சென்னை
தமிழ்நாடு சட்டப்பேரவையில் தமிழ் மொழியை அவமதிக்கும் வகையிலும், தனது பிழையை நியாயப்படுத்தும் வகையிலும் பேசிய நிதியமைச்சர் மரிய வில்சன் உடனடியாகப் பகிரங்க மன்னிப்பு கேட்க வேண்டும் என நாம் தமிழர் கட்சியின் தலைமை ஒருங்கிணைப்பாளர் சீமான் கடும் கண்டனம் தெரிவித்துள்ளார்.
“ஆணவத்தின் உச்சம்!” – சீமான் சாடல்:
சட்டப்பேரவையில் நிதிநிலை அறிக்கையை வாசிக்கும்போது தமிழைத் தவறாக உச்சரித்ததைச் சுட்டிக்காட்டிய எம்.எல்.ஏ ராஜேந்திரனிடம், நிதியமைச்சர் மரிய வில்சன் நடந்துகொண்ட விதமும், அவரது உடல்மொழியும் ஆணவத்தின் உச்சம். தன்னிடம் உள்ள பிழையை ஏற்றுத் திருத்திக்கொள்வதே உண்மையான அரசியல் முதிர்ச்சி. அதை விடுத்து, ‘என்னை யாருக்காகவும் மாற்றிக்கொள்ள முடியாது’ என அதிகாரத் திமிரில் அவர் பேசியிருப்பது கடும் கண்டனத்திற்குரியது.
“தமிழ் அன்பைப் போதிக்கவில்லையா?”:
“நான் பிறப்பால் கிறிஸ்தவன்; பைபிள் எனக்கு அன்பைப் போதித்தது. எவ்வளவு தமிழ் படித்தாலும் அன்பு வராது” என்ற தொனியில் அமைச்சர் பேசியிருப்பது ஒட்டுமொத்தத் தமிழினத்திற்கும் மாபெரும் அவமதிப்பாகும். உலகிற்கு அன்பை முதன்முதலில் போதித்த ஒரே மொழி தமிழ் மொழிதான் என்பது அமைச்சருக்குத் தெரியாதா? ‘அன்பிற்கும் உண்டோ அடைக்குந்தாழ்’ என உலகிற்கு உணர்த்திய திருக்குறளை அவர் படித்ததில்லையா? உடன்பிறந்த தம்பி குடும்பத்தையே உருட்டுக் கட்டையால் தாக்கிய உங்கள் அன்பையும் இரக்கத்தையும்தான் உலகமே கண்டதே அமைச்சரே!
“மதமல்ல… தாய்மொழியே உண்மையான அடையாளம்!”:
எல்லா மதங்களும் அன்பைத்தான் போதிக்கின்றன. ஜி.யு.போப், வீரமாமுனிவர் போன்ற கிறிஸ்தவ மதப்போதகர்கள் இங்கு வந்து தமிழுக்குத் தொண்டாற்றித்தான் மறைந்தார்கள். ஒரு மனிதனின் உண்மையான அடையாளம் அவனது தாய்மொழிதானே ஒழிய, அவன் ஏற்றிருக்கும் மதமல்ல. மதம் என்பது மாறிக்கொள்ளக் கூடியது; ஆனால் மொழியும் இனமும் மாறாதது என்ற அடிப்படை உண்மையை அமைச்சர் உணர வேண்டும்.
“அதே அவையில் மன்னிப்பு கேட்க வேண்டும்!”:
தாய்மொழியான தமிழை அவமதிக்கும் வகையிலும், கிறிஸ்தவச் சமயத்தை உள்ளிழுத்துத் தேவையற்ற குழப்பத்தை ஏற்படுத்தும் வகையிலும் பேசிய நிதியமைச்சர் மரிய வில்சன், அன்னைத் தமிழை இழிவுபடுத்தியதற்காக அதே சட்டப்பேரவையில் மனம் வருந்திப் பகிரங்க மன்னிப்புக் கோர வேண்டும் எனச் சீமான் திட்டவட்டமாக வலியுறுத்தியுள்ளார்.
#Seeman #NaamTamilarKatchi #NTK #MinisterMariaWilson #TamilLanguage #TamilNaduAssembly #TNPolitics #TVKGovernment #TamilNaduNews #Chennai #ViralNewsTN #TrendingTN #LatestNewsTN #TNNewsUpdates
