வியாழக்கிழமை அதிகாலை ரொறன்ரோ நகரின் உயர்தர குடியிருப்புப் பகுதியான பிரைடில் பாத் (Bridle Path) பகுதியில் இடம்பெற்ற கொடூரமான வீட்டு ஊடுருவல் சம்பவத்தில், ஒரு தந்தையும் அவரது இரு  மகள்களும் துப்பாக்கியால் சுடப்பட்டுள்ளதாக ரொறன்ரோ பொலிஸார் தெரிவித்துள்ளனர்.

கைத்துப்பாக்கிகள் மற்றும் சுத்தியலுடன் முகமூடி அணிந்த மூன்று சந்தேகநபர்கள், அதிகாலை 3:45 மணியளவில் பேவியூ மற்றும் லாரன்ஸ் அவென்யூஸ் அருகே அமைந்துள்ள ஹைட் பார்க் சேர்க்கிளில் உள்ள வீட்டின் பின்புறக் கதவு வழியாக உள்ளே நுழைந்துள்ளனர்.

வீட்டிற்குள் நுழைந்த கொள்ளையர்கள் கணவன், மனைவி மற்றும் அவர்களின் இரு  மகள்களை அச்சுறுத்தியுள்ளனர். இதன்போது ஏற்பட்ட மோதலில் தந்தையும் இரு மகள்களும் சுடப்பட்டுள்ளனர். அத்துடன், ஒருவர் சுத்தியலால் தாக்கப்பட்டுள்ளார்.

பாதிக்கப்பட்ட நால்வரும் உடனடியாக மருத்துவமனைக்குக் கொண்டு செல்லப்பட்டனர். முதல் மீட்புக்குழுவினர் சம்பவ இடத்திற்கு வருவதற்குள் சந்தேகநபர்கள் அங்கிருந்து தப்பிச் சென்றுவிட்டனர்.

பாதிக்கப்பட்ட இருவரின் காயங்கள் ஆரம்பத்தில் உயிருக்கு ஆபத்தானவை என பொலிஸார் தெரிவித்திருந்த போதிலும், தற்போது அவர்களின் காயங்கள் வாழ்நாள் முழுவதும் பாதிப்பை ஏற்படுத்தக்கூடியவை (Life-altering) என உறுதிப்படுத்தப்பட்டுள்ளது. இருவர் இன்னமும் மருத்துவமனையில் சிகிச்சை பெற்று வருகின்றனர்.

சந்தேகநபர்களின் விரிவான அடையாளங்களை பொலிஸார் இதுவரை வெளியிடவில்லை, எனினும் அவர்கள் SUV ரக வாகனத்தில் தப்பிச் சென்றுள்ளதாகத் தெரிவிக்கப்பட்டுள்ளது.

‘அச்சமும் அதிர்ச்சியும் அளிக்கிறது’

சம்பவ இடத்தில் ஊடகவியலாளர்களிடம் பேசிய ரொறன்ரோ பொலிஸ் சேவையின் கொள்ளை தடுப்புப் பிரிவின் ஆய்வாளர் கிறிஸ்டி ஸ்மித்:

“இது ஒரு தீவிரமான விசாரணையில் உள்ள சம்பவமாகும். சந்தேகநபர்கள் பற்றிய விரிவான தகவல்கள் தற்போது எம்மிடம் இல்லை என்றாலும், அடையாளம் காணப்பட்ட மூன்று சந்தேகநபர்கள் குறித்து சாத்தியமான தகவல்களை வழங்க எம்மாலான அனைத்து முயற்சிகளையும் செய்து வருகிறோம்.

இத்தகைய சம்பவம் பாதிக்கப்பட்டவர்களுக்கு மட்டுமன்றி, அப்பகுதி மக்கள் மற்றும் முழுச் சமூகத்திற்கும் எவ்வளவு அச்சத்தையும் அதிர்ச்சியையும் தரும் என்பதை நாங்கள் உணர்கிறோம். மக்கள் தங்கள் வீடுகளில் பாதுகாப்பாக உணர வேண்டும்.”

