ஒன்ராறியோவைச் சேர்ந்த லியம் டோமன் (Liam Toman) காணாமல் போய் ஒரு வருடத்திற்கும் மேலாகியுள்ள நிலையில், அவரைக் கண்டுபிடிப்பதற்காக அவரது குடும்ப உறுப்பினர்களும் தன்னார்வலர்களும் இணைந்து இந்த வார இறுதியில் மொன்-ட்ரெம்ப்ளான்ட் பகுதியில் புதிய வான் மற்றும் தரைவழித் தேடுதல் நடவடிக்கையொன்றை மேற்கொண்டுள்ளனர்.
சம்பந்தப்பட்ட மீட்புப் பணிகளில் நிபுணத்துவம் பெற்ற தன்னார்வத் தேடுதல் குழுக்கள் மற்றும் ‘சார்கான் கே9’ (SARCAN K9 – மோப்ப நாய் பிரிவு) ஆகியவற்றின் உதவியுடன் சனிக்கிழமை மற்றும் ஞாயிற்றுக்கிழமைகளில் இந்தத் தீவிரத் தேடுதல் முயற்சிகள் முன்னெடுக்கப்பட்டன.
கடந்த 2025 ஆம் ஆண்டு பெப்ரவரி மாதம் மொன்-ட்ரெம்ப்ளான்ட் பகுதிக்கு பனிச்சறுக்கு (ski trip) சுற்றுலா சென்றிருந்த போதே டோமன் காணாமல் போயிருந்தார். அதன் பின்னர், 2025 மார்ச் மாதத்தில் அருகில் உள்ள வாகன நிறுத்துமிடம் ஒன்றிலிருந்து அவரது பணப்பை (wallet) கண்டெடுக்கப்பட்டது.
பொதுமக்களிடையே இது குறித்த விழிப்புணர்வை ஏற்படுத்தவும், இந்த வழக்கு தொடர்பான தகவல்களைத் தொடர்ந்து பகிர்வதை ஊக்குவிக்கவும் அவரது குடும்பத்தினர் ‘நீல நிற கைக்காப்பு பிரசாரம்’ (blue bracelet campaign) ஒன்றையும் ஆரம்பித்துள்ளனர்.
பொதுமக்களின் கவனத்தை இந்த மர்மமான காணாமல் போதல் சம்பவத்தின் மீது தொடர்ந்து தக்கவைப்பதற்கும், தற்போதைய தேடுதல் முயற்சிகளுக்கு ஆதரவளிப்பதற்குமே இம்முயற்சி மேற்கொள்ளப்படுவதாக குடும்பத்தினர் தெரிவித்துள்ளனர்.
லியம் டோமன் இருக்கும் இடத்தை அறிந்துகொள்ள உதவும் தகவல்களுக்கு 50,000 டாலர் வெகுமதி இன்னமும் அறிவிக்கப்பட்ட நிலையில் உள்ள போதிலும், அந்தச் சலுகை வரும் புதன்கிழமையுடன் காலாவதியாகவுள்ளது (expire) குறிப்பிடத்தக்கது.
