கள்ளக்குறிச்சி
கள்ளக்குறிச்சி மாவட்டம் தியாகதுருகம் அருகே, மின்கோபுரம் அமைப்பதற்காக விவசாய நிலத்தில் கடந்த 12 ஆண்டுகளாக ஆசை ஆசையாக வளர்த்து வந்த 89 மரங்கள் கண் முன்னே வெட்டிச் சாய்க்கப்பட்டதைப் பார்த்து, அந்த மரங்களை வளர்த்த பெண் அவற்றைக் கட்டிப்பிடித்துக் கதறி அழுத நெஞ்சை உருக்கும் காட்சி இணையத்தில் வைரலாகி வருகிறது.
வடதொரசலூர் கிராமத்தைச் சேர்ந்த லோகநாதனின் மனைவி செல்வி (வயது 58). இவர் தனது விவசாய நிலத்தில் கடந்த 12 ஆண்டுகளுக்கு முன்பு மகோகனி, தேக்கு, தென்னை உள்ளிட்ட 100-க்கும் மேற்பட்ட மரக்கன்றுகளை நட்டு, அவற்றை ஒரு குழந்தையைப் போலப் பராமரித்து வளர்த்து வந்தார்.
இதற்கிடையில், அவரது விவசாய நிலத்தின் வழியாக உயர் அழுத்த மின்பாதை அமைக்க மின்வாரிய அதிகாரிகள் திட்டமிட்டனர். ஆனால், இதற்குச் செல்வியின் குடும்பத்தினர் கடும் எதிர்ப்பு தெரிவித்ததாகக் கூறப்படுகிறது. பல ஆண்டுகளாகத் தங்கள் நிலத்தில் மரங்களை வளர்த்து வருவதால், தயவுசெய்து மாற்று வழியில் மின்பாதையை அமைக்குமாறு அவர்கள் அதிகாரிகளிடம் கெஞ்சிக் கேட்டுள்ளனர்.
எனினும், இதனைத் தொடர்ந்து கடந்த சில மாதங்களுக்கு முன்பு செல்வியின் நிலத்தில் உயர் அழுத்த மின்கம்பத்திற்கான கோபுரம் அமைக்கப்பட்டு, மின் கம்பிகளும் பொருத்தப்பட்டன. அப்போது அந்த மரங்களுக்கு இழப்பீடாக ரூ.97 ஆயிரம் வழங்கப்படும் என அதிகாரிகளால் தெரிவிக்கப்பட்டதாகக் கூறப்படுகிறது. இந்நிலையில், மின்வாரிய அதிகாரிகள் மற்றும் ஊழியர்கள் பலத்த போலீஸ் பாதுகாப்புடன் வந்து விவசாய நிலத்தில் இருந்த 89 மரங்களை ஈவு இரக்கமின்றி வெட்டி அகற்றினர்.
மரங்களை கட்டிப்பிடித்து கதறி அழுத செல்வி:
தான் பல ஆண்டுகளாக ரத்தம் சிந்தி, வியர்வை சிந்தி வளர்த்து வந்த மரங்கள் கண் முன்னே வெட்டப்படுவதைப் பார்த்த செல்வி கடும் அதிர்ச்சியடைந்தார். “என் மரங்களை வெட்ட வேண்டாம்…” என அதிகாரிகளிடம் கதறிய அவர், வெட்டப்பட இருந்த மரங்களைக் கட்டிப்பிடித்துக் கொண்டு கண்ணீர் விட்டு அழுத காட்சி பார்ப்போர் நெஞ்சங்களை உலுக்குவதாக அமைந்தது.
அரசு பள்ளிக்கு நிலம் தானம்:
பணம் பெரிதல்ல, மரங்களே முக்கியம் எனத் தவிக்கும் செல்வி, இதே பகுதியில் அரசுப் பள்ளி கட்டுவதற்காகத் தனது சொந்த நிலத்தில் 40 சென்ட் நிலத்தை அரசுக்கு எந்தவொரு எதிர்பார்ப்புமின்றித் தானமாக வழங்கியவர் என்பது குறிப்பிடத்தக்கது.
#Kallakurichi #TreeCutting #SaveTrees #ViralVideo #EmotionalVideo #TNEB #TNNews #TamilNaduNews #LatestNewsTN #TrendingTN #ViralNewsTN #FarmersIssue #Vadathorasalur #AgricultureTN
