சென்னை
தமிழ்நாடு சட்டப்பேரவையில் பட்ஜெட் மீதான விவாதத்தில் பங்கேற்றுப் பேசிய பாமக எம்.எல்.ஏ சவுமியா அன்புமணி, விவசாயத் துறைக்குக் குறைவான நிதி ஒதுக்கப்பட்டிருப்பதும், பயிர்க்கடன் தள்ளுபடி செய்யப்படாததும் பெரும் ஏமாற்றத்தை அளிப்பதாகத் தெரிவித்துள்ளார்.
சேவை உரிமைச் சட்டத்திற்குப் பாராட்டு:
பட்ஜெட் விவாதத்தில் பேசிய அவர், “பாமகவின் 13 வருட கோரிக்கையான சேவை உரிமைச் சட்டத்தை அமல்படுத்திய தவெக அரசுக்கு எனது மனமார்ந்த வாழ்த்துகள். பிறப்பு, இறப்பு உள்ளிட்ட முக்கியச் சான்றுகளை விரைவாக வழங்கும் இச்சட்டத்தை நிறைவேற்ற ஒப்புதல் அளித்ததற்கு நன்றி,” என்று தெரிவித்தார்.
விவசாயிகளுக்கு ஏமாற்றம்:
தொடர்ந்து விவசாயத் துறை குறித்துப் பேசிய அவர், “சாப்பாடு போடக்கூடிய விவசாயத் துறைக்கு மிகக் குறைவான நிதியே ஒதுக்கீடு செய்யப்பட்டுள்ளது. எதிர்பார்த்த பல அறிவிப்புகள் பட்ஜெட்டில் இல்லை. குறிப்பாக, விவசாயிகளின் பயிர்க்கடனை முழுமையாகத் தள்ளுபடி செய்யாதது பெரும் ஏமாற்றம் அளிக்கிறது. 5 கோடி விவசாயிகளுக்கு வெறும் ரூ.14 ஆயிரம் கோடி மட்டுமே ஒதுக்கியிருப்பது மிகக் குறைவான தொகையாகும். எனினும், மகளிர் மற்றும் விவசாயிகளுக்கான திட்டங்கள், இயற்கை விஞ்ஞானி விருது போன்ற அறிவிப்புகளை நான் வரவேற்கிறேன்,” என்றார்.
நீர்நிலைகளைத் தூர்வார கோரிக்கை:
“தமிழ்நாட்டில் உள்ள 27,000 குளங்களைத் தூர்வாரினாலே 150 டிஎம்சி வரை நீரைச் சேமிக்க முடியும். ஒரு காலத்தில் 42,000 ஏரிகள் இருந்த தமிழ்நாட்டில், தற்போது 27,000 ஏரிகள் மட்டுமே எஞ்சியுள்ளன. அவற்றை 1 மீட்டர் அளவாவது தூர்வார வேண்டும். இதன் மூலம் 100 டிஎம்சி நீரைச் சேமித்தால், நாம் அண்டை மாநிலங்களிடம் கையேந்த வேண்டிய அவசியமே இருக்காது. காவிரியில் 10 கிலோ மீட்டருக்கு ஒரு தடுப்பணை கட்டுவதன் மூலம் கடலில் வீணாகக் கலக்கும் தண்ணீரைச் சேகரிக்க முடியும். ஆறுகள் இணைப்பு உள்ளிட்ட நீர்ப்பாசனத் திட்டங்களுக்கு இன்னும் கூடுதல் நிதி ஒதுக்கீடு செய்யப்பட்டிருக்க வேண்டும். அவ்வாறு செய்தால் கேரளா, கர்நாடகாவிடம் நீரை எதிர்பார்க்க வேண்டிய அவசியமே இல்லை. ஆனால், ஏரி, குளம் உள்ளிட்ட நீர்நிலைகள் தூர்வாரும் திட்டங்கள் மற்றும் நிலத்தடி நீர்மட்டத்தை உயர்த்துவதற்கான எந்த அறிவிப்பும் இல்லாதது ஏமாற்றம் அளிக்கிறது,” என்று அவர் அதிரடியாகத் தெரிவித்தார்.
அமைச்சர்களின் உறுதி:
சவுமியா அன்புமணியின் கோரிக்கைகளுக்குப் பதிலளித்துப் பேசிய நீர்வளத்துறை அமைச்சர் புஸ்ஸி ஆனந்த், “கடந்த ஆண்டுகளில் நீர்வளத்துறைக்கு ஒதுக்கப்பட்டதை விட, தற்போதைய தவெக அரசு கூடுதலாகவே நிதியை ஒதுக்கியுள்ளது. தருமபுரி மாவட்டமும் எங்களது மாவட்டம்தான். விவசாயிகளின் நியாயமான கோரிக்கைகளைக் கண்டிப்பாக நிறைவேற்றுவோம். முதலமைச்சர் விஜய்யுடன் கலந்தாலோசித்து, சவுமியா அன்புமணி கேட்ட அனைத்துக் கோரிக்கைகளையும் நிறைவேற்ற உரிய நடவடிக்கை எடுக்கப்படும்,” என்று உறுதியளித்தார்.
அதேபோல், “மக்களுக்கும் விவசாயிகளுக்கும் தேவையான அனைத்து அடிப்படை வசதிகளும் திட்டங்களும் முழுமையாகச் செய்து தரப்படும்,” எனக் கால்நடைத்துறை அமைச்சர் கமலியும் அவையில் உறுதியளித்தார்.
#SoumyaAnbumani #PMK #FarmersIssue #TNBudget2026 #ChiefMinisterVijay #ThalapathyVijay #TVKGovernment #BussyAnand #MinisterKamali #TamilNaduNews #Chennai #TNPolitics #ViralNewsTN #TrendingTN #LatestNewsTN #TNNewsUpdates #AgricultureTN
