தையிட்டியில் சட்டவிரோதமாக அமைக்கப்பட்ட விகாரை அமைந்துள்ள காணிக்குள் கையகப்படுத்தப்பட்டுள்ள பிரதேச சபை வீதியை மீட்கும் நடவடிக்கையை கைவிட வேண்டும் என பலாலி பொலிஸார் மல்லாகம் நீதவான் நீதிமன்றில் தாக்கல் செய்த வழக்கிற்கான நீதிமன்ற கட்டளை வரும் 21ஆம் திகதி வழங்கப்படும் என நீதிமன்றம் திகதியிட்டுள்ளது.
குறித்த விகாரை அமைந்துள்ள பகுதிக்குள் வலி. வடக்கு பிரதேச சபைக்கு சொந்தமான “பவானி” வீதி காணப்படுகிறது. கடந்த 28ஆம் திகதி அந்த வீதி அளவீடு செய்யப்பட்டது.
அதனைத் தொடர்ந்து பிரதேச சபைத் தவிசாளர், விகாராதிபதி அந்த வீதியை மறித்திருக்கும் வேலியை அகற்ற வேண்டும் என கடிதம் மூலம் அறிவித்தார். அதற்கு மறுப்பு தெரிவிக்கப்பட்டால், பிரதேச சபையே வேலியை அகற்றும் என்றும், அதற்கான செலவை விகாராதிபதி பிரதேச சபைக்கு வழங்க வேண்டும் என்றும் தெரிவிக்கப்பட்டது.
இதனை அடுத்து விகாராதிபதி முறைப்பாடு செய்ததன் பேரில், பலாலி பொலிஸார் தவிசாளரை அழைத்து, வேலியை அகற்றினால் இனங்களுக்கிடையே பிரச்சனைகள் ஏற்பட்டு நல்லிணக்கம் பாதிக்கும் என அச்சுறுத்தல் தொனியில் கூறினர். ஆனால் தவிசாளர் இதனை மறுத்து, வீதியை விடுவிக்கும் நடவடிக்கையில் உறுதியாக இருப்பதாக தெரிவித்தார்.
இந்நிலையில் கடந்த வெள்ளிக்கிழமை பலாலி பொலிஸார், வீதியை மீட்கும் பணியை கைவிட வேண்டும் என்றும் அதற்கு நீதிமன்று தடையுத்தரவு வழங்க வேண்டும் என்றும் மல்லாகம் நீதிமன்றில் மனு தாக்கல் செய்தனர்.
நீதிமன்றம் ஒரு தலைப்பட்சமாக விசாரிக்க மறுத்து, வலி. வடக்கு தவிசாளர் மற்றும் பிரதேச சபை செயலாளரை திங்கட்கிழமை முன்னிலையாகுமாறு அழைத்தது. அதன்படி இருவரும் நீதிமன்றில் ஆஜரான நிலையில், அவர்கள் சார்பில் ஜனாதிபதி சட்டத்தரணி எம்.ஏ. சுமந்திரன் தரப்பு வாதங்களை முன் வைத்தார்.
இந்த வழக்கின் மீதான கட்டளைக்காக எதிர்வரும் 21ஆம் திகதி நீதிமன்றம் திகதியிட்டுள்ளது.
குறிப்பிடத்தக்கது என்னவென்றால், விசாரணையன்று முறைப்பாட்டாளரான விகாராதிபதி நீதிமன்றில் ஆஜராகவில்லை — அவர் சார்பில் பொலிஸார் வாதங்களை முன் வைத்தனர்.
