சுகவீனம் காரணமாக மட்டக்களப்பு போதனா வைத்தியசாலையில் அனுமதிக்கப்பட்டு, கடந்த இரண்டு வாரங்களாக சிகிச்சை பெற்று வந்த நிலையிலேயே அவர் சிகிச்சை பலனின்றி இயற்கை எய்தியுள்ளார்.
1965 ஆம் ஆண்டு செப்டம்பர் 16 ஆம் திகதி மட்டக்களப்பில் பிறந்த இவர், ஆரம்பத்தில் ஆசிரியராகப் பணியாற்றினார். பின்னர் வாழைச்சேனையில் திருமணம் முடித்து வாழ்ந்து வந்த இவர், ஊடகத் துறை மீது கொண்ட ஆர்வத்தால் பகுதிநேர ஊடகவியலாளராகத் தனது பணியைத் தொடர்ந்தார். ‘வீரகேசரி’ நாளிதழ் மற்றும் ‘தமிழ்நெட்’ இணையத்தளம் ஆகியவற்றில் பணியாற்றிய அவர், கிழக்கிலங்கை செய்தியாளர் சங்கத்தின் முக்கிய உறுப்பினராகவும் விளங்கினார்.
மறைந்த ஊடகவியலாளர் மாமனிதர் தர்மரத்தினம் சிவராம் (தராக்கி), நாட்டுப்பற்றாளர் நா. சிவராம் மற்றும் முன்னாள் நாடாளுமன்ற உறுப்பினர் பா. அரியநேத்திரன், சண் தவராசா, வேதநாயகம், உதயகுமார் உள்ளிட்ட பல முக்கிய ஊடகவியலாளர்களுடன் இணைந்து இவர் களப்பணியாற்றியுள்ளார்.
அரசியல் ரீதியாகப் பல அச்சுறுத்தல்களையும் நெருக்கடிகளையும் எதிர்கொண்ட இவர், மட்டக்களப்பிற்குச் செல்வதில் பலத்த முட்டுக்கட்டைகளைச் சந்தித்தார். இதன் உச்சக்கட்டமாக, 2006 ஆம் ஆண்டு யூலை மாதம் மட்டக்களப்பு, பூம்புகாரில் அமைந்திருந்த இவரது வீட்டின் மீது இனந்தெரியாத நபர்களால் ஆர்.பி.ஜி (RPG) எறிகணைத் தாக்குதலும் நடத்தப்பட்டது.
நீண்ட இடைவெளிக்குப் பின்னர், 2020 ஆம் ஆண்டு காலப்பகுதியில் மீண்டும் இலங்கை திரும்பிய ஜெயானந்தமூர்த்தி, வினாயகமூர்த்தி முரளிதரன் (கருணா அம்மான்) தலைமையிலான தமிழர் ஐக்கிய சுதந்திர முன்னணியில் இணைந்து சில ஆண்டுகள் செயற்பட்டார். பின்னர் அதிலிருந்தும் விலகிய அவர், இறுதியாக 2024 ஆம் ஆண்டு மே மாதம் சஜித் பிரேமதாச தலைமையிலான ஐக்கிய மக்கள் சக்தியின் (SJB) கல்குடா தொகுதி இணைப்பாளராக நியமிக்கப்பட்டார்.
