சிவகாசி:
சிவகாசியில் நடைபெற்ற வெற்றி மகளிர் தொழில் முனைவோர் மேம்பாட்டுத் திட்ட தொடக்க விழாவில் தமிழ்நாடு தொழில்துறை அமைச்சர் கீர்த்தனா கலந்துகொண்டு பெண் தொழில் முனைவோருக்குக் கடன் உதவிகளை வழங்கினார். அதன்பின்னர் அவர் செய்தியாளர்களைச் சந்தித்துப் பல்வேறு கேள்விகளுக்கு மிகவும் ஆவேசமாகப் பதிலளித்தார்.
பத்து கோடி பங்களா:
தான் பத்து கோடி ரூபாயில் சிவகாசியில் புதிய வீடு வாங்கியதாகத் தன் மீது வைக்கப்படும் அடுக்கடுக்கான குற்றச்சாட்டுகளுக்கு பதிலளித்த அவர், “என் மீது தொடர்ந்து இத்தகைய பொய்க் குற்றச்சாட்டுகளைத் திட்டமிட்டு முன்வைத்தால் நான் தொய்வடைந்து வீட்டிற்குள்ளேயே முடங்கி விடுவேன் என அவர்கள் நினைக்கிறார்கள். மக்களின் ஆதரவு எனக்கு எப்போதுமே அதிகமாக உள்ளது. அவர்களுக்கு மாபெரும் பயம் ஏற்பட்டிருக்கின்ற காரணத்தாலேயே இத்தகைய தொடர் குற்றச்சாட்டுகளை என் மீது வைப்பதாக நான் கருதுகிறேன். சிவகாசியில் நான் பத்து கோடியில் வாங்கியதாகக் கூறப்படும் அந்தப் பங்களாவின் முகவரியைக் கண்டறிவதற்கே நாங்களே மிகவும் கஷ்டப்பட்டுவிட்டோம். எங்களை நம்பி மிகப் பெரிய பொறுப்பு வழங்கப்பட்டுள்ளது. மக்கள் பணியில் ஈடுபட்டுக் கொண்டிருக்கும் எங்களுக்கு வீட்டைத் தேடிக் கண்டறிவது வேலையல்ல,” என்று அவர் மிகவும் கிண்டலாகத் தெரிவித்தார்.
ஜெயலலிதாவுடன் ஒப்பீடு:
“தொழில் முதலீடுகள் அனைத்தும் ஆந்திராவுக்குச் சென்றுவிடும் என்று முதலில் சொன்னவர்கள் இன்று அதுகுறித்து எதுவுமே பேசுவதில்லை. இந்த ஆட்சி மீதான பயத்தின் காரணத்தாலேயே தொடர்ந்து இத்தகைய குற்றச்சாட்டுகள் முன்வைக்கப்பட்டு வருகின்றன. என்னை முடக்க நினைத்தால் அது ஒருபோதும் நடக்கவே நடக்காது. சிவகாசி மக்கள் எனக்கு எப்போதுமே துணையாக இருப்பார்கள். முன்னாள் முதலமைச்சர் ஜெயலலிதாவையும் இதேபோன்றுதான் முடக்கப் பார்த்தார்கள். ஆனால் அவர் வெகுண்டு எழுந்து மாபெரும் வெற்றியைப் பெற்றார். அதேபோல நாங்களும் வீறுகொண்டு எழுந்து உறுதியாக வருவோம். பெண்கள் எல்லாம் முன்னேறி வரக்கூடாது என எழுதப்பட்டிருக்கிறதா?” என்று அவர் சரமாரியாகக் கேள்வியெழுப்பினார்.
