பிரேஸிலில் 20 வயதுக்குட்பட்டோருக்கான போட்டியொன்றில் உலக சாதனையாக 51 சிவப்பு அட்டைகள் காட்டப் பெற்றுள்ளது.
மினாஸ் ஜெரைஸ் 20 வயதுக்குட்பட்ட சம்பியன்ஷிப் தொடரின் உபர்லன்டியா, மமோரேக்கிடையிலான முதலாவது சுற்று அரையிறுதிப் போட்டியிலேயே 43 வீரர்களுக்கும் பயிற்சியாளர் குழாமின் உறுப்பினர்கள் எட்டுப் பேருக்கும் சிவப்பு அட்டை காட்டப் பெற்றுள்ளது.
மமோரேயின் டவி, தனது அணி 3-1 என இரண்டாம் பாதியில் முன்னிலை பெற்றதைத் தொடர்ந்து எதிரணி மாற்றுவீரர்களை சீண்டியதைத் தொடர்ந்தே மோதல் வெடித்துள்ளதாக மத்தியஸ்தரின் அறிக்கையில் குறிப்பிடப்பட்டுள்ளது. டவியுடன் மோத உபர்லன்டியா கோல் காப்பாளர் பயிற்சியாளர் போலோ சேர்ஜியோ டியஸ் டொஸ் சன்டோஸ் களத்துக்குள் ஓடி வந்தமையடுத்தே மோதல் தீவிரமாகியுள்ளது.
போட்டியானது ஏறத்தாழ 40 நிமிடங்கள் இடைநிறுத்தப்பட்டு, பின்னர் மத்தியஸ்தர் பெர்ணாண்டோ பற்றிக் ட்றோஸ்ஜிக் மொடெஸ்டோவால் கைவிடப்பட்டிருந்தது.
பொலிஸ் அறிக்கையில் கதவுகள், யன்னல்கள், கதிரைகள் உடைக்கப்பட்டதாகக் கூறப்பட்டிருந்தது.
இதற்கு முன்பதாக ஆர்ஜென்டீனாவிலுள்ள கிளப் அத்லெட்டிகோ கிளேபோல், விக்டோரியானோ அரீனாஸுக்கிடையிலான ஐந்தாம் தர போட்டியில் 2011ஆம் ஆண்டு 36 சிவப்பு அட்டைகள் காட்டப் பெற்றதே சாதனையாக இருந்தது.
