானத்தில் ஏற்படக்கூடிய வீழ்ச்சி, வர்த்தகம் மற்றும் சுற்றுலாத்துறையில் ஏற்படும் இடையூறுகள் ஆகியவை குடும்ப வருமானத்திலும் நாட்டின் பொருளாதார வளர்ச்சியிலும் தாக்கத்தை ஏற்படுத்தும். குறிப்பாக மத்திய கிழக்கு மோதல் காரணமாக 2026 இல் பணவீக்கம் 5.2% ஆகத் தீவிரமடையும் எனக் குறிப்பிடப்பட்டுள்ளது.
இலங்கைக்கான ADB பணிப்பாளர் ஷானன் கவுலின் (Shannon Cowlin) கருத்துப்படி:
“பொருளாதார நெருக்கடிக்குப் பின்னர் இலங்கை கடந்து வந்த பாதை நீண்டது. கடந்த இரண்டு ஆண்டுகால பொருளாதாரச் செயல்பாடு ஒரு பெரிய சாதனையாகும். இருப்பினும், எதிர்கால அபாயங்கள் உண்மையானவை மற்றும் பாரதூரமானவை. சீர்திருத்தங்களை நிறுத்துவதற்கு இது சரியான நேரமல்ல. நிதி ஒழுக்கம் பேணப்பட வேண்டும் மற்றும் வெளிப்புற அதிர்ச்சிகளைத் தாங்கும் வகையில் பொருளாதாரத்தை வலுப்படுத்த வேண்டும். அதே நேரத்தில், பொருளாதார மீட்சியைத் தக்கவைக்க பொது முதலீடுகளை அதிகரித்துச் செயல்படுத்துவது அவசியம்.”
ஆசிய அபிவிருத்தி வங்கியானது 1966 ஆம் ஆண்டு நிறுவப்பட்டதுடன், ஆசிய-பசிபிக் பிராந்தியத்தின் 50 நாடுகள் உட்பட மொத்தம் 69 நாடுகளை உறுப்பினர்களாகக் கொண்டுள்ளமை குறிப்பிடத்தக்கது.
