ஒன்டாரியோவின் ஹாமில்டன் (Hamilton, Ont.) நகரில் கடந்த வார இறுதியில் வாகனத்தை நிறுத்தும் இடம் (Parking spot) தொடர்பாக ஏற்பட்ட தகராறில், பெண் ஒருவரைத் தலைமுடியைப் பிடித்து இழுத்துக் கீழே தள்ளித் தாக்கியதுடன், இனவெறி வார்த்தைகளால் வசைபாடிய குற்றச்சாட்டின் பேரில் இரண்டு பெண்கள் கைது செய்யப்பட்டுள்ளனர்.

இச்சம்பவம் கடந்த ஞாயிற்றுக்கிழமை இரவு சுமார் 9:35 மணியளவில் அப்பர் வெலிங்டன் (Upper Wellington) மற்றும் கன்செஷன் (Concession) வீதிகள் அமைந்துள்ள பகுதியில் உள்ள வாகன நிறுத்துமிடம் ஒன்றில் நடந்துள்ளது.

சம்பவ இடத்திற்கு ஹாமில்டன் காவல்துறையினர் விரைந்தபோது, வாகனத்தை நிறுத்துவதில் ஏற்பட்ட சிக்கல் காரணமாகப் பாதிக்கப்பட்ட பெண்ணுக்கும், வேறு இரண்டு பெண்களுக்கும் இடையே முதலில் வாக்குவாதம் ஏற்பட்டுள்ளதை அவர்கள் கண்டறிந்தனர்.

பின்னர் இந்த வாக்குவாதம் முற்றியதில், அந்தப் பெண் கடுமையான தாக்குதலுக்கு உள்ளாக்கப்பட்டதாகக் காவல்துறை தெரிவித்துள்ளது.

“இந்தத் தாக்குதலின் போது, சந்தேகநபர்கள் பாதிக்கப்பட்ட பெண்ணைக் குத்தியதுடன், தரையில் தள்ளி, அவரது தலைமுடியைப் பிடித்து இழுத்துள்ளனர். அதே நேரத்தில், அவர்கள் பாதிக்கப்பட்ட பெண்ணை நோக்கி இனவெறி வார்த்தைகளையும் (Racial slurs) உதிர்த்துள்ளனர்,” என்று வெள்ளிக்கிழமை வெளியிடப்பட்ட செய்திக்குறிப்பில் தெரிவிக்கப்பட்டுள்ளது.

பாதிக்கப்பட்ட பெண்ணுக்கு உயிருக்கு ஆபத்தில்லாத காயங்கள் ஏற்பட்டுள்ளதாகக் காவல்துறை கூறியுள்ளது. இது குறித்து அவசர மருத்துவப் பணியாளர்களுக்கு (Paramedics) தகவல் தெரிவிக்கப்பட்ட போதிலும், அவர் மருத்துவமனைக்குச் செல்ல மறுத்துவிட்டார் என அதிகாரிகள் தெரிவித்தனர்.

காவல்துறையினர் சம்பவ இடத்திற்கு வருவதற்கு முன்பாகவே, சந்தேகநபர்கள் இருவரும் ஒரு வெள்ளை நிற லெக்ஸஸ் (Lexus) எஸ்.யூ.வி ரக காரில் ஏறித் தப்பியோடிவிட்டனர்.

இருப்பினும், சில நாட்களுக்குப் பிறகு காவல்துறையினர் சந்தேகநபர்களைக் அடையாளம் கண்டறிந்தனர்.

இதனடிப்படையில், கடந்த புதன்கிழமையன்று 22 வயதுடைய பெண் ஒருவரையும், அதனைத் தொடர்ந்து வியாழக்கிழமையன்று 26 வயதுடைய மற்றொரு பெண்ணையும் காவல்துறையினர் கைது செய்தனர்.

கைது செய்யப்பட்டவர்களின் அடையாளங்களைக் காவல்துறை வெளியிடவில்லை. எனினும், சந்தேகநபர்கள் இருவர் மீதும் ‘உடல் ரீதியான காயத்தை ஏற்படுத்திய குற்றச்சாட்டின் பேரிலான தாக்குதல்’ (Assault causing bodily harm) வழக்கு பதிவு செய்யப்பட்டுள்ளதாகக் கூறப்பட்டுள்ளது.

குறிப்பு: இந்த குற்றச்சாட்டுகள் இன்னும் நீதிமன்றத்தில் பரிசீலிக்கப்பட்டு நிரூபிக்கப்படவில்லை.