சென்னை
தமிழ்நாடு சட்டப்பேரவையில் பட்ஜெட் மற்றும் வேளாண் பட்ஜெட் மீதான மூன்றாவது நாள் விவாதம் இன்று (ஆகஸ்ட் 11) நடைபெற்று வருகிறது. இந்தக் கூட்டத்தொடரில், நீட் தேர்வு முறையை முற்றிலுமாக அகற்ற வலியுறுத்திச் சுகாதாரத்துறை அமைச்சர் அருண் ராஜ் அரசினர் தனித் தீர்மானத்தை முன்மொழிந்து பேசினார்.
கிராமப்புற மாணவர்களுக்குப் பெரும் பாதிப்பு:
தீர்மானத்தை முன்மொழிந்து பேசிய அமைச்சர் அருண் ராஜ், “தமிழ் வழியில் கல்வி பயிலும் மாணவர்கள், கிராமப்புற மற்றும் சமூக பொருளாதாரத்தில் மிகவும் பின்தங்கிய மாணவர்களின் மருத்துவக் கனவை நீட் தேர்வு முறை பெரிதும் பாதிக்கிறது. இந்த நீட் தேர்வானது, வரம்பின்றி அதிகளவு கட்டணம் வசூலிக்கும் தனியார் பயிற்சி மையங்கள் பெருகுவதற்கு மட்டுமே வழிவகுக்கிறது. மாணவர்களின் ஒட்டுமொத்த கவனத்தையும் பள்ளிப் பாடத்திட்டத்தைப் பயில்வதில் இருந்து திசை திருப்பி, நீட் பயிற்சியில் மட்டுமே முழு கவனத்தையும் செலுத்தக் கட்டாயப்படுத்துகிறது. 12 ஆண்டுகாலப் பள்ளிக்கல்வியைப் புறந்தள்ளிவிட்டு, ஒரே ஒரு நாள் நடக்கும் நுழைவுத் தேர்வே மாணவர்களின் உயர்கல்வியைத் தீர்மானிக்கும் அவல நிலை ஏற்பட்டுள்ளது,” என்று வேதனை தெரிவித்தார்.
முறைகேடுகளும் நம்பிக்கையிழப்பும்:
மேலும் அவர் கூறுகையில், “கடந்த 2021-ஆம் ஆண்டு தமிழ்நாடு இளநிலை மருத்துவப் படிப்புகளுக்கான சேர்க்கைச் சட்ட முன்வடிவை (எண்: 43/2021) தமிழ்நாடு சட்டப்பேரவை ஒருமனதாக நிறைவேற்றியிருந்தும், குடியரசுத் தலைவரால் அச்சட்ட முன்வடிவுக்கு ஏற்பிசைவு வழங்கப்படாமல் நிறுத்தி வைக்கப்பட்டுள்ளது. இந்தச் சூழலில்தான், தொடர் வினாத்தாள் கசிவு மற்றும் பெரும் முறைகேடுகளால் 2026-ஆம் ஆண்டு நீட் தேர்வு ரத்து செய்யப்பட்டு மறுதேர்வு நடத்தப்பட்டது. இதனால் லட்சக்கணக்கான மாணவர்கள் பெரும் துயரம் அடைந்தனர்; உயிரிழப்புகளும் ஏற்பட்டன. இத்தேர்வு முறை நாடு முழுவதும் உள்ள மாணவர்களின் நம்பிக்கையை முற்றிலும் இழந்துவிட்டது. எனவே, இத்தேர்வு முறை உடனடியாக அகற்றப்பட வேண்டும்,” எனத் திட்டவட்டமாக வலியுறுத்தினார்.
மத்திய அரசுக்குத் தமிழக அரசு வலியுறுத்தல்:
“நீட் தேர்வுகளில் தொடர்ந்து நடைபெற்று வரும் முறைகேடுகளைக் கருத்தில் கொண்டு, நீட் தேர்வு முறையை ரத்து செய்யும் வகையில் 2019-ஆம் ஆண்டு தேசிய மருத்துவ ஆணையச் சட்டம், 2020-ஆம் ஆண்டு இந்திய மருத்துவ முறைகளுக்கான தேசிய ஆணையச் சட்டம், 2020-ஆம் ஆண்டு ஹோமியோபதிக்கான தேசிய ஆணையச் சட்டம் மற்றும் இது தொடர்புடைய பிற மையச் சட்டங்களில் தேவையான திருத்தங்களை மத்திய அரசு உடனடியாக மேற்கொள்ள வேண்டும் என்று தமிழ்நாடு சட்டமன்றப் பேரவை ஒருமனதாக வலியுறுத்துகிறது. இதன் மூலம், மாணவர்கள் 12-ஆம் வகுப்பு பொதுத்தேர்வில் பெறும் மதிப்பெண்களின் அடிப்படையிலேயே மாநிலத்தில் மருத்துவ மாணவர் சேர்க்கையை தடையின்றி மேற்கொள்ள இயலும்,” என்று அவர் முன்மொழிந்தார்.
பாஜக வெளிநடப்பு – ஒருமனதாக நிறைவேற்றம்:
இந்த அரசினர் தனித் தீர்மானத்திற்கு எதிர்ப்புத் தெரிவித்து பாஜக சட்டமன்ற உறுப்பினர் அவையிலிருந்து வெளிநடப்பு செய்தார். எனினும், இந்தத் தீர்மானத்திற்கு ஆளுங்கட்சியான தவெக, மற்றும் திமுக, அதிமுக, பாமக, மஜக, விசிக உள்ளிட்ட அனைத்துக் கட்சிகளும் தங்களது முழுமையான ஆதரவைத் தெரிவித்தன. இதையடுத்து, நீட் தேர்வில் இருந்து விலக்கு கோரிய இந்த அரசினர் தனித் தீர்மானம் பேரவையில் அனைத்துக் கட்சிகளின் ஆதரவுடன் ஒருமனதாக நிறைவேற்றப்பட்டதாகச் சபாநாயகர் ஜே.சி.டி.பிரபாகர் அதிகாரப்பூர்வமாக அறிவித்தார்.
#NEETExemption #TNAssembly #MinisterArunRaj #ChiefMinisterVijay #TVKGovernment #BanNEET #TamilNaduNews #TNPolitics #Chennai #MedicalAdmission #ViralNewsTN #TrendingTN #LatestNewsTN #TNNewsUpdates
