சேலம்
காவிரி நதிநீர் விவகாரத்தில் ஆளும் தவெக அரசுக்கு அடிப்படை புரிதல் கூட இல்லை என்றும், கடந்த 100 நாட்களில் எந்தவொரு புதிய திட்டமும் செயல்படுத்தப்படாமல் பழைய திட்டங்களுக்குப் பெயர் மட்டுமே மாற்றி வருவதாகவும் அதிமுக பொதுச்செயலாளர் எடப்பாடி பழனிசாமி மிகக் கடுமையாகக் குற்றம் சாட்டியுள்ளார்.
காவிரி நதிநீரைப் பெறத் துப்பில்லாத தவெக அரசு:
சேலத்தில் ஆம்புலன்ஸ் சேவையைத் தொடங்கி வைத்த பின்னர் செய்தியாளர்களிடம் பேசிய எடப்பாடி பழனிசாமி, “காவிரி நதிநீர் விவகாரம் குறித்து மாநிலத்தில் ஆளும் தவெக அரசுக்கு எந்த விவரமும் தெரியவில்லை. கர்நாடக அணைகளில் போதிய நீர் இருப்பு இருந்தும் கூட, அதைத் தமிழ்நாடு அரசு முறையாகக் கேட்டுப் பெறவில்லை. இதனால் டெல்டா மாவட்ட விவசாயிகள் சாகுபடியை இழந்து தவிக்கின்றனர். காவிரி விவகாரம் தொடர்பாக அனைத்துக்கட்சிக் கூட்டத்தைக் கூட்ட பலமுறை வலியுறுத்தியும், தவெகவினர் மெத்தனப் போக்காகச் செயல்படுகின்றனர். கடந்த 1986 முதல் பெறப்பட்ட சட்டரீதியான உத்தரவுகளைக் கூட நிறைவேற்ற முடியாத அரசாக இது உள்ளது,” என்று சாடினார்.
“பழைய திட்டங்களுக்கு ‘வெற்றி’ என பெயர் மாற்றம்”:
தொடர்ந்து பேசிய அவர், “தமிழ்நாட்டில் தவெக ஆட்சிப் பொறுப்பேற்ற கடந்த 100 நாட்களில் எந்தவித புதிய திட்டங்களும் செயல்படுத்தப்படவில்லை. சட்டமன்றத் தேர்தலின் போது அளித்த எந்த வாக்குறுதியையும் நிறைவேற்றவில்லை. ஏற்கனவே நடைமுறையில் உள்ள பழைய திட்டங்களுக்கு ‘வெற்றி’ எனப் பெயர் சூட்டி மட்டுமே ஏமாற்றுகின்றனர். குறிப்பாக, பயிர்க்கடன் முழுமையாக ரத்து செய்யப்படும் என்று தேர்தல் வாக்குறுதி அளித்துவிட்டு, தற்போது விவசாயிகள் உட்பட அனைத்துத் தரப்பு மக்களையும் முதலமைச்சர் விஜய் ஏமாற்றிவிட்டார்,” என்று விமர்சித்தார்.
“போதைப்பொருள் புழக்கமும் குற்றங்களும் அதிகரிப்பு”:
“ஆட்சிக்கு வந்தவுடன் போதைப்பொருள் புழக்கத்தைக் கட்டுப்படுத்துவோம் என்று கூறினார்கள். ஆனால், முந்தைய ஆட்சியை விட தற்போது தமிழ்நாட்டில் போதைப்பொருட்களின் புழக்கம் பலமடங்கு அதிகரித்துவிட்டது. போதைப்பொருள் புழக்கத்தால் தமிழ்நாடு முழுவதும் கொலை மற்றும் பாலியல் வன்கொடுமைச் சம்பவங்கள் தொடர்ந்த வண்ணம் உள்ளன. அரசு இதனை இரும்புக்கரம் கொண்டு உடனடியாக அடக்க வேண்டும்,” என்று வலியுறுத்தினார்.
“2036 வரை இந்த ஆட்சி நீடிக்குமா?”:
2036-ஆம் ஆண்டிற்குள் தமிழ்நாட்டின் பொருளாதாரத்தை 1.5 டிரில்லியன் டாலராக உயர்த்துவதே இலக்கு என்ற முதலமைச்சர் விஜய்யின் சுதந்திர தின உரை குறித்த கேள்விக்கு, “அதுவரை இந்த ஆட்சி தமிழ்நாட்டில் நீடிக்குமா என்று பார்ப்போம்,” என எடப்பாடி பழனிசாமி பதிலடி கொடுத்தார்.
அதிமுகவில் இணைந்த தவெக வேட்பாளர்:
இதனிடையே, எடப்பாடி சட்டமன்றத் தொகுதியில் தவெக சார்பில் வேட்பாளராக அறிவிக்கப்பட்டு, வேட்புமனு பரிசீலனையின் போது தலைமறைவான அருண்குமார் என்பவர், சேலத்தில் அதிமுக பொதுச்செயலாளர் எடப்பாடி பழனிசாமி முன்னிலையில் அதிமுகவில் அதிகாரப்பூர்வமாக இணைந்தார்.
#EdappadiPalaniswami #EPS #AIADMK #ChiefMinisterVijay #ThalapathyVijay #TVKGovernment #CauveryIssue #DeltaFarmers #Salem #TNPolitics #TamilNaduNews #ViralNewsTN #TrendingTN #LatestNewsTN #TNNewsUpdates
