சர்வஜன அதிகாரத்தின் தலைவரும் பாராளுமன்ற உறுப்பினருமான திலித் ஜயவீர, இலங்கைக்கு புதிதாக நியமிக்கப்பட்டுள்ள சீன மக்கள் குடியரசின் தூதுவர் வெய் ஹுவாக்சியாங்கை (Wei Huaxiang) இன்று (04) கொழும்பில் உள்ள சீனத் தூதரகத்தில் சந்தித்து கலந்துரையாடினார்.

சுமார் இரண்டு மணி நேரம் நீடித்த இந்தச் சந்திப்பின் போது, இலங்கை – சீன உறவுகளை வலுப்படுத்துதல், சீன நிதியுதவியின் கீழ் செயற்படுத்தப்படும் அபிவிருத்தித் திட்டங்கள், பொருளாதார ஒத்துழைப்பு, தொழில்முனைவோர் மற்றும் இலங்கை இளைஞர்களுக்கான கல்வி வாய்ப்புகள் குறித்து கவனம் செலுத்தப்பட்டது.

கலந்துரையாடலின் போது, சீனா இலங்கையுடன் பேணி வரும் நீண்டகால நட்புறவையும் நாட்டின் வளர்ச்சிக்கு அளித்து வரும் பங்களிப்பையும் திலித் ஜயவீர பாராட்டிப் பேசினார்.

“சீனா இலங்கையின் மிக முக்கிய நண்பனாகும். ஏனெனில் சீனா நமது நாட்டுக்கு செய்த உதவிகளுடன் ஒப்பிடும் போது, அது பிரதிபலனாக எதிர்பார்ப்பது மிகவும் சொற்ப அளவிலான விஷயங்களையே ஆகும்,” என திலித் ஜயவீர தெரிவித்தார்.

அபிவிருத்தி ஒத்துழைப்பு குறித்த சீனாவின் அணுகுமுறையை சுட்டிக்காட்டி கருத்து தெரிவித்த தூதுவர் வெய் ஹுவாக்சியாங், இலங்கையில் செயற்படுத்தப்பட்டு வரும் சீன நிதியுதவி திட்டங்கள் குறித்து சர்வஜன அதிகாரத்தின் தூதுக்குழுவுக்கு விளக்கமளித்தார்.

அத்துடன், நாள்பட்ட சிறுநீரக நோயினால் பாதிக்கப்பட்ட மக்களுக்கு சுத்தமான குடிநீரை வழங்குவதற்கான நடவடிக்கைகள் குறித்தும் இதன்போது விசேட கவனம் செலுத்தப்பட்டது.

பாதுகாப்பான குடிநீர் வசதிகளை மேம்படுத்துவது சீனத் தூதரகத்தின் முக்கியமான முன்னுரிமையாக உள்ளது என்றும், இத்தகைய திட்டங்கள் மூலம் ஆயிரக்கணக்கான இலங்கையர்கள் பயனடைய முடியும் என்றும் தூதுவர் வலியுறுத்தினார்.

கலந்துரையாடலின் போது, தூதுவர், எதிர்காலத்தில் சீனாவுக்கு விஜயம் செய்யுமாறு சர்வஜன அதிகாரத்தின் தூதுக்குழுவுக்கு அழைப்பு விடுத்தார்.

சீனாவில் உயர் கல்வியைத் தொடர விரும்பும் இலங்கை இளைஞர்களுக்கான புலமைப்பரிசில் வாய்ப்புகள் குறித்தும் அவர் கலந்துரையாடினார்.

மேலும், ஹம்பாந்தோட்டை துறைமுகத்தின் புதிய அபிவிருத்திகளை நேரில் பார்வையிடவும், அதன் செயல்பாடுகள் மற்றும் எதிர்கால ஆற்றல்கள் குறித்து நேரடி புரிதலைப் பெறவும் கட்சியின் தூதுக்குழுவுக்கு அழைப்பு விடுக்கப்பட்டது.

இலங்கை மீது சீனா காட்டும் தொடர்ச்சியான நட்புறவு மற்றும் தாராள மனப்பான்மைக்காக திலித் ஜயவீர தனது நன்றியைத் தெரிவித்துக் கொண்டார்.

