சென்னை
சட்டப்பேரவையில் ‘குதிரை பேரம்’ குறித்து அதிமுக பொதுச்செயலாளர் எடப்பாடி பழனிசாமி எழுப்பிய கடுமையான குற்றச்சாட்டால், அதிமுக மற்றும் ஆளுங்கட்சியான தவெக இடையே கடும் வார்த்தைப்போர் வெடித்தது.
“குதிரை பேரத்தில் ஈடுபடக் கூடாது!” – எடப்பாடி பழனிசாமி குற்றச்சாட்டு:
சட்டப்பேரவையில் பேசிய அதிமுக பொதுச்செயலாளர் எடப்பாடி பழனிசாமி, “வெற்றி பெற்று ராஜினாமா செய்துவிட்டு, மீண்டும் உங்கள் கட்சியிலேயே சேர்பவர்களை நீங்கள் ஏற்றுக்கொள்ளக் கூடாது. இதுபோன்ற குதிரை பேரச் செயல்களில் தமிழ்நாடு அரசு ஒருபோதும் ஈடுபடக் கூடாது,” என ஆவேசமாகக் குற்றம் சாட்டினார்.
“டெல்லியில் சரண்டர் ஆனீர்கள்!” – அமைச்சர் ஆதவ் அர்ஜுனா பதிலடி:
இதற்குப் பதிலடி கொடுத்த பொதுப்பணித்துறை அமைச்சர் ஆதவ் அர்ஜுனா, “2017-க்குப் பிறகு நடந்த அதிமுக ஆட்சியில் எங்களுக்கு உடன்பாடு இல்லை. அது ஜெயலலிதாவின் அதிமுகவோ, ஆட்சியோ கிடையாது. ஜெயலலிதா இருந்தவரை நீட், சிஏஏ போன்றவற்றை உள்ளே அனுமதிக்கவில்லை. ஆனால், உங்கள் ஆட்சியில் தமிழ்நாட்டின் நலனுக்கு எதிராக டெல்லியில் முழுமையாகச் சரண்டர் ஆனீர்கள். அதனால்தான், உங்கள் ஆட்சியை ‘நீர்த்துப்போன ஆட்சி’ என்று முதலமைச்சர் விஜய் விமர்சித்தார்.
அதிமுக தலைமை மீது தொண்டர்களுக்கு இருந்த நம்பிக்கை முற்றிலும் விலகியதால்தான், எம்.ஜி.ஆர் மற்றும் ஜெயலலிதாவின் உண்மையான விசுவாசிகள் தவெகவில் இணைந்து பணியாற்றுகின்றனர். இதை குதிரை பேரம் என்று சொல்வது முற்றிலும் தவறு. ராஜினாமா செய்யச் சட்டப்படி அனைவருக்கும் உரிமை உள்ளது,” என்று காரசாரமாகப் பதிலளித்தார்.
“இது கூவத்தூர் அல்ல!” – அமைச்சர் சி.டி.ஆர். நிர்மல்குமார்:
தொடர்ந்து பேசிய அமைச்சர் சி.டி.ஆர். நிர்மல்குமார், “எடப்பாடி பழனிசாமி மின்சாரக் கட்டணம் உயர்த்தப்பட்டதாகத் தெரிவித்தார். ஆனால், மின் கட்டணம் எந்த வகையிலும் உயர்த்தப்படவில்லை. சட்டமன்ற உறுப்பினர்கள் தாமாக முன்வந்து ராஜினாமா செய்து எங்கள் கட்சியில் சேர்ந்துள்ளார்கள். இதில் எந்தக் கூவத்தூர் நிகழ்வும் நடைபெறவில்லை,” என்று திட்டவட்டமாகத் தெரிவித்தார்.
“திமுகவும் அதிமுகவும் சேர்ந்துகொண்டு பேசுகிறீர்கள்!” – சபாநாயகர் பேச்சால் சலசலப்பு:
இதற்கிடையே குறுக்கிட்ட சபாநாயகர் ஜே.சி.டி.பிரபாகர், “எடப்பாடி பழனிசாமி 45 நிமிடம் தன் ஆட்சியின் சாதனைகளைத் தெரிவித்தார். ஆனால், அவர் கடைசியாகச் சொன்ன சில செய்திகள்தான் ஆளுங்கட்சியினர் பேச வழிவகுத்துள்ளது. திமுக, அதிமுக இரண்டு பேரும் சேர்ந்துகொண்டு பேசுவது எனக்குத் தெரியும். பேசாமல் அமருங்கள்,” என்றார்.
இதற்கு ஆட்சேபனை தெரிவித்த திமுக முன்னாள் அமைச்சர் எ.வ.வேலு, “நாங்கள் இருவரும் சேர்ந்து பேச வேண்டிய அவசியமில்லை. எங்களுக்கு எதிர்க்கட்சி என்ற அந்தஸ்து உள்ளது. நாங்கள் நடுநிலையாகவே நடந்துகொள்கிறோம். அதுதான் எங்களுக்குப் பாதுகாப்பு,” என்றார்.
“தொண்டர்களின் உழைப்பில் வென்றவர்கள்!” – ஈபிஎஸ் மீண்டும் ஆவேசம்:
இதைத் தொடர்ந்து மீண்டும் பேசிய எடப்பாடி பழனிசாமி, “இரவு, பகல் பாராமல் வேர்வையைச் சிந்தி வேட்பாளர்களை வெற்றி பெற வைத்தோம். பொதுச்செயலாளர் என்ற அடிப்படையில் எனது உத்தரவுக்கு இணங்க, தொண்டர்களின் கடின உழைப்பில்தான் அவர்கள் வெற்றி பெற்றார்கள். இதனால்தான் இந்தக் கருத்தைச் சொல்ல வேண்டிய நிலைக்கு நான் தள்ளப்பட்டுள்ளேன். நாங்களும், திமுகவும் எந்தக் காலத்திலும் ஒன்றாகச் சேர்ந்ததில்லை,” என விளக்கம் அளித்தார்.
இதற்குப் பதிலளித்த சபாநாயகர், தான் உள்நோக்கத்துடன் அவ்வாறு கூறவில்லை எனத் தெளிவுபடுத்தினார். தொடர்ந்து பேசிய ஈபிஎஸ், பேரவைக்குப் புறம்பான வார்த்தைகளைத் தெரிவித்த அமைச்சர் ஆதவ் அர்ஜுனாவின் பேச்சை அவைக்குறிப்பிலிருந்து நீக்க வேண்டும் என வலியுறுத்தினார்.
#HorseTradingIssue #TNAssembly #EPS #EdappadiPalaniswami #AadavArjuna #TVKGovernment #AIADMK #DMK #ChiefMinisterVijay #ThalapathyVijay #TNPolitics #TamilNaduNews #Chennai #ViralNewsTN #TrendingTN #LatestNewsTN #TNNewsUpdates
