முன்னாள் கடற்றொழில் அமைச்சர் ராஜித சேனாரத்னவுக்கு எதிராக இலஞ்ச ஊழல் விசாரணை ஆணைக்குழுவினால் கொழும்பு மேல் நீதிமன்றத்தில் நேற்று செவ்வாய்க்கிழமை (11) குற்றப்பத்திரிகை தாக்கல் செய்யப்பட்டுள்ளது.

கடந்த 2012 ஆம் ஆண்டு கடற்றொழில் அமைச்சராகப் பணியாற்றிய காலத்தில், கிரிந்த மீன்பிடித் துறைமுகத்தில் உள்ள மணலை அகற்றி சந்தையில் விற்பனை செய்யும் பணிக்காக கொரிய நிறுவனம் ஒன்றைத் தெரிவுசெய்து, அப்பணிகளுக்காக கடற்றொழில் துறைமுகக் கூட்டுத்தாபனத்திற்குச் சொந்தமான ‘வெலிகொவ்வா’ எனும் கப்பலை குத்தகை அடிப்படையில் வழங்குவதற்கு அந்த கூட்டுத்தாபனத்தின் தலைவருக்கு அழுத்தம் கொடுத்தமையின் ஊடாக ‘ஊழல்’ எனும் குற்றத்தைப் புரிந்துள்ளதாகக் குற்றஞ்சாட்டி இலஞ்ச ஊழல் விசாரணை ஆணைக்குழுவினால் இந்த குற்றப்பத்திரிகை தாக்கல் செய்யப்பட்டுள்ளது.

இதனூடாக பிரதிவாதிக்கு எதிராக 5 குற்றச்சாட்டுகள் சுமத்தப்பட்டுள்ளன. மேலும் இவ்வழக்கில் சாட்சிகளாக 13 நபர்கள் பெயரிடப்பட்டுள்ளதுடன், வழக்குப்பொருட்களாக 25 ஆவணங்களும் மன்றில் சமர்ப்பிக்கப்பட்டுள்ளமை குறிப்பிடத்தக்கது.

மெகசின் சிறைச்சாலைக்கு போதைப்பொருள் ; சிறைக்காவலர் கைது

கொழும்பு – பொரளை மெகசின் சிறைச்சாலைக்கு போதைப்பொருட்களை விநியோகிக்க முயன்றதாகச் சந்தேகிக்கப்படும் சிறைத்துறை அதிகாரி ஒருவர், கல்கிஸ்ஸை வலயக் குற்றத்தடுப்புப் பிரிவினரால் கைது செய்யப்பட்டுள்ளார்.

100 கிராம் ‘ஐஸ்’ (Crystal Methamphetamine) மற்றும் 20 கிராம் ஹெரோயின் போதைப்பொருட்களையும் பொலிஸார் மீட்டுள்ளனர். கைப்பற்றப்பட்ட போதைப்பொருட்களின் பெறுமதி சுமார் 20 இலட்சம் ரூபாய் என மதிப்பிடப்பட்டுள்ளது.

கல்கஸ்ஸைப் பகுதியில் மேற்கொள்ளப்பட்ட சுற்றிவளைப்பின்போது, தெஹிவளை – மெடிக்கல் ரோட்டைச் சேர்ந்த 32 வயதுடைய நபரொருவர் முதலில் போதைப்பொருள் தொகையுடன் கைது செய்யப்பட்டுள்ளார்.

கைது செய்யப்பட்ட நபரிடம் மேற்கொள்ளப்பட்ட விசாரணைகளின்போது, மெகசின் சிறைச்சாலையில் தண்டனை கைதியாக உள்ள ஒருவரே தமக்கு வாட்ஸ்அப் (WhatsApp) அழைப்பு மூலம் ஒரு இடத்தை அடையாளம் காட்டியதாகவும், அந்த இடத்திற்குச் சென்றே தாம் போதைப்பொருள் பொதியைப் பெற்றுக்கொண்டதாகவும் அவர் ஒப்புக்கொண்டுள்ளார்.

மேலும், பொரளை – வனத்த வீதியில் வைத்து இந்த போதைப்பொருள் பொதியைப் பிறிதொரு நபரிடம் கையளிக்கவிருந்ததாகவும் அவர் தெரிவித்துள்ளார்.

இதற்கமைய, போதைப்பொருளைப் பெற்றுக்கொள்ளவிருந்த நபரை மடக்கிப் பிடிப்பதற்காக, கல்கஸ்ஸை வலயக் குற்றத்தடுப்புப் பிரிவின் பொறுப்பதிகாரியின் வழிகாட்டலின் கீழ் விசேட பொலிஸ் குழுவொன்று திட்டமிட்டு நடவடிக்கைகளை முன்னெடுத்து வருகிறது.