சென்னை:

சென்னை விமான நிலையத்தை நிர்வகிக்கும் பொறுப்பிலிருந்து ‘இந்திய விமான நிலையங்கள் ஆணையத்தை’ (AAI) நீக்கிவிட்டு, அந்தப் பொறுப்பைத் தனியாரிடம் ஒப்படைக்குமாறு பிரதமர் நரேந்திர மோடிக்கு முதலமைச்சர் ச.ஜோசப் விஜய் எழுதிய கடிதம் வெளியாகிப் பரபரப்பை ஏற்படுத்தியுள்ளது.

சென்னை விமான நிலையத்தின் மோசமான செயல்பாடு குறித்து முதலமைச்சர் விஜய் கடந்த ஆகஸ்ட் 5-ஆம் தேதி பிரதமருக்கு எழுதியிருந்த கடிதத்தின் அதிகாரப்பூர்வ நகல் தற்போது இணையத்தில் வெளியாகியுள்ளது. அந்தக் கடிதத்தில் முதலமைச்சர் சுட்டிக்காட்டியுள்ள முக்கிய அம்சங்கள் பின்வருமாறு:

பயணிகள் கையாளுவதில் பின்னடைவு:

“சென்னை சர்வதேச விமான நிலையத்தின் மோசமான செயல்பாடுகளை உங்கள் கவனத்திற்குக் கொண்டுவரவே நான் இந்தக் கடிதத்தை எழுதுகிறேன். ஏப்ரல் 2026 நிலவரப்படி, பயணிகளின் வருகையில் கொல்கத்தாவிற்குப் பின்னால் 6-ஆவது இடத்திற்குச் சென்னை விமான நிலையம் சரிந்துள்ளது. 2025-26 நிதியாண்டில், 2.31 கோடி பயணிகளை மட்டுமே கையாண்டுள்ளது. 2026 மே மாதத்தில் சரக்கு விமானங்களின் இயக்கம் 6 சதவீதம் மட்டுமே அதிகரித்த நிலையில், பெங்களூரு 14.5% வளர்ச்சியைப் பெற்றுள்ளது.

மோசமான பராமரிப்பு:

முறையாகப் பராமரிக்கப்படாத கழிவறைகள், பயணிகள் அமரும் பகுதிகளில் மாசு, பழுதடைந்த குளிரூட்டும் சாதனங்கள், முறைப்படுத்தப்படாத டாக்ஸி சேவைகள் மற்றும் அடிப்படை கட்டமைப்புப் பிரச்சினைகள் குறித்துப் பயணிகளும் உலகளாவிய முதலீட்டாளர்களும் தொடர்ந்து கவலை தெரிவித்து வருகின்றனர்.

தனியாரிடம் ஒப்படைக்க வலியுறுத்தல்:

தமிழ்நாட்டின் பொருளாதார வேகம், வாகன உற்பத்தி, தகவல் தொழில்நுட்பம் மற்றும் சுற்றுலா ஆகியவற்றை மேம்படுத்தச் சிறந்த விமான நிலையம் அவசியமாகும். விமான நிலைய நிர்வாகத்தில் காணப்படும் குறைபாடுகள் மாநிலத்தின் தொழில் முதலீடுகளைப் பாதிக்கக்கூடும். எனவே, தற்போது நிர்வகித்து வரும் இந்திய விமான நிலையங்கள் ஆணையத்தை மாற்றிவிட்டு, சென்னை விமான நிலைய நிர்வாகத்தைத் தனியாருக்கோ அல்லது வேறொரு தகுதியான நிறுவனத்துக்கோ மாற்ற வேண்டும்\” என்று முதலமைச்சர் விஜய் அந்தக் கடிதத்தில் மிகக் கடுமையாக வலியுறுத்தியுள்ளார்.

#CMVijay #ChennaiAirport #PMModi #Privatization #AAI #TVKGovt #TNPolitics #BmNews #TamilNews #BreakingNewsTN #TamilNaduNews #LatestNews #TamilNewsLive