சவூதி அரேபியாவில் மரண தண்டனையை எதிர்நோக்கியுள்ள இலங்கை பிரஜையான சிவராசா அனோஜனின் உயிரைக் காப்பாற்ற உடனடியாக தலையிடுமாறு கோரி, இலங்கைத் தமிழரசுக் கட்சியின் (ITAK) நாடாளுமன்ற உறுப்பினர்கள் கொழும்பிலுள்ள இந்திய மற்றும் அமெரிக்க உயர் இராஜதந்திரிகளைச் சந்தித்துப் பேச்சுவார்த்தை நடத்தியுள்ளனர்.
தமிழரசுக்கட்சியின் நாடாளுமன்றக் குழுத் தலைவர் சாணக்கியன் இராசமாணிக்கம் தலைமையிலான குழுவினர், கட்சியின் நாடாளுமன்றக் குழு எடுத்த தீர்மானத்திற்கு அமைவாக, இந்திய உயர்ஸ்தானிகர் சந்தோஷ் ஜா மற்றும் இலங்கையிலுள்ள அமெரிக்கத் தூதரகத்தின் அரசியல் மற்றும் பொருளாதார ஆலோசகர் அந்தோனி வி. பிர்னோட் (Anthony V. Pirnot) ஆகியோரைத் தனித்தனியாகச் சந்தித்தனர்.
இந்தச் சந்திப்புகளின் போது, அனோஜனின் குடும்பத்தினரின் சார்பில் அவரது வழக்கு தொடர்பான விபரங்களை நாடாளுமன்ற உறுப்பினர்கள் சமர்ப்பித்ததுடன், அனோஜனின் விடுதலையைப் பெற்றுக்கொடுக்க இராஜதந்திர வழிகளை ஆராயுமாறும், சம்பந்தப்பட்ட அதிகாரிகளுடன் பேச்சுவார்த்தை நடத்துமாறும் இரு நாடுகளிடமும் கோரிக்கை விடுத்தனர்.
அனோஜனின் உயிருக்கு உடனடி அச்சுறுத்தல் நிலவுவதால் இந்த விவகாரத்தில் அவசரத் தன்மை காணப்படுவதாகச் சுட்டிக்காட்டிய தமிழரசுக் கட்சி, மரண தண்டனை நிறைவேற்றப்படுவதைத் தடுப்பதற்காக வெளிநாட்டு இராஜதந்திர தூதரகங்கள் மற்றும் சர்வதேச பங்காளிகளுடனான தனது தொடர்பாடல்களைத் தொடர்ந்து முன்னெடுக்கும் எனத் தெரிவித்துள்ளது.
