சென்னை
கர்நாடக வனப்பகுதியில் 3 தமிழர்கள் சுட்டுக்கொல்லப்பட்ட விவகாரத்தில், “தமிழகத் தலைவர்கள் எங்கள் மாநில விவகாரத்தில் தலையிடக் கூடாது” எனப் பேசிய கர்நாடக துணை முதல்வர் டி.கே.சிவக்குமாருக்கு, உலகத் தமிழர் பேரமைப்பின் தலைவர் பழ.நெடுமாறன் கடும் கண்டனம் தெரிவித்துள்ளார்.
நடிகர் ராஜ்குமார் மீட்பில் தமிழர்கள்:
“கடந்த 2000-ஆம் ஆண்டில் கன்னட நடிகர் ராஜ்குமாரை வீரப்பன் கடத்திச் சிறை வைத்திருந்தபோது, அப்போதைய கர்நாடக முதல்வர் எஸ்.எம்.கிருஷ்ணா மூன்று முறை தமிழகத்திற்கு ஓடோடி வந்து அப்போதைய முதல்வர் கலைஞர் கருணாநிதியிடம் உதவி கோரினார். வீரப்பனின் நிபந்தனைப்படி, தமிழக மற்றும் கர்நாடக முதல்வர்களின் வேண்டுகோளுக்கிணங்க நானும், நக்கீரன் கோபால், கொளத்தூர் மணி, பேரா.கல்யாணி, சுகுமார் ஆகிய தமிழர்களுமே காட்டுக்குள் சென்று 5 நாட்கள் பேச்சுவார்த்தை நடத்தி ராஜ்குமாரையும் அவர் மருமகனையும் பத்திரமாக மீட்டோம். அன்று ‘இது எங்கள் மாநிலப் பிரச்சினை, தமிழர்கள் எதற்கு வருகிறீர்கள்?’ என யாரும் கேட்கவில்லையே?” எனப் பழ.நெடுமாறன் ஆவேசமாகச் சுட்டிக்காட்டியுள்ளார்.
மனிதநேயமும் கலவரமும்:
“அன்று நாங்கள் மனிதநேயத்துடன் செயல்பட்டிருக்காவிட்டால், இரு மாநிலங்களிலும் பெரும் இனக்கலவரங்கள் மூண்டெழுந்து படுகொலைகள் நடந்திருக்கும். எந்தக் குற்றமும் செய்யாத 3 அப்பாவித் தமிழர்களைச் சுட்டுக்கொன்றுவிட்டு, அதை மறைக்கச் சிறிதும் மனசாட்சியின்றி டி.கே.சிவக்குமார் பேசுவது காந்தியடிகள் வழியில் வந்த காங்கிரஸ் கட்சிக்குப் பேரிழுக்காகும். இப்படிப்பட்டவர்கள் பொறுப்பான பதவிகளில் தொடரக் கூடாது,” என்று அவர் கடுமையாக விமர்சித்துள்ளார்.
தேசிய மனித உரிமை ஆணையம் மற்றும் உச்ச நீதிமன்றம்:
இந்த ஈவிரக்கமற்ற படுகொலைக்குக் காரணமானவர்களுக்கு உரிய தண்டனை பெற்றுத் தரவும், எதிர்காலத்தில் கர்நாடகாவில் வாழும் தமிழர்களின் பாதுகாப்பை முழுமையாக உறுதி செய்யவும், இந்தப் பிரச்சினையை உடனடியாகத் தேசிய மனித உரிமை ஆணையத்திற்கோ அல்லது உச்ச நீதிமன்றத்திற்கோ கொண்டு செல்ல உரிய நடவடிக்கைகளைத் தமிழக முதலமைச்சர் உடனடியாக மேற்கொள்ள வேண்டும் எனவும் பழ.நெடுமாறன் தனது அறிக்கையில் கோரிக்கை விடுத்துள்ளார்.
#PazhaNedumaran #DKShivakumar #KarnatakaForestShooting #JusticeForTamils #Veerappan #ActorRajkumar #TamilNaduNews #ChennaiNews #TNPolitics #ViralNewsTN #TrendingTN #LatestNewsTN #TNNewsUpdates
