சென்னை
சட்டப்பேரவையில் முதலமைச்சர் விஜய் கொண்டுவந்த தொகுதி மறுவரையறைக்கு எதிரான தீர்மானத்தின் மீது பேசிய பொதுப்பணித்துறை அமைச்சர் ஆதவ் அர்ஜுனா, எதிர்காலத்தில் தமிழ்நாட்டில் இருந்து ஒரு பிரதமர் உருவாக்கப்பட வேண்டும் என்று அதிரடியாக முழங்கினார்.
வரலாற்றுச் சிறப்புமிக்க தீர்மானம்:
“முதலமைச்சர் விஜய் கொண்டு வந்துள்ள இந்தத் தீர்மானம் வரலாற்றுச் சிறப்புமிக்கது. மாநிலங்கள் இல்லாமல் ஒன்றிய அரசு இல்லை; இந்தியா வளரவும் முடியாது. வேற்றுமையில் ஒற்றுமை காணும் பன்முகத்தன்மை கொண்ட இந்தியாவின் அரசியலமைப்பைப் பாதுகாக்கவே தற்போது இந்தத் தீர்மானம் கொண்டுவரப்பட்டுள்ளது. தேர்தல் அரசியலுக்காகவே பாஜக இத்தகைய சட்டங்களைக் கொண்டுவர நினைக்கிறது,” என்று அவர் சாடினார்.
வட மாநில ஆதிக்கம் – அண்ணாவின் முழக்கம்:
“தொகுதிகளை 50% உயர்த்தினால் நமக்குப் பலன் கிடைக்கும் எனப் பிரேமலதா கூறியது தவறானது. தொகுதிகளை உயர்த்தினாலும் வட இந்திய ஆதிக்கம் உருவாகும் சூழலே ஏற்படும். ‘வடக்கு வாழ்கிறது, தெற்கு தேய்கிறது’ என அண்ணா அன்றே முழங்கினார். 5 முதல் 6 இந்தி பேசும் மாநிலங்கள் ஒன்றிணைந்தாலே நாட்டின் பிரதமரைத் தேர்வு செய்துவிடலாம் என்ற தற்போதைய அபாயகரமான சூழல் முற்றிலும் மாற்றப்பட வேண்டும்,” என்று அவர் எச்சரித்தார்.
தமிழ்நாட்டிலிருந்து ஒரு பிரதமர் வர வேண்டும்!:
“தமிழ்நாடு வளர்ச்சியடைந்த மாநிலமாக உள்ளபோதிலும், அது தேசிய அரசியலில் போதுமான அளவு பிரதிபலிக்கவில்லை. எனவே, மாநில நலனுக்காக அனைத்துக் கட்சிகளும் ஒன்றிணைந்து செயல்பட வேண்டும். எதிர்காலத்தில் தென்னிந்தியாவிலிருந்து, குறிப்பாகத் தமிழ்நாட்டிலிருந்து ஒரு பிரதமர் உறுதியாக உருவாக்கப்பட வேண்டும்,” என்று அவர் ஆவேசமாகக் கூறினார்.
எம்.பி.க்களுக்கு முக்கியமான கோரிக்கை:
“மாநில சுயாட்சிக்காகக் கருணாநிதியும் ஜெயலலிதாவும் தொடர்ந்து குரல் கொடுத்தனர். நீட்டை விட மிக முக்கியமான இந்தத் தொகுதி மறுவரையறைக்கு எதிரான தீர்மானத்திற்கு ஆதரவு தெரிவித்த திமுகவிற்கும், எதிர்க்கட்சித் தலைவருக்கும் நன்றி. நாடாளுமன்றத்தில் இந்த மசோதா வரும்போது, தமிழ்நாட்டின் 39 எம்.பி.க்களும் வெளிநடப்பு செய்யாமல், மசோதாவிற்கு எதிராகவே வாக்களிக்க வேண்டும். அரசியல் ரீதியாக திமுகவும் காங்கிரஸ் கட்சியும் ஒன்றாக இருந்து இதனை எதிர்க்க வேண்டும்,” என்று அவர் வலியுறுத்தினார்.
#AadhavArjuna #TamilNaduPrimeMinister #Delimitation #TNAssembly #ChiefMinisterVijay #ThalapathyVijay #TVKGovernment #TNPolitics #TamilNaduNews #Chennai #ViralNewsTN #TrendingTN #LatestNewsTN #TNNewsUpdates
