சென்னை:

பணி நிரந்தரம், வேலைப் பாதுகாப்பு உள்ளிட்ட கோரிக்கைகளை வலியுறுத்திச் சென்னையில் போராட்டத்தில் ஈடுபட்ட செவிலியர்கள் அதிரடியாகக் கைது செய்யப்பட்டமைக்குத் திமுக இளைஞரணிச் செயலாளர் உதயநிதி ஸ்டாலின் தனது கடுமையான கண்டனங்களைப் பதிவு செய்துள்ளார்.

அரசு மீது கடும் சாடல்:

இது குறித்துத் தனது சமூக வலைத்தளப் பக்கத்தில் பதிவிட்டுள்ள அவர், முதலமைச்சர் விஜய் தலைமையிலான தவெக அரசைக் கடுமையாக விமர்சித்துள்ளார். \”எதிர்க்கட்சியாக இருந்தபோது ஆட்சிக்கு வந்த முதல் நாளிலேயே செவிலியர்களைப் பணி நிரந்தரம் செய்வோம் என்று சொன்ன இன்றைய கோமாளி ஆட்சியாளர்கள், இன்றைக்குச் செவிலியர்களின் போராட்டத்திற்கு முதல் ஆளாகக் காவல்துறையை அனுப்பி அராஜகம் செய்கின்றனர்\” என அவர் சாடியுள்ளார்.

அநாகரிகத்தின் உச்சம்:

மேலும், \”ஒருபக்கம் போராட்டக் களத்தில் சிறிய இடத்தில் செவிலியர்களை அடைப்பது, மின்சாரத்தை நிறுத்துவது, உயிர் வேணுமா வேண்டாமா என்று மிரட்டுவது என அத்துமீறும் இந்த ஆட்சியாளர்கள், மறுபக்கம் கட்சியின் ‘அபியூசிவ் வாரியர்ஸ்’ (Abusive Warriors) மூலம் செவிலியர்களையும் அவர்களின் போராட்டத்தையும் சமூக வலைத்தளங்களில் கொச்சைப்படுத்துவது அநாகரிகத்தின் உச்சம்\” என அவர் வேதனையுடன் தெரிவித்துள்ளார்.

தாய்மாமன் தடியடி திட்டமா?:

\”செவிலியர்கள் மீது சிறு கீறல் விழுந்தாலும் பொறுக்க மாட்டோம் என அன்றைக்குப் ‘பஞ்ச் டயலாக்’ பேசிவிட்டு, இன்றைக்குப் போராடும் செவிலியர்களை மட்டுமின்றி அவர்களின் குழந்தைகள் மீது கூட தாக்குதல் நடத்துவது வெட்கக்கேடு. குழந்தைகளைத் தாக்குவதற்குப் பெயர் என்ன தாய்மாமன் தடியடி திட்டமா?\” என உதயநிதி மிக ஆவேசமாகக் கேள்வி எழுப்பியுள்ளார். பெட்டி வேட்பாளரின் போலிக் கண்ணீரைத் துடைப்பதற்காக நீளும் முதல்வரின் கரங்கள், உயிர்காக்கும் செவிலியர்களின் உண்மைக் கண்ணீரைத் துடைக்க மறுப்பது ஏன் எனவும் அவர் விமர்சித்துள்ளார்.

பேச்சுவார்த்தைக்கு வலியுறுத்தல்:

செவிலியர்கள் மீதான அடக்குமுறையை உடனே நிறுத்தி, அவர்களை உடனடியாகப் பேச்சுவார்த்தைக்கு அழைக்க வேண்டும் எனவும், அவர்களின் கோரிக்கைகளைத் தீர்த்து வைப்பதற்குத் தேவையான நடவடிக்கைகளை இந்த அரசு தாமதமின்றி எடுக்க வேண்டும் எனவும் உதயநிதி ஸ்டாலின் தனது அறிக்கையில் வலியுறுத்தியுள்ளார்.

#UdhayanidhiStalin #NursesProtest #CMVijay #TVKGovernment #TNPolitics #BmNews #TamilNews #BreakingNewsTN #TamilNaduNews #LatestNews #TamilNewsLive