முற்போக்கான அரசியல், பொருளாதார வளர்ச்சி மற்றும் தொழில்முனைவோர் மூலம் இலங்கை மக்களை வலுப்படுத்துவதன் முக்கியத்துவத்தை அவர் வலியுறுத்தினார்.

சீனா மற்றும் இலங்கை பொருளாதாரங்களின் அளவுகளில் பெரிய வித்தியாசம் இருந்தபோதிலும், சீனா இலங்கைக்கு தொடர்ந்து மதிப்புமிக்க உதவிகளை வழங்கி வருவதை சுட்டிக்காட்டிய அவர், உள்நாட்டு வணிகங்கள் மற்றும் இளம் தொழில்முனைவோர் போட்டித்தன்மை மற்றும் சுயசார்பை அடையக்கூடிய வகையில், சீனாவின் தொழில்முனைவோர் அறிவு, வணிக அனுபவம் மற்றும் நடைமுறை நிபுணத்துவத்திலிருந்து பயனடைய இலங்கையர்களுக்கு அதிக வாய்ப்புகளை வழங்குமாறு விசேட கோரிக்கை விடுத்தார்.

அத்துடன் சர்வஜன அதிகாரத்தின் தலைமையகத்திற்கு வருகை தருமாறு தூதுவர் வெய் ஹுவாக்சியாங்க்கு திலித் ஜயவீர நட்புரீதியான அழைப்பும் விடுத்தார்.

இலங்கை மக்களுக்கு பயனளிக்கும் ஒத்துழைப்புகளுக்கான வாய்ப்புகளை ஆராய்வதற்கும் கலந்துரையாடல்களைத் தொடர்ந்து பேணுவதற்கும் இரு தரப்பினரும் விருப்பம் தெரிவித்ததை அடுத்து இச்சந்திப்பு சுமுகமாக நிறைவுற்றது.

ரொஷான் ரணசிங்க – சர்வஜன அதிகாரத்தின் தவிசாளர் மற்றும் பொலன்னறுவை மாவட்டத் தலைவர்

கலாநிதி சன்ன ஜயசுமன – சர்வஜன அதிகாரத்தின் உப தவிசாளர் மற்றும் கொழும்பு மாவட்டத் தலைவர்

காமினி வாலேபொட – சர்வஜன அதிகாரத்தின் உப தவிசாளர் மற்றும் இரத்தினபுரி மாவட்டத் தலைவர்

அனுராதா யஹம்பத் – சர்வஜன அதிகாரத்தின் உப தவிசாளர்

சட்டத்தரணி மதுர விதானகே – சர்வஜன அதிகாரத்தின் செயல்பாட்டுத் பிரதானி

எரங்க மெண்டிஸ் – சர்வஜன அதிகாரத்தின் சர்வதேச விவகாரச் செயலாளர்

அனுருத்த ஹேரத் – சர்வஜன அதிகாரத்தின் குருணாகல் மாவட்டத் தலைவர் ஆகியேர் இச்சந்திப்பில் சர்வஜன அதிகாரத்தின் செயற்குழுவை பிரதிநிதித்துவப்படுத்தி திலித் ஜயவீரவுடன் கலந்துகொண்டனர்.

சீனத் தூதரகத்தின் ஆலோசகர்களான மேய் ஜிங் (Mei Jing) மற்றும் ஜின் என்சே (Jin Enze) ஆகியோரும் தூதுவர் வெய் ஹுவாக்சியாங்குடன் இச்சந்திப்பில் பங்கேற்றிருந்தனர்.

இக்கலந்துரையாடலானது இலங்கைக்கும் சீனாவுக்கும் இடையிலான நீண்டகால நட்புறவை வலுப்படுத்துவதன் முக்கியத்துவத்தைப் பிரதிபலித்ததுடன், பொருளாதார வளர்ச்சி, கல்வி, தொழில்முனைவோர் மற்றும் மக்களுக்கிடையிலான ஒத்துழைப்புக்கான புதிய வழிகளையும் ஆராய்வதாக அமைந்தது.