சென்னை:
திருச்செந்தூர் சுப்பிரமணிய சுவாமி திருக்கோவிலில் நேற்று நடைபெற்ற சூரசம்ஹார விழாவில் ஆகம விதிகள் அப்பட்டமாக மீறப்பட்டுள்ளதாகவும், தற்போதைய தவெக ஆட்சி ஒரு கலப்பட ஆட்சி என்பதற்கு நேற்றைய நிகழ்வே மாபெரும் சாட்சி என்றும் முன்னாள் அமைச்சர் சேகர்பாபு கடுமையாக விமர்சித்துள்ளார்.
திமுக ஆட்சியின் சாதனைகள்:
இது தொடர்பாகச் செய்தியாளர்களிடம் பேசிய அவர், “திருச்செந்தூர் திருக்கோவிலுக்கு 10 ஆண்டுகளுக்கு மேலாக அனுமதி நிலுவையில் இருந்த நிலையில், மு.க.ஸ்டாலின் பொறுப்பேற்ற பிறகுதான் 400 கோடி ரூபாய் மதிப்பில் பெருந்திட்டப் பணிகள் நிறைவேற்றப்பட்டன. 200-க்கும் மேற்பட்ட பக்தர்கள் தங்கும் விடுதி, ஆயிரம் வாகனங்கள் நிறுத்தும் வசதி மற்றும் 48 ஏக்கர் பரப்பளவில் பக்தர்கள் இளைப்பாறும் வசதிகள் ஏற்படுத்தப்பட்டன. திருப்பதிக்கு நிகராக முழுநேர அன்னதானத் திட்டத்தைக் கொண்டு வந்ததும், திருச்செந்தூர் முருகரைத் தவிர்த்து இதர ஐந்து படை வீடுகளையும் அங்கேயே உருவகப்படுத்தியதும் திராவிட மாடல் திமுக ஆட்சிதான்,” என்று அவர் பெருமிதத்துடன் கூறினார்.
ஆகமங்கள் மீறல்:
நேற்றைய சூரசம்ஹார விழா குறித்துப் பேசிய அவர், “நேற்று ஆகமங்கள் அதிகப்படியாக மீறப்பட்டுள்ளன. மனிதனை இறைவனுக்கு நிகராகக் கொண்டாடி இருக்கின்றார்கள். முருகனுக்கு அரோகரா என்று சொல்வதற்குப் பதிலாக, முதலமைச்சருக்கும் அமைச்சருக்கும் அரோகரா என்று வர்ணித்துள்ளனர். துறையின் அமைச்சர் சட்டையின்றி ஆகமப்படி வேலையும் சேவல் கொடியையும் வாங்காமல், இரண்டு கைகளிலும் அவற்றைச் சட்டையுடன் பிடித்துக்கொண்டு நின்றிருந்தார். வேல் கொண்டு சூரசம்ஹாரம் செய்வது திருக்கோவில் அர்ச்சகர்களின் பணி. ஆனால் இது முற்றிலும் மீறப்பட்டுள்ளது,” என்று அவர் சாடினார்.
ரீல்ஸ் ஆட்சி:
மேலும் அவர் கூறுகையில், “இது முழுக்க முழுக்க பக்தர்களுக்காகக் கொண்டாடப்பட்ட சூரசம்ஹார விழா அல்ல; ரீல்ஸ் ஆட்சிக்காக, ரீல்ஸுக்காகவே கொண்டாடப்பட்ட நிகழ்ச்சியாக இது மாறியுள்ளது. நீதிபதிகளும் ஆதீனங்களும் அறவே மதிக்கப்படவில்லை. முன்வரிசையில் வெறும் அமைச்சர்கள்தான் நின்று கொண்டிருந்தார்கள். இது ஆன்மீக உலகிற்கு மிகப்பெரிய வெட்கக்கேடு. ஆன்மீகத்திற்கு எதிரான அரசு என்று சொல்லப்பட்ட எங்களது திமுக ஆட்சியில் எங்குமே ஆகம விதிகள் மீறப்படவில்லை. இறைக் கடவுளின் புகழைத்தான் நாங்கள் பாடினோம்; முதலமைச்சரின் புகழைப் பாடவில்லை. இந்த ஆட்சி கலப்பட ஆட்சி என்பதற்கு நேற்று நடைபெற்ற சூரசம்ஹாரமே ஒரு நேரடிச் சாட்சி,” என்று சேகர்பாபு ஆவேசமாகக் குற்றஞ்சாட்டியுள்ளார்.
#SekarBabu #Soorasamharam #TVKGovernment #DMK #BmNews #TamilNews #BreakingNews #LatestNews #TamilNewsLive