கனடாவின் நியூ பிரன்சுவிக் (N.B.) மாநிலத்திலுள்ள செயிண்ட் ஜோன் (Saint John) நகரின் மேல் பகுதியில் கடந்த வார இறுதியில் இடம்பெற்ற கத்திக்குத்து மற்றும் தாக்குதல் சம்பவங்கள் தொடர்பில் இருவர் குற்றச்சாட்டுகளை எதிர்கொண்டுள்ளனர்.
சனிக்கிழமை இரவு 9:40 மணியளவில் கிங் வீதி (King Street) பகுதியில் இடம்பெற்ற கத்திக்குத்து சம்பவம் தொடர்பில் செயிண்ட் ஜோன் பொலிஸார் சம்பவ இடத்திற்கு விரைந்தனர்.
சம்பவ இடத்திற்குச் சென்ற பொலிஸார், பலத்த காயமடைந்த 27 வயதுடைய நபரையும், காயமடைந்த 54 வயதுடைய மற்றொரு நபரையும் மீட்டனர்.
பாதிக்கப்பட்ட இருவரும் மருத்துவமனைக்குக் கொண்டு செல்லப்பட்ட நிலையில், ஒருவர் சீரான நிலையில் சிகிச்சை பெற்று வருகிறார்.
அன்று இரவு 10:15 மணியளவில் நகரின் கிழக்குப் பகுதியில் உள்ள ஒரு வீட்டில் 19 வயதுடைய இளைஞர் ஒருவர் இரத்தப்போக்குடன் இருப்பதாகக் கிடைத்த தகவலையடுத்து பொலிஸார் அங்கு விரைந்தனர்.
அந்த இளைஞருக்கு ஏற்பட்ட காயங்களுக்கும் கிங் வீதியில் நடந்த சம்பவத்திற்கும் தொடர்பு இருப்பதை விசாரணையாளர்கள் கண்டறிந்ததை அடுத்து, மேலும் இருவர் மருத்துவமனைக்குக் கொண்டு செல்லப்பட்டனர்.
இதனைத் தொடர்ந்து, 44 வயதுடைய நபர் ஒருவர் கொலை முயற்சி மற்றும் கொடூரமான தாக்குதல் (aggravated assault) ஆகிய குற்றச்சாட்டுகளின் கீழ் பின்னர் கைது செய்யப்பட்டார்.
அத்துடன், அந்த 19 வயது இளைஞர் இரண்டு கொடூரமான தாக்குதல் குற்றச்சாட்டுகளின் கீழ் கைது செய்யப்பட்டார்.
கைது செய்யப்பட்ட இரு நபர்களும் விளக்கமறியலில் வைக்கப்பட்டுள்ளதுடன், பிணை விசாரணைக்காக செவ்வாய்க்கிழமை நீதிமன்றத்தில் ஆஜர்படுத்தப்படவிருந்தனர்.
“சம்பவத்தின் போது பொலிஸாரால் திரட்டப்பட்ட தகவல்களின் அடிப்படையில், இது ஒரு தனிமைப்படுத்தப்பட்ட சம்பவம் எனத் தீர்மானிக்கப்பட்டுள்ளது” என்று செயிண்ட் ஜோன் பொலிஸார் செவ்வாயக்கிழமை வெளியிட்ட அறிக்கையில் தெரிவித்துள்ளனர்.
“குற்றம் சாட்டப்பட்டவர்களும் பாதிக்கப்பட்டவர்களும் ஒருவருக்கொருவர் தெரிந்தவர்களாவர்.”
இச்சம்பவத்தைக் நேரில் கண்டவர்கள் அல்லது சம்பவ இடத்தின் புகைப்படங்கள் அல்லது வீடியோக்களை வைத்துள்ள எவரும் 1-506-648-3333 என்ற இலக்கத்தின் ஊடாக செயிண்ட் ஜோன் பொலிஸாரைத் தொடர்பு கொள்ளுமாறு விசாரணையாளர்கள் கேட்டுக்கொண்டுள்ளனர்.
