தென்மேற்கு கல்கரியின் (Calgary) ஸ்டோனி டிரெயில் (Stoney Trail) பகுதியில் இரவில் இடம்பெற்ற விபத்தொன்றில் சிறுவன் உட்பட குறைந்தபட்சம் நால்வர் உயிரிழந்துள்ளதாக அவசர உதவிப் பிரிவினர் தெரிவித்துள்ளனர்.

சுயூட்டினா பார்க்வே (Tsuut’ina Parkway) வீதி வெளியேற்றத்திற்கு அருகில், ஸ்டோனி டிரெயிலில் இடம்பெற்ற மூன்று வாகனங்கள் மோதிய விபத்து குறித்து ஞாயிற்றுக்கிழமை இரவு 11.00 மணியளவில் அவசர உதவிக் குழுவினருக்கு அழைப்பு விடுக்கப்பட்டதாகக் கல்கரி காவல்துறையினர் தெரிவித்தனர்.

வடக்கு நோக்கிச் செல்லும் பாதையில் தவறான திசையில் தெற்கு நோக்கி மெர்சிடீஸ் பென்ஸ் (Mercedes Benz) காரை ஓட்டிச் சென்ற 30 வயது நபர் ஒருவர், வடக்கு நோக்கிச் சென்று கொண்டிருந்த சுபாரு இம்ப்ரெசா (Subaru Impreza) மற்றும் செவ்ரோலெட் ஈக்வினாக்ஸ் (Chevrolet Equinox) ஆகிய கார்கள் மீது மோதியதாகக் கூறப்படுகிறது.

அவசர உதவிக் குழுவினர் சம்பவ இடத்திற்குச் சென்றபோது மெர்சிடீஸ் மற்றும் சுபாரு ஆகிய இரு கார்களும் தீப்பற்றி எரிந்து கொண்டிருந்தன.

தீயணைப்புப் படையினர் உடனடியாகத் தீயை அணைக்கும் பணியில் ஈடுபட்டதுடன், வாகனங்களுக்குள் இருந்தவர்களைத் தேடும் பணிகளையும் மேற்கொண்டனர். மீட்க முடிந்தவர்களுக்கு அவசர மருத்துவச் சிகிச்சைகளை வழங்கியதாகக் கல்கரி தீயணைப்புத் துறை செய்தி அறிக்கையில் தெரிவித்துள்ளது.

தீ கட்டுப்பாட்டிற்குள் கொண்டுவரப்பட்டதும், அல்பெர்ட்டா அவசர சுகாதாரச் சேவையுடன் (Alberta Emergency Health Services) இணைந்து பாதிக்கப்பட்டவர்களுக்குத் தீயணைப்பு வீரர்கள் சிகிச்சையளித்தனர்.

மெர்சிடீஸ் காரை ஓட்டிச் சென்ற நபர், அதே காரில் பயணித்த பெண் மற்றும் சிறுவன் ஆகியோர் சம்பவ இடத்திலேயே உயிரிழந்ததாக அறிவிக்கப்பட்டதாகக் கல்கரி காவல்துறை தெரிவித்துள்ளது. சுபாரு காரின் சாரதியும் உயிரிழந்துள்ளார்.

செவ்ரோலெட் காரில் பயணித்த சாரதி மற்றும் மூன்று சிறுவர்கள் மருத்துவமனைக்குக் கொண்டு செல்லப்பட்டனர். அவர்களில் ஒருவருக்கு ஆபத்தான நிலைமை இல்லையெனினும், வாழ்நாளைப் பாதிக்கும் அளவிலான காயங்கள் ஏற்பட்டுள்ளதாகக் காவல்துறை கூறியுள்ளது.

கல்கரி பொலிஸ் போக்குவரத்துப் பிரிவின் பணியாளர் சார்ஜென்ட் ஆண்டி வூட்வார்ட் (Andy Woodward) திங்கள்கிழமை நடைபெற்ற செய்தியாளர் சந்திப்பில் பேசுகையில், ஸ்டோனி டிரெயிலின் வடக்கு பாதையில் “வெள்ளை அல்லது வெள்ளி” நிற வாகனம் ஒன்று தெற்கு நோக்கிச் செல்வதாகக் காவல்துறைக்கு அழைப்பு வந்ததாகத் தெரிவித்தார்.

விபத்துக்குள்ளான வாகனங்களில் ஒன்று வெள்ளி நிறமுடையது என்பதை அவர் உறுதிப்படுத்தினார்.

இவ்விபத்தைக் காவல்துறையினரால் தடுத்திருக்க முடியுமா என்று கேட்கப்பட்டபோது, “அவ்வளவு குறுகிய நேரத்தில் அதைத் தடுப்பது மிகவும் கடினமானது,” எனக் கூறினார்.

“சரியான நேரத்தில் சரியான இடத்தில் ஒரு பொலிஸ் வாகனம் இருந்திருக்க வேண்டும், ஆனால் அது நிகழவில்லை,” என்றும், தகவல் கிடைத்த இரண்டு நிமிடங்களுக்குள் இந்த விபத்து நடந்துவிட்டதாகவும் அவர் தெரிவித்தார்.

இவ்விபத்து குறித்துக் கல்கரி காவல்துறையினர் விசாரணை நடத்தி வருகின்றனர். மெர்சிடீஸ் சாரதியின் மதுபானப் பயன்பாடு மற்றும் அதிகப்படியான வேகம் ஆகியவை இவ்விபத்திற்குக் காரணியாக இருக்கலாம் என ஆராயப்பட்டு வருகிறது.

இப்பாதை பல மணிநேரம் மூடப்பட்டிருந்த நிலையில், திங்கள்கிழமை காலை 9:45 மணியளவில் மீண்டும் போக்குவரத்திற்காகத் திறக்கப்பட்டது.