சென்னை

கர்நாடக வனப்பகுதியில் 3 தமிழர்கள் அம்மாநில வனத்துறையினரால் ஈவு இரக்கமின்றிச் சுட்டுக்கொல்லப்பட்ட கொடூர சம்பவத்திற்கு, முன்னாள் முதலமைச்சரும் திமுக தலைவருமான மு.க.ஸ்டாலின் கடும் கண்டனம் தெரிவித்துள்ளார்.

கர்நாடக மாநிலம் சாம்ராஜ் நகர் மாவட்டத்திற்கு உட்பட்ட ஹனூர் வனப்பகுதியில், வேட்டையாட வந்தவர்கள் எனக் கூறி கர்நாடக வனத்துறையினர் நடத்திய கொடூர துப்பாக்கிச்சூட்டில் 3 தமிழர்கள் பரிதாபமாக உயிரிழந்தனர். சுட்டுக்கொல்லப்பட்டவர்கள் வேட்டையாடுபவர்கள் அல்ல, அப்பாவிகள் எனக் கூறி உறவினர்களும் கிராம மக்களும் தொடர் போராட்டத்தில் ஈடுபட்டனர். இதனையடுத்து ஹனூர் எம்.எல்.ஏ. மஞ்சுநாத் நடத்திய அமைதிப் பேச்சுவார்த்தையில், உயிரிழந்தவர்களின் குடும்பத்திற்கு கர்நாடக அரசு மற்றும் தனது சொந்த நிதியிலிருந்து தலா ரூ.15 லட்சம் நிவாரணம் வழங்குவதாகவும், சம்பந்தப்பட்ட அதிகாரிகள் மீது பணிநீக்க நடவடிக்கை எடுக்கப்படும் எனவும் உறுதியளிக்கப்பட்டதைத் தொடர்ந்து போராட்டம் தற்காலிகமாகக் கைவிடப்பட்டது.

இந்தச் சம்பவம் தொடர்பாகத் தனது ‘எக்ஸ்’ (X) தளத்தில் கடும் கண்டனம் தெரிவித்துள்ள திமுக தலைவர் மு.க.ஸ்டாலின், “கர்நாடக வனப்பகுதியில் தமிழர்கள் மூவரை அம்மாநில வனத்துறையினர் அநியாயமான முறையில் சுட்டுக் கொன்றிருக்கும் சம்பவம் பெரும் அதிர்ச்சியளிக்கிறது. மனித உயிர்கள் குறித்த எந்த மதிப்பும் இல்லாமல் நிகழ்த்தப்பட்டிருக்கும் இந்தக் கொடூரச் செயல் வன்மையாகக் கண்டிக்கத்தக்கது,” என வேதனையுடன் பதிவிட்டுள்ளார்.

மேலும், “குற்றமிழைத்தவர்களைக் காப்பாற்றுவதற்கான முயற்சிகளில் கர்நாடக வனத்துறையினர் ஈடுபடுவதாகத் தெரிகிறது. இதனை உடனடியாகக் கொலை வழக்காகப் பதிவு செய்து, பாரபட்சமற்ற நீதி விசாரணை நடத்தப்பட்டு குற்றவாளிகள் தண்டிக்கப்பட வேண்டும். மேகதாது விவகாரம் போல இதிலும் வாய்மூடி இருக்காமல், இச்சம்பவத்தில் தமிழ்நாடு அரசு கர்நாடக அரசுக்குத் தனது கடும் கண்டனத்தை ஆணித்தரமாகப் பதிவு செய்திட வேண்டும். உயிரிழந்தவர்களின் குடும்பத்தினருக்கு உரிய இழப்பீட்டுத் தொகையையும், அரசுப் பணியையும் பெற்றுத் தரத் தமிழ்நாடு அரசு உடனடி நடவடிக்கை எடுக்க வேண்டும்,” என்று மு.க.ஸ்டாலின் வலியுறுத்தியுள்ளார்.

#MKStalin #DMK #KarnatakaForestShooting #TamilsKilled #JusticeForTamils #TVKGovernment #ChiefMinisterVijay #JosephVijay #TNPolitics #TamilNaduNews #ChennaiNews #ViralNewsTN #TrendingTN #LatestNewsTN #TNNewsUpdates