சென்னை
பெருநகர சென்னை மாநகராட்சி சார்பில், தெருநாய்களுக்கு ரேபிஸ் தடுப்பூசி மற்றும் அக, புற ஒட்டுண்ணி நீக்க மருந்து செலுத்தும் மாபெரும் சிறப்பு முகாம் இன்று (ஆகஸ்ட் 11) முதல் அதிரடியாகத் தொடங்குகிறது.
தினசரி 3,000 நாய்களுக்குத் தடுப்பூசி:
மண்டலம் மற்றும் கோட்டம் வாரியாகத் தெருநாய்கள் பாதுகாப்பாகப் பிடிக்கப்பட்டு, கால்நடை மருத்துவர்களால் ரேபிஸ் தடுப்பூசி மற்றும் ஒட்டுண்ணி நீக்க மருந்து செலுத்தப்படும். பின்னர் அவற்றுக்கு வண்ணச் சாயம் மூலம் அடையாளப்படுத்தப்பட்டு, அவை பிடிக்கப்பட்ட அதே இடத்திலேயே மீண்டும் விடுவிக்கப்படும். இந்த மாபெரும் பணிக்காக 30 சிறப்புக் குழுக்கள் நியமிக்கப்பட்டு, நாளொன்றுக்குச் சுமார் 3,000 நாய்களுக்குத் தடுப்பூசி செலுத்தத் திட்டமிடப்பட்டுள்ளது.
75 நாட்களில் 2 லட்சம் நாய்களுக்கு இலக்கு:
கடந்த ஆண்டு நடைபெற்ற சிறப்பு முகாமில் சென்னை மாநகராட்சிப் பகுதிகளில் 1,47,545 தெருநாய்களுக்கு ரேபிஸ் தடுப்பூசி செலுத்தப்பட்டது. இந்த ஆண்டுக்கான முகாம் முதற்கட்டமாக மண்டலம் 1, 2 மற்றும் 4-ஆகிய பகுதிகளில் இன்று தொடங்குகிறது. இதனைத் தொடர்ந்து அனைத்து மண்டலங்களிலும் முகாம் விரிவுபடுத்தப்பட்டு, 75 வேலை நாட்களுக்குள் சுமார் 2 லட்சம் நாய்களுக்கு ரேபிஸ் தடுப்பூசி மற்றும் ஒட்டுண்ணி நீக்க மருந்து செலுத்தப்பட உள்ளது.
வளர்ப்புப் பிராணிகளுக்கும் இலவசம் – மாநகராட்சி அழைப்பு:
தமிழ்நாடு கால்நடை மருத்துவ அறிவியல் பல்கலைக்கழக மருத்துவர்கள் மற்றும் பயிற்சி மருத்துவர்கள், Worldwide Veterinary Services (WVS) நிறுவனத்தின் முழு ஒத்துழைப்புடன் இந்த முகாம் செயல்படுத்தப்பட உள்ளது. தெருநாய்கள் மட்டுமின்றி, பொதுமக்களின் வளர்ப்பு நாய்கள் மற்றும் பூனைகளுக்கும் இலவசமாக ரேபிஸ் தடுப்பூசி செலுத்த விரிவான ஏற்பாடுகள் செய்யப்பட்டுள்ளன.
“வெறிநாய்க்கடி நோய் இல்லா சென்னை” என்ற உயரிய இலக்கை அடையப் பொதுமக்கள், செல்லப்பிராணி உரிமையாளர்கள் மற்றும் விலங்கு நல ஆர்வலர்கள் தங்களது முழு ஒத்துழைப்பை வழங்க வேண்டும் எனச் சென்னை மாநகராட்சி அன்புடன் கேட்டுக்கொண்டுள்ளது.
#RabiesVaccination #ChennaiCorporation #StreetDogsChennai #ChennaiNews #PetVaccination #ViralNewsTN #TrendingTN #LatestNewsTN #TNNewsUpdates #Chennai
