சென்னை:

தமிழ் திரையுலகின் முன்னணி நடிகரான தனுஷ் தனது ரசிகர் மன்ற செயல்பாடுகளில் சமீபகாலமாக அதிக கவனம் செலுத்தி வருகிறார். நடிகர் விஜய் அரசியல் கட்சியைத் தொடங்கி தீவிரமாகச் செயல்பட்டு வரும் நிலையில், தனுஷும் அவரைப் பின்பற்றி விரைவில் அரசியலுக்கு வருவாரா என்ற எதிர்பார்ப்பும், கேள்வியும் பொதுமக்கள் மற்றும் திரைத்துறையினரிடையே பரவலாக எழுந்துள்ளது. இந்த நிலையில், நடிகர் தனுஷ் இன்று (ஜூலை 28) தனது பிறந்தநாளைக் கொண்டாடுகிறார். இதையொட்டி, திருவள்ளூர் மாவட்டம் பெரியபாளையம் அருகே அமைந்துள்ள தனியார் மருத்துவக் கல்லூரி ஒன்றில், தனுஷ் ரசிகர் மன்றத்தின் சார்பில் மாபெரும் ரத்த தானம் மற்றும் ஏழை, எளிய மக்களுக்கான நலத்திட்ட உதவிகள் வழங்கும் மாபெரும் விழா நடைபெற்றது.

இந்த விழாவில் நடிகர் தனுஷ் நேரில் கலந்துகொண்டு தனது ரசிகர்களைச் சந்தித்து உற்சாகப்படுத்தினார். மேலும், அவர் இயக்கி நடித்த ‘ராயன்’ திரைப்படத்திற்கு தேசிய விருது கிடைத்தது தொடர்பாக எழுந்துள்ள பல்வேறு விமர்சனங்கள் மற்றும் சர்ச்சைகளுக்கும் அவர் மேடையில் வெளிப்படையாக விளக்கம் அளித்தார். அதனைத் தொடர்ந்து ரசிகர்களைப் பார்த்து அவர் பேசிய உணர்ச்சிபூர்வமான வீடியோ தற்போது சமூக வலைதளங்களில் வெளியாகி ட்ரெண்டாகி வருகிறது. அந்த வீடியோவில் பேசியுள்ள தனுஷ், “இங்கே இவ்வளவு பேர் கூடியிருக்கிறீர்கள். நம்முடைய இந்த ஒற்றுமைக்கு மிகப்பெரிய சக்தி உண்டு. அந்த சக்திக்கு உறுதியான ஒரு நோக்கமும் உண்டு. நாம் அனைவரும் சும்மா வந்தோம், என்னைச் சந்தித்தோம், புகைப்படம் எடுத்தோம் என்று மட்டும் இருந்துவிடக் கூடாது. உங்களைச் சுற்றியுள்ள மக்களுக்கு ஏதேனும் பிரச்சினை என்றால் உடனடியாகச் சென்று உதவுங்கள். அவர்களுக்குத் தேவையான நலத்திட்ட உதவிகளைச் செய்யுங்கள். அதற்கு எல்லாரும் கைகோர்க்க வேண்டும். நீங்கள் அனைவரும் அதனைச் செய்வீர்கள் என நான் முழுமையாக நம்புகிறேன். என்னை இன்னும் வேகமாக ஓட வைக்கும் உங்களுக்கு நெஞ்சார்ந்த நன்றி, ஓம் நமச்சிவாய” என்று தெரிவித்தார்.

நடிகர் தனுஷ் தற்போது ‘ஓம்’ என்ற திரைப்படத்தில் தீவிரமாக நடித்து வருகிறார். இதனைத் தொடர்ந்து, லப்பர் பந்து படத்தின் இயக்குநர் தமிழரசன் பச்சமுத்து இயக்கத்திலும், பிரபல இயக்குநர் வெற்றி மாறன் இயக்கும் ‘தமிழ் முருகன்’ திரைப்படத்திலும் அவர் நடிக்கவுள்ளார். திரைப்படங்களில் பிஸியாக நடித்து வரும் அதே வேளையில், ரசிகர்களை ஒன்றுதிரட்டி, மக்களுக்கு உதவ வேண்டும் என்று தனுஷ் விடுத்துள்ள இந்தத் திடீர் அழைப்பு, அவரது அரசியல் பிரவேசத்திற்கான ஆரம்பப்புள்ளியாகவே பார்க்கப்படுகிறது. தனுஷின் இந்த அதிரடிப் பேச்சு அவரது ரசிகர்களிடையே மட்டுமின்றி, அரசியல் பார்வையாளர்களிடையேயும் பெரும் விவாதத்தை ஏற்படுத்தியுள்ளது.

#ActorDhanush #DhanushBirthday #PoliticalEntry #DhanushFansClub #BmNews #TamilCinema #Vetrimaaran #RaayanNationalAward #TamilMuruganMovie #ThiruvallurNews #TamilNews #BreakingNewsTN #DhanushSpeech #TamilNewsLive