கடந்த இரண்டு வாரங்களுக்குள் கனடாவில் கடமையின் போது அதிகாரி ஒருவர் கொல்லப்படுவது இது மூன்றாவது முறையாகும்.

திங்கட்கிழமையன்று, மொன்றியலின் (Montreal) மக்கள் நடமாட்டம் மிகுந்த கோட்-டெஸ்-நெய்ஜஸ் (Côte-des-Neiges) பகுதியில் உள்ள விடுதி ஒன்றில் ஏற்பட்ட ஆயுதமேந்திய முற்றுகை மற்றும் துப்பாக்கிச் சூட்டுச் சம்பவத்தைத் தொடர்ந்து அப்பகுதி முற்றாக முடக்கப்பட்டது. இச்சம்பவத்தில் காவல்துறை அதிகாரி ஒருவர், பொதுமக்கள் தரப்பில் ஒருவர் மற்றும் சந்தேக நபர் என மூவர் உயிரிழந்தனர். மேலும் ஒரு அதிகாரியும், வழிப்போக்கர் ஒருவரும் காயமடைந்தனர்.

இந்தத் துப்பாக்கிச் சூடானது, கடந்த இரண்டு வாரங்களுக்கும் குறைவான காலப்பகுதியில் கனடாவில் அதிகாரி ஒருவர் கொல்லப்படும் மூன்றாவது சம்பவமாகப் பதிவாகியுள்ளது. இது அதிகாரிகள் மீதான வன்முறை அதிகரித்து வருகிறதா என்ற கேள்வியை எழுப்பியுள்ளது. அத்தோடு, சஸ்காட்செவனின் மெல்வில் (Melville, Sask.) பகுதியில் உதவி கோரி வந்த அழைப்பிற்கு பதிலளிக்கச் சென்ற இரண்டு ஆர்சிஎம்பி (RCMP) அதிகாரிகள் துப்பாக்கியால் சுடப்பட்டு காயமடைந்த அடுத்த நாளே இந்த மொன்றியலிலும் இச்சம்பவம் நிகழ்ந்துள்ளது.

இருப்பினும், காவல்துறை அதிகாரிகளின் மரணங்களைக் கண்காணிக்கும் ஆராய்ச்சியாளர்கள், இந்த ஆண்டில் கடமையின் போது கொல்லப்பட்ட அதிகாரிகளின் எண்ணிக்கை இன்னும் வரலாற்று ரீதியான சராசரி வரம்பிற்குள்ளேயே உள்ளது என்றும், கடந்த தசாப்தங்களை (Decades) ஒப்பிடும்போது தற்போது வன்முறையால் அதிகாரிகள் இறப்பதற்கான வாய்ப்புகள் குறைவாகவே உள்ளன என்றும் கூறுகின்றனர்.

“ஒரு குறுகிய காலப்பகுதியில் அடுத்தடுத்து மரணங்கள் நிகழ்வதை, கடமையின் போது நிகழும் காவல்துறை மரணங்களின் ஒட்டுமொத்த அதிகரிப்புக்கான ஒரு போக்காகவோ (Trend) அல்லது அலையாகவோ கருத முடியாது என்பதைப் புரிந்துகொள்வது அவசியம்” என்று ஒட்டாவா பல்கலைக்கழகத்தின் குற்றவியல் பேராசிரியர் ஜஸ்டின் பிச்சே (Justin Piché) சிபிசி-யின் ‘தி நேஷனல்’ (The National) நிகழ்ச்சியுடனான நேர்காணலில் தெரிவித்தார்.

பேராசிரியர் பிச்சே, 1960-களிலிருந்து காவல்துறை அதிகாரிகள் மீது திட்டமிட்டு நடத்தப்பட்ட வன்முறைத் தாக்குதல்களால் ஏற்பட்ட மரணங்கள் குறித்த தரவுகளைச் சேகரித்து வருகிறார். யாராவது ஒருவரால் வேண்டுமென்றே தீங்கு விளைவிக்கப்பட்டுக் கொல்லப்படும் அதிகாரிகளின் எண்ணிக்கை, கடந்த காலத்தை விட இன்று குறைவாகவே உள்ளது என்று அவர் கூறுகிறார்.

“நாம் 2026 ஆம் ஆண்டின் ஆறரை மாதங்களை மட்டுமே கடந்துள்ளோம், ஆனால் தற்போதைய இதே நிலை நீடித்தால், இது சராசரியை விடக் குறைவான மரணங்கள் பதிவான ஆண்டாகவே இருக்கும்,” என்று அவர் குறிப்பிட்டார்.

2026 ஆம் ஆண்டில் இதுவரை ஐந்து அதிகாரிகள் கடமையின் போது இறந்துள்ளனர், அவர்களில் மூவர் வன்முறைத் தாக்குதல்களால் கொல்லப்பட்டனர்.

கடந்த 64 ஆண்டுகால தரவுகளில் இல்லாத ஒரு விதிவிலக்காக, 2024 மற்றும் 2025 ஆம் ஆண்டுகளில் கனடா முழுவதும் கடமையின் போது எந்தவொரு காவல்துறை மரணமும் நிகழவில்லை. அதேநேரம், 2023 ஆம் ஆண்டில் எட்டு அதிகாரிகள் கடமையின் போது உயிரிழந்தனர், அவர்களில் அறுவர் திட்டமிட்ட வன்முறையின் காரணமாகவே இறந்தனர்.

1962 மற்றும் 2026 க்கு இடையில் கனடா முழுவதும் கடமையின் போது 416 காவல்துறை அதிகாரிகள் உயிரிழந்துள்ளனர், இது ஆண்டிற்கு சராசரியாக 6.5 மரணங்கள் என்ற அளவில் உள்ளது.

மொன்றியலில் நடந்த சம்பவம் “மிகவும் அரிதான ஒன்று” என்று கியூபெக்கின் உள்நாட்டுப் பாதுகாப்பு அமைச்சர் இயன் லஃப்ரினியர் (Ian Lafrenière) செய்தியாளர் சந்திப்பில் தெரிவித்துள்ளார்.

கடமையின் போது ஏற்படும் மரணங்கள் மற்றும் காயங்கள்:

காவல்துறை அதிகாரிகள் இறப்பதற்கு வாகன விபத்துகளே முதன்மைக் காரணமாக உள்ளன, அதற்கு அடுத்தபடியாக துப்பாக்கிச் சூடுகள் உள்ளன. சமீபத்திய சம்பவங்களில் இந்த தொழில்சார் ஆபத்துகள் பிரதிபலிக்கின்றன.

ஒன்டாரியோ மாகாண காவல்துறை (OPP) சார்ஜென்ட் பிராண்டன் மால்கம் (33), கடந்த ஏப்ரல் மாதம் டொராண்டோவிற்கு வெளியே நடந்த மோட்டார் சைக்கிள் விபத்தில் உயிரிழந்தார்.

ஜூன் 9 அன்று, ஹெர்ஸ்ட் (Hearst, Ont.) அருகே வாகனமொன்றை நிறுத்த முயன்றபோது ஒபிபி (OPP) அதிகாரி தருண் பாலி கொல்லப்பட்டார். மருத்துவமனையில் இருந்து தப்பியோடிய 18 வயது இளைஞன் மீது, மரணத்தை விளைவித்த அபாயகரமான வாகன இயக்கம் உட்பட பல குற்றச்சாட்டுகள் சுமத்தப்பட்டுள்ளன.

ஜூன் 11 அன்று, அடுக்குமாடி குடியிருப்பு ஒன்றில் சோதனையிட்டபோது டொராண்டோ காவல்துறை அதிகாரி மார்க் பினிஸோட்டோ (43) சுடப்பட்டார். இது தொடர்பாக 19 வயது சந்தேக நபர் மீது குற்றம் சுமத்தப்பட்டுள்ளது.

ஜூன் 14 அன்று, டொராண்டோ காவல்துறை அதிகாரி ஒருவர் கார் மோதியதில் பலத்த காயமடைந்தார். கார் திருட்டு மற்றும் கொலை முயற்சி குற்றச்சாட்டின் கீழ் 12 வயது சிறுவன் ஒருவன் கைது செய்யப்பட்டுள்ளான்.

ஞாயிற்றுக்கிழமை சஸ்காட்செவனில் காயமடைந்த இரு அதிகாரிகளுக்கு மேலதிகமாக, மிசிசாகா (Mississauga, Ont.) பகுதியில் அதிகாரி ஒருவர் மீது துப்பாக்கிச் சூடு நடத்தியதாக 24 வயது இளைஞன் ஒருவனும் கைது செய்யப்பட்டுள்ளான்.

திங்கட்கிழமை மொன்றியலில் நடந்த துப்பாக்கிச் சூட்டில் கொல்லப்பட்ட அதிகாரி 34 வயதுடைய முகமது லமின் பென்ரெடோவான் (Mohamed Lamine Benredouane) என அடையாளம் காணப்பட்டுள்ளார். அவர் 2021 முதல் காவல்துறையில் பணியாற்றி வந்தார்.

‘மக்களின் அணுகுமுறையில் மாற்றம்’

முன்னாள் ஒட்டாவா காவல்துறை அதிகாரியும், தற்போது கார்லேட்டன் பல்கலைக்கழகத்தின் சட்ட ஆய்வுகள் துறையின் இணைப் பேராசிரியருமான கிரெக் பிரவுன் (Greg Brown) கூறுகையில், “காவல்துறை மீதான பொதுமக்களின் நம்பிக்கை மற்றும் மதிப்பீட்டில் சமூகம் முழுவதும் ஒரு குறிப்பிடத்தக்க மாற்றம் ஏற்பட்டுள்ளது” என்றார்.

ஒவ்வொரு துப்பாக்கிச் சூட்டுச் சம்பவத்திற்கும் தனித்தனி பின்னணிகள் இருந்தாலும், கடந்த இரண்டு தசாப்தங்களாக சட்டம் ஒழுங்கு அமலாக்கம் குறித்த மக்களின் மாறிவரும் அணுகுமுறைகள் இத்தகைய சம்பவங்களில் ஒரு மறைமுகத் தாக்கத்தை (Trickle down effect) ஏற்படுத்தியிருக்கலாம் என்று அவர் கூறினார். இந்த நம்பிக்கைச் சரிவு காரணமாக புதிய உறுப்பினர்களைக் காவல்துறையில் சேர்ப்பதும் கடினமாகியுள்ளது என்றார்.

மேலும், சட்டவிரோத துப்பாக்கிகளின் பெருக்கம் மற்றொரு சவாலாக உருவெடுத்துள்ளது என்று பிரவுன் குறிப்பிட்டார். “குறிப்பாக, எனது பார்வையில், கும்பல் கலாச்சாரத்தை (Gang culture) பெருமையாகப் பேசும் போக்கு இந்த துப்பாக்கிச் சூடுகளுக்கு ஒரு முக்கிய காரணமாகும்,” என்று அவர் கூறினார்.

உறுதியான முடிவுகள் இல்லை

சிபிசி நியூஸ் தொடர்பு கொண்ட நிபுணர்கள், மொன்றியலிலும் பிற கனேடிய நகரங்களிலும் நடந்துள்ள இந்த வன்முறைகள் குறித்து இப்போதே ஒரு இறுதி முடிவுக்கு வருவது மிக முன்கூட்டியதாக இருக்கும் என்று கூறுகின்றனர்.

“இத்தகைய சம்பவங்கள் நடந்த உடனேயே, உண்மைகளை அடிப்படையாகக் கொள்ளாமல் பல விஷயங்கள் பேசப்படுகின்றன. எனவே நாம் விழிப்புடனும், கவனத்துடனும் இருக்க வேண்டும்” என்று பிச்சே கூறினார். இந்த வன்முறைகளில் ஈடுபட்டுள்ள பலரிடையே உள்ள ஒரு பொதுவான அம்சம் என்னவென்றால், அவர்கள் அனைவரும் இளம் ஆண்களாக இருக்கிறார்கள். “எனவே அவர்களின் வாழ்க்கையில் என்ன நடந்து கொண்டிருந்தது என்பது பற்றி நாம் கேள்விகளை எழுப்பலாம், ஆனால் இப்போதைக்கு இதற்குப் பின்னால் உள்ள காரணங்கள் குறித்து எம்மால் எந்தவொரு உறுதியான முடிவிற்கும் வர முடியாது,” என்று அவர் மேலும் தெரிவித்தார்.