ரஷ்யாவின் கட்டுப்பாட்டில் உள்ள கிரிமியா பகுதியில் கடந்த வாரம் நிகழ்ந்த பயங்கர இராணுவ விமான விபத்தில், ரஷ்ய விமானப்படையின் மூத்த தளபதி அலெக்சாண்டர் ஓட்ரோஷ்சென்கோ உயிரிழந்ததாக அதிகாரப்பூர்வமாக அறிவிக்கப்பட்டுள்ளது.
ரஷ்யாவின் வடக்கு கடற்படையின் 45ஆவது விமானப்படை மற்றும் வான் பாதுகாப்புப் பிரிவின் தளபதியாகப் பணியாற்றி வந்த இவர், மார்ச் 31 அன்று நிகழ்ந்த இந்த விபத்தில் மற்ற 29 பேருடன் உயிரிழந்ததை மூர்மான்ஸ்க் பிராந்திய ஆளுநர் ஆண்ட்ரே சிபிஸ் உறுதிப்படுத்தியுள்ளார்.
என்-26 (An-26) ரக இராணுவப் போக்குவரத்து விமானம் கிரிமியாவில் உள்ள ஒரு குன்றின் மீது மோதி விபத்துக்குள்ளானதாகவும், தொழில்நுட்பக் கோளாறே இந்த விபத்திற்கு முதற்கட்டக் காரணம் என்றும் ரஷ்ய பாதுகாப்பு அமைச்சகம் தெரிவித்துள்ளது.
1960-களின் பிற்பகுதியில் இருந்து பயன்பாட்டில் உள்ள இந்த என்-26 ரக விமானங்கள், சரக்கு போக்குவரத்து மற்றும் இராணுவப் பயன்பாட்டிற்குப் பரவலாகப் பயன்படுத்தப்பட்டு வருகின்றன.
இருப்பினும், கடந்த பத்தாண்டுகளில் இந்த வகை விமானங்கள் பல உயிரிழப்புகளை ஏற்படுத்திய விபத்துக்களில் சிக்கியுள்ளன.
குறிப்பாக, 2022இல் உக்ரைனின் ஜாபோரிஜியா பகுதியிலும், 2020இல் உக்ரைன் பயிற்சிப் பயணத்தின் போதும் நிகழ்ந்த விபத்துகளில் பலர் உயிரிழந்தனர்.
மேலும், தெற்கு சூடான் மற்றும் ஐவரி கோஸ்ட் ஆகிய நாடுகளிலும் என்-26 விமானங்கள் விபத்துக்குள்ளாகி ரஷ்யர்கள் உட்பட பலரது உயிரைப் பறித்துள்ளன.
