கன்னியாகுமரி:

கன்னியாகுமரி மாவட்டத்தைச் சேர்ந்த பிரபல யூடியூபர் மதுமிதா மீது, 89 வயது முதியவர் ஒருவரிடம் 5 பவுன் தங்க நகையைத் திருடியதாக ராஜாக்கமங்கலம் காவல் நிலையத்தில் வழக்குப் பதிவு செய்யப்பட்டுள்ளது பேசுபொருளாகியுள்ளது.

100 பவுன் கொள்ளை:

அண்மையில், யூடியூபர் மதுமிதா குடும்பத்துடன் வெளியூர் சென்றிருந்த நேரத்தில், அவரது வீட்டில் சுமார் 100 பவுன் தங்க நகைகள் மற்றும் பணம் கொள்ளையடிக்கப்பட்ட சம்பவம் தமிழ்நாடு முழுவதும் பெரும் பரபரப்பை ஏற்படுத்தியிருந்தது. யூடியூபில் அவர் தனது நகைகள் மற்றும் பணத்தைக் காட்சிப்படுத்தியதே இந்தத் திருட்டிற்குக் காரணம் எனக் கூறப்பட்டது. இந்த வழக்கில் காவல்துறையினர் துரிதமாகச் செயல்பட்டு 98 பவுன் நகைகளை மீட்டதுடன், குற்றவாளிகள் 4 பேரை அதிரடியாகக் கைது செய்திருந்தனர்.

திருட்டு வழக்கு:

இந்தச் சம்பவத்தின் பரபரப்பு அடங்குவதற்குள், தற்போது மதுமிதா மீதே திருட்டு வழக்கு ஒன்று பதிவு செய்யப்பட்டுள்ளது. கன்னியாகுமரியைச் சேர்ந்த 89 வயதான கட்டட ஒப்பந்ததாரரான முத்து என்பவர் அளித்த புகாரின் அடிப்படையிலேயே இந்த நடவடிக்கை எடுக்கப்பட்டுள்ளது.

முதியவரின் புகார்:

காவல் நிலையத்தில் அவர் அளித்துள்ள புகாரில், கடந்த 2022 ஆம் ஆண்டு மதுமிதாவுக்குத் தனது வாகனத்தில் ‘லிப்ட்’ கொடுத்ததாகவும், அப்போது தனக்கு பிசியோதெரபி சிகிச்சை அளிப்பதாகக் கூறி மதுமிதா தனது கழுத்திலிருந்த 5 பவுன் தங்கச் சங்கிலியைத் திருடிச் சென்றதாகவும் அவர் குற்றம் சாட்டியுள்ளார். நெல்லை பேருந்து நிலையத்தில் அவரை இறக்கிவிட்ட பின்னரே, தனது நகை காணாமல் போனது தனக்குத் தெரியவந்ததாக அவர் குறிப்பிட்டுள்ளார்.

போலீஸார் விசாரணை:

இது குறித்து மதுமிதாவிடம் கேட்டபோது, அவர் தன்னை அவதூறாகப் பேசி மிரட்டியதாகவும், அவமானத்திற்குப் பயந்து இவ்வளவு நாட்களாகத் தான் காவல் நிலையத்தில் புகார் அளிக்கவில்லை எனவும் அந்த முதியவர் தனது மனுவில் வேதனையுடன் தெரிவித்துள்ளார். முதியவரின் இந்தப் புகாரின் அடிப்படையில், யூடியூபர் மதுமிதா மீது திருட்டு வழக்குப் பதிவு செய்துள்ள ராஜாக்கமங்கலம் காவல்துறையினர், இந்த விவகாரம் குறித்துத் தீவிர விசாரணைகளை முன்னெடுத்து வருகின்றனர். திருட்டுக் கொடுத்தவர் மீதே திருட்டு வழக்குத் தொடரப்பட்டுள்ள இந்த வினோத சம்பவம் இணையத்தில் பெரும் விவாதத்தைக் கிளப்பியுள்ளது.

#YoutuberMadhumitha #Kanniyakumari #CrimeNews #TamilNaduPolice #GoldTheft #BmNews #TamilNews #BreakingNewsTN #TamilNaduNews #LatestNews #TamilNewsLive