பொய்யான தகவல்களைக் கட்டுப்படுத்துவதிலும், பொதுமக்கள் நம்பிக்கையை வலுப்படுத்துவதிலும், சமூகங்களிடையே அமைதியையும் புரிதலையும் ஏற்படுத்துவதிலும் பொறுப்புள்ள ஊடகவியல் முக்கிய பங்கு வகிப்பதாக வெளி விவகாரங்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் விஜித ஹேரத் தெரிவித்துள்ளார்.
கொழும்பு ‘சின்னமன் லைஃப்’ (Cinnamon Life) வளாகத்தில் இன்று (01) நடைபெற்ற ஆசிய-பசிபிக் ஒலிபரப்பு ஒன்றியத்தின் (ABU) 63-வது பொதுச்சபை வரவேற்பு நிகழ்வில் கலந்துகொண்டு உரையாற்றுகையிலேயே அமைச்சர் இவ்வாறு குறிப்பிட்டார்.
தொழில்நுட்பத்தின் அதிவேக வளர்ச்சியால் தகவல்களை எளிதில் பெற முடிவதோடு, உண்மை எது பொய் எது என்பதை வேறுபடுத்தி அறிவது சவாலாக மாறியுள்ளதைச் சுட்டிக்காட்டிய அமைச்சர், துல்லியமான தகவல்களை மக்களுக்கு வழங்கி நற்புரிதலை உருவாக்க வேண்டிய பொறுப்பு ஊடக நிறுவனங்களுக்கு உண்டு என வலியுறுத்தினார்.
இலங்கையின் பன்முகத்தன்மை கொண்ட சமூகத்தைக் குறிப்பிட்ட அவர்: வெவ்வேறு சமூகங்களிடையே கலந்துரையாடல், பரஸ்பர மரியாதை மற்றும் புரிதலை ஊக்குவிப்பதில் ஊடகங்களின் பங்கு இன்றியமையாதது என்றார். மேலும், தொழில்நுட்ப கண்டுபிடிப்புகள் மனிதகுலத்திற்குப் பயன்படும் வகையிலும், அறிவை அனைவரும் எளிதில் பெறக்கூடிய வகையிலும் அமைய வேண்டும் என்றும் அவர் கூறினார்.
“இராஜதந்திர நடவடிக்கைகளால் மட்டும் அமைதியை நிலைநாட்டிவிட முடியாது” எனத் தெரிவித்த அமைச்சர், மக்களுக்கிடையிலான புரிதல் மிக முக்கியமானது என்றும், பொறுப்பான ஊடக ஒலிபரப்பு சமூகங்களை ஒன்றிணைப்பதில் முக்கிய பங்காற்ற முடியும் என்றும் தெரிவித்தார்.இந்நிகழ்வில் ஜனாதிபதி அநுரகுமார திசாநாயக்க மற்றும் கொழும்பு மாநகர சபையின் மேயர் ஆகியோரும் கலந்துகொண்டனர்.”
அமைதி மற்றும் மனிதநேயத்திற்கான ஊடகம்: உண்மை, நம்பிக்கை மற்றும் மாற்றம்” எனும் கருப்பொருளில் 5 நாட்கள் நடைபெறும் இம்மாநாடு ஒக்டோபர் 30 முதல் நவம்பர் 3 வரை நடைபெறுகின்றது. ‘எம்.டி.வி இலங்கை’ நிறுவனம் நடத்தும் இம்மாநாட்டில் ஆசிய-பசிபிக் பிராந்தியம் மற்றும் பிற நாடுகளைச் சேர்ந்த ஏராளமான ஊடகவியலாளர்கள் மற்றும் துறை சார்ந்த தலைவர்கள் கலந்துகொண்டுள்ளனர்.