கொள்ளையர்கள் வீட்டின் பெறுமதியான பொருட்களைக் கேட்டு மிரட்டியுள்ளதாகக் குறிப்பிட்ட ஸ்மித், அவர்கள் எதையாவது திருடிச் சென்றார்களா என்பது தெளிவாகத் தெரியவில்லை என்றார்.

வாகனத் திருடர்கள் பெரும்பாலும் உயர்சொகுசு வாகனங்களைத் திருடுவதற்காக வீடுகளுக்குள் நுழைவது வழக்கம் என்றும், இந்த வீடு குறிப்பாக இலக்கு வைக்கப்பட்டுத் தாக்கப்பட்டதா என்பதை உறுதியாகக் கூற முடியாது என்றும், உயர்தரப் பகுதிய என்பதால் பெறுமதியான பொருட்கள் இருக்கும் என்ற நோக்கில் இத்தாக்குதல் நடத்தப்பட்டிருக்கலாம் என்றும் பொலிஸார் தெரிவிக்கின்றனர்.

சம்பவம் நடந்த சிறிது நேரத்திலேயே துப்பாக்கிக் காயத்துடன் உள்ளூர் மருத்துவமனைக்கு வந்த நபருக்கும் இந்தச் சம்பவத்திற்கும் தொடர்பிருக்கிறதா என்பது குறித்தும் பொலிஸார் ஆராய்ந்து வருகின்றனர்.

‘நம்பவே முடியவில்லை’

இச்சம்பவம் குறித்து அப்பகுதிவாசியான செசில் ஹோக்கின்ஸ் கருத்து தெரிவிக்கையில், “இது ஒரு கொடூரமான அதிர்ச்சியும் சோகமுமாகும். அந்த வீட்டின் உரிமையாளர் மிகவும் அன்பான, சமூக அக்கறை கொண்ட பெண்மணி. அவருக்கு இரு மகள்கள் உள்ளனர். இந்தப் பகுதியில் உள்ள அனைத்து வீடுகளுக்கும் நல்ல பாதுகாப்பு வசதிகள் உள்ளன. அப்படியிருந்தும் வீட்டிற்குள் புகுந்து துப்பாக்கிச் சூடு நடத்தியுள்ளது நம்பவே முடியாத அதிர்ச்சியாக உள்ளது,” என்றார்.

மேயர் மற்றும் கவுன்சிலர் கவலை

ரொறன்ரோ மேயர் ஒலிவியா சௌ (Olivia Chow) வெளியிட்ட அறிக்கையில்:

“பிரைடில் பாத் பகுதியில் அதிகாலையில் நடந்த வன்முறை வீட்டு ஊடுருவல் சம்பவம் என்னை ஆழ்ந்த கவலையடையச் செய்துள்ளது. எந்தவொரு குடும்பமும் சந்திக்கக்கூடாத ஒரு சூழலை எதிர்கொண்டுள்ள அந்த குடும்பத்தினருக்காகவும் அவர்களின் அன்பிற்குரியவர்களுக்காகவும் எனது பிரார்த்தனைகள். அவர்கள் விரைவில் முழுமையாக குணமடையப் பிரார்த்திக்கிறேன்.

இந்தத் தாக்குதல் அந்தப் பகுதியையும் ரொறன்ரோ மக்களையும் உலுக்கியுள்ளது. எமது நகரில் இத்தகைய வன்முறையை ஏற்றுக்கொள்ள முடியாது. ரொறன்ரோ பொலிஸாரின் விசாரணைக்கு எனது முழு ஆதரவும் உண்டு.”

அப்பகுதி நகரசபை உறுப்பினரான ரேச்சல் செர்னோஸ் லின் தெரிவிக்கையில், “ஒவ்வொரு குடிமகனும் தங்கள் வீட்டில் பாதுகாப்பாக இருக்கத் தகுதியானவர்கள். இத்தகைய வன்முறைச் செயல் மிகவும் கவலையளிக்கிறது,” எனத் தெரிவித்துள்ளார